I minë-eny Rōma
7 Kahōlö, mihôiṅ hòng nö ngatī tö yīö öt akahalōn (vë-ekūö cha Chin yip tö akahakūö tö ngam chööngö) tö ngam Chööngö nö hayöng ngòh tarik hanöng sā ò nö ṙòmöng aṅ? 2 Sā ngam inchōḵ-elmat tö ngòh tö hěngtak tö pīhövö kikānö nö haköpiyö nö in ngam pīhöre kikōnyö hanöng sā ò nö aṅ nö sā ṙô ngam chööngö, ngaich yēḵ ngam pīhö ò kikōnyö pöri nö kapah ngaich ṙānyu anga-aṅ nö ṙā-ang im chööngö ò. 3 Yēḵ ngam pīhö ò kikōnyö nö ṙömöng aṅ ngaich yěn i tahëng ngam pīhö ò kikānö ngaich anga-aṅ nö töng ma-asěha* tö ṙô. Yēḵ ngam pīhö ò pöri kikōnyö nö kapah ngaich ṙānyu anga-aṅ nö ṙā-ang im chööngö ò. Yēḵ ò pöri nö i tahëng kikōnyö unôichrit kinpaha ngam pīhöre ngaich hö-ö anga-aṅ nö ma-asěha* tö ṙô.
4 Yī-ö hol chu, ngatī ṙēngen yin yī-ö inrē öi kapah im Chööngö öi lökten im alaha Kristū, hòṅ yīö hōtu öi in Kristū ngam tö hachohlöng nö ṙā-ang in yik tökapah. Ṙënten angū-ö nö ngatī, hòṅ yīö öi kētö ṙòng re öi chö-öinyten ngam Tēv. 5 Pò hī hē hī misī öi lök i kuilōn ngam alaha öi aṅ ngaich fēḵlen hī ngam Chööngö tö minë tökööl lōn ngam alaha minë tö la-evṙen nö im alaha* hī, tö hī öi kētö ṙòng re ngaich ngam ṙòng e min nö kinpaha. 6 Ngaich pöri ayī-ö töngamuh öi ṙānyu im Chööngö, pò hī ngaich öi kapah öi im chūökre sin kiṙapka, hòṅ hī öt lök in ngam tökūichi töhötṙeh Chööngö, löktö in ngam töhet kumlēḵ pöri öi vītöre öi tö tufömngöre mahalanṙen.
7 Sitih ṙô öi pökeh? Ōt hòng tökööl im Chööngö?* Hö-ö! Yēḵ ngam Chööngö öre nö öt ōt ngaich öt akahakūö Chū-ö öre tö inlahen ngam tökööl. Sā ngih inchōḵ-elmat, yēḵ ngam Chööngö öre nö öt ngö ṙô: “Uh man yikhānga,” ngaich asuh ngam yinikhānga, öthō öre Chū-ö öich akahakūö tö e. 8 Löktö im chööngö tī pöri ngam tökööl nö vīhöt ngam yinikhang nö ellōn Chu, pò ngam tökööl nöng kapah yěn öt ōt ngam chööngö. 9 Rö-ö, pön hěngheuh ök ṙētak Chu öich aṅ hē ngam chööngö nö hö-övö, hē ngam chööngö pöri nö yih ngaich aṅhlö hēk ngam tökööl ngaich kapah Chū-ö. 10 Ngaich ngam chööngö chamö-öinyten ngam nômö ngaich kôtökūö Chū-ö tö e nö ṙòng ngam kinpaha chu. 11 Pò ngam tökööl nö löktö im chööngö tī nö halō-ongkūö chu ngaich löktö in e chū-ö öich fëli. 12 Het ön ngam Chööngö nöng in re ngaich töhet ngam hinang chööngö, tölöök hēk tövai inrē.
13 Ngam tölöök chööngö ngam Tēv hòng pöri lāinyngen ngam kinpaha chu? Hö-ö! Pön ngam tökööl tö tī-iv töich öich kapah, hòṅ ngam tölöök chööngö ngam Tēv nö hameuknyö ngam tökööl nö la-evṙen nö el alaha chu ngam kamū-ötö im kinpaha tī tö chu ngaich löktö im hinang chööngö nö hameuknyu ngam tökööl inrē nö kirööngen ötlanöökö. 14 Pò hī öi akahakūö tö ngam Chööngö nö lamöktö in ngam Tēv, tököölö fālen* pöri Chū-ö ngaich eltī ngam tökööl öich inyīhiyö. 15 Nup la-en chu, öt akaha elmat Chū-ö töre öich kūö yòh öich la-evṙen tö u, pò nup lōn Chu la-en chu ngaich öt ngatī inlahen Chū-ö. Nup kumnyah elmat Chu pöri la-en, anū-ö kahëken Chu. 16 Yēḵ Chu pöri öich kēken nup la-en nup sahō-o Chu, ngaich ṙatö-ellōnre Chū-ö tö ngam Chööngö nö tölöök. 17 Lökten nup la-en Chu, hö-ö anū-ö nö la-en chu, pön la-en ngam tökööl ngam töng mi-iyöng nö lātuhēt chu. 18 Akahakūö Chin töre tö ngö manah tö ngam el alaha chu nö öt rahëichyen aṅ in tö ngam tölöök, pò Chu höng kuyulōn töre öich la-evṙen tö tölöök, hö-ö pöri öich teungten la-evṙen tö tölöök. 19 Pò Chu öich höng hòṅ lōnu töre öich la-evṙen tö tölöök ngaich öt ngatī inlahen Chū-ö, öt lōnu pöri Chū-ö töre öich la-evṙen tö tötlöök ngaich angū-ö la-en chu. 20 Ngaich yēḵ Chu öich la-evṙen tö nup sahō-ore la-en ngaich rö-ö öich Chū-ö töla-evṙen tö u, pön ngam tökööl ngam mi-iyöng nö el alaha chu.
21 Kôtökūö pöri ngaich Chū-ö tö ngam chööngö öich in re: Yēḵ Chu öich hòṅ löökö la-en ngaich kôtökūö Chū-ö tö ngam tökööl nö el alaha chu. 22 Kô-en an ngam tarik lamātuhēt chu nö teūngen tö ṙanamlōnre nö im chööngö ngam Tēv, 23 kôtökūö pöri Chū-ö tö ngam alahare* nö la-evṙen tö minë tahëng chööngö ngam lamā-al ngam chööngö ngam mahayöng mufē elkuilōn chu ngaich kēten chu öich haköövö öich elkatòh ngam chööngö ngam tökööl, ngam mi-iyöng el alaha* chu. 24 Tötkôlò chin Chū-ö tarik! Achīöp min ṙamānyen chu öich ṙā-ang in ngih alaha tö hòṅ kapah? 25 Löktö in ngam Mā hī chin Yēsū Kristū öich kētö nööinyö ngam Tēv! In ngam mufē elkuilōnre Chin öich haköövö* tö ngam chööngö ngam Tēv, haköövö pöri ngam alaha chu tö ngam chööngö ngam tökööl.