Innëtö Chitri Yik Aṅ Kòrin
12 Öt yanööluṙen in yěi eū-eure. Sön pöri Chū-ö öich hòṅ ngatī inlahen, hòṅ vë-eny inlahen ngam pinngangkūö pöri Chū-ö töngamuh tö hameuknyu tö ngam Mā nö i heūvö hēk inlahen minë lamöktö in ò inhānga inrē. 2 Akahakūö chin töp tö hěngtak tarik in Kristū, tö 14 samyeūheu unrēhě nö kēlöng nö el ngam linūöyö halīöngö, öt akahakūö Chin tö ò, yěn kēlöng anga-aṅ nö holtö ngam alaha hēk öt holtö ngam alaha, höng ngam Tēv pöri tö akahakūö. 3 Heūṅ, akahakūö Chin tö öp tarik, öt akahakūö Chin tö ò, yěn kēlöng anga-aṅ nö holtö ngam alaha hēk öt holtö ngam alaha, höng ngam Tēv pöri tö akahakūö. 4 Kēlöng anga-aṅ nö chuh el ngam peretāis ngaich hang nup ṙô anga-aṅ, nup tötkô nö ṙônyu hēk öt halöngtuṙen ngòh tö hěngtak tarik nö ṙônyen u. 5 Eū öp tarik chin tö ngatī inlahen, asā tölngö ngam inlahen Chu pöri, höng hòṅ eū minë töt kumlē-enre chū-ö, öt tahëngu. 6 Yēḵ chu öre lōnu hēṙu hòṅ eū-eure, öt tö kulō-ov chū-ö min, kūö chu höng kò-òṙô. Lökten pöri chū-ö öich öt eū-eure hòn öt tarīku tö hòṅ yahlö tī nö hatāilen chu nö imat re, tö nup ṙô ahang ò hēk tö nup la-en chu maheuk ò yěich kēken u. 7 Un tarīku tökiröngö elmat tö chu, tökūö nup töt insā-avö töt mikahkūö sin tö hameuknyu nö in chu.
Hòṅ chu min öt tööḵlö aṅ in tö ngam tanāilölōn, pön hěng öp töchökhukūö el alaha chu nö sā tö lòkhötvö kūö nö tö sā ṙēngen tö hěngtak ma-ahānga ngam Satān, nö töng iṙūöhötī nö famtākkūö chu,* ngam chö-öiny chu öich öt kiröng elmat töre. 8 Lūöi heuh ṙô Chū-ö öich hòṅ aṙētu ṙô öich peuinyhökūö ngam Mā, tö ò nö kēnyen ngam töchökhukūö nö ṙā-ang el alaha chu. 9 Ngö ṙô pöri ngam Mā nö in chu: “Löökö ṙôken an ngam tökiröng miṙēḵlōn chu nö in meh, yēḵ meh ötkalē-en ngaich meūkö ngam kumlēḵ chu nö in meh.” Lökten chin öich kirööngen ṙanamölōn öich eūkö inlahen minë ötkumlē-enre, hòṅ ngam kumlēḵ Kristū ngam tö sā inlahen inrūkui nö hanyattö kui chu. 10 Lökten Chin ṙamölōn öich chö-öinyten Kristū i ötkumlē-en, i ötlinëken, i hanāṅten, i inkihten hēk i kanihngen. Pò Chu yēḵ chu ötkalē-en, hē e Chū-ö kalēḵ.
11 Vītöre Chin tökulō-ovö. Pītlö alaha chu yī-ö öich ngatī inlahen. Ngih öre tö hòṅ inlahen e, tö yīö öi lāritö Chu öi ṙò-òvö, pò Chu öich töt kūöṅnö öich in yip tökiröng öich in yip tanīnöṙô yīö, pòrô Chū-ö öich öt tö tinrīkuṙen öich imat yīö. 12 Rö-ö yin, pöi kô-en öi kôtamat öi meūkö chu öich hameuktu öich ichūök kamngö tanīnöṙô, nup hameuktö chu öich holtö manööyöre takô, holre tö minë minkahngö hēk pinngangkūö hēk minhôiyö la-en inrē. 13 Hö-ö chin lumngānö yīö in nup töng sitih, angū-ö inlahen yīö öi harīkngöre tö minë tahëng māṅ, ōt hòng vanāichö inlahen Chu? Ngaich yěn ōt, ngaich aṙēlen chu yī-ö tö u.
14 Yěh meuk! Linūöi heuh Chu ön ngih öich lēntöhëichṙen hòṅ chuh in yīö, sön pöri chū-ö öich öt hòṅ lumngānö yīö, pò chu öt lōnu tö nup kanôlò yīö, lōnten yīö pöri. Öt maheūṅkku in tö yip nyīö tö cha nö hamūl pësa yip yöngre, maheūṅkku pöri öi in yip yöng tö cha nö hamūl pësa yip kūönre. 15 Holtö ṙanamölōnre Chin öich chö-öinyten tö yīö öich keuheūttö nup aṅ in re, uroh min inrē öich höng Chū-ö kumheūttöre. Yēḵ Chu öich ngatī ṙôken hanangenlōn tö yīö ngaich höng kūöṅnen taneūngen hòng Chū-ö töm hanangenlōn yīö? 16 Öt hěng nup tī Chu lumngānö yīö, sön pöri yī-ö öi ngö ṙô tö chu öich tö heuveū-en öich hachīlö yīö. 17 Ngaich asā ṙôken yip töng tahīntö chu nö chuh in yīö ngaich öt hěngtak in cha löktö tī chu öich kēḵ yanöölenre öich in yīö. Kēḵ yanöölenre öich? 18 Hòṅ aṙētu ṙô chin tö Taitös nö chuh in yīö, töp tö hěngtak inrē prötör holröön ò. Öt kēḵ yanöölenre pöri ang Taitös nö in yīö, kēḵ yanöölenre öp? Hö-ö öi īhö höng hēngö hameukti tö inlahenre? Hö-ö öi, öi höng hēngö lahök tö talöökö?
19 Ṙömöng ngatī mufē öyih tö ih öi höng laklöre öi ikūö yīö? Hö-ö in öi ikūö yīö öi laklöre, pöi ikūö ngam Tēv öi in Kristū. Yī-ö hanangenlōn chu kahōlö, ṙòkhöre nup töng sitih inlahen ih nöng chö-öinytö inngönken yīö. 20 Tön vöö Chin yēḵ chu öich chuh in yīö ngaich öt kôtökūö tö yīö öi ngatī inlahen öi sā öp lōn Chu hēk ngatī inrē yī-ö öi öt kôtökūö tö inlahen Chu öich sā lōn yīö, hòn öt lökten yīö kôti höng līnen höö, rānyngö, hūlökūö tanāinyö, la-alkūöre, vë-eng nang höö, siṙösṙôre,* tööḵlö tö tanāilölōn hēk tinṙōlen. 21 Hòṅ ngam Tēv Chu nö öt miṙēḵngen chu nö ikūö yīö, yēḵ chu öich havantöre öich chuh in yīö hēk öt haṙivlōn Chū-ö tö inlahen yip töpōyen tarik, yip mu-urěh nö kēken ngam tökööl hēk yip töng iṙūöhen nö in ngam töt hanëtö, chinô-òṅkānö* hēk tötlöng la-en* ngaich öt havöötö ellōnre.