Inlahen La-en Yik Tanīnöṙô
28 Hē ih öi holtö lanöökenre öi teung im kuyāyö ngaich möl īhö öi akahakūö tö minë-eny ngam kun panam nö Malta. 2 Hameuktö neūkölōnre* yik tarik* aṅkūö ngam kun panam nö in ih hēk pōyen tī inrē nö hayööken ih, hameui tö kūö tameūiyö ih cha-a tö kūö ngam kumṙah hēk unfōvö inrē. 3 Hē Pôl nö hamūl nuk ngòh ngaich chaphöt u nö ikūö ök tameūiyö, hěng nòng ngaich ök pēch mameutlö tö kūö ngam ṙanāchö nö in nuk töhamūlö ngòh ngaich vön kël Pôl. 4 Hē yik tarik* aṅkūö ngam kun panam nö meuk ngam pēch tö pōisönu nö kitēlhakṙen nö i kël ò, ngaich vë-ekūö höö cha-a nö ngö ṙô: “Lohten ön ngòh tarik nö famëlhang, öt kò-òngvah anga-aṅ nö el mai, sön pöri nö öt ṙāḵlöng nômö tö ngam kinṙôka.”* 5 Kichënyngen ök pēch ngaich ang Pôl nö ikūö ök tameūiyö, hö-ö pöri ang Pôl nö fehnguṙen. 6 Sön pöri yik tarik nö meūka tö Pôl nö yölö alaha hēk fukngö inrē nö kapah. Vai rò-òten cha-a nöng hökkö inlahen ò, hē cha pöri nö meūkö ò nö öt fehnguṙen ngaich haṙīḵngö ngam mufēre cha-a nö ṙôten ò nö Tēv.
7 Höng in e nö röhta ök tumlat ngam mākūö panam ang Pupliös, holtö hanangenlōnre anga-aṅ nö ha-öinytö yīhi ih ngaich lūöi sumkam rò-òten nö meukṙen ih. 8 Höng el pistara ök yöng Pupliös kikōnyö pön vahāvö, vūöi anga-aṅ hēk invahāvö tö ök tökalēḵ chanök ellōn,* yihtöre ngaich ang Pôl nö in ò ngaich vë-ekūötēv, ṙāḵtö këlre anga-aṅ nö in ò ngaich lööken tī tö ò. 9 Hē kinheūten e ngaich, yihtöre ngaich yik tahëng tövahāvö tarik aṅkūö ngam kun panam nö chuh in Pôl ngaich lööken cha-a. 10 Pōyen ngaich nuk inlōnti kahētö cha nö in ih nö hameuktö minlēḵṙenre ngaich hē ih öi kiröönngöre öi yôklö öi el chōng ngaich pōyen kahëti cha-a tö nup chehen tö öt ṙānangen nö in ih.
11 Unôichrit tö lūöi chumngëṅtö īhö öi kiröönngöre öi el ök tö hěngngòng chōng aṅ Aleksanria ök töng ngöh nö in ngam kun panam nö asā ṙò-òten ngam laneūchö, lākūö ök chōng ök insā nak kūön Chiūs. 12 Ngaich lūöi sumkam īhö öi sumtö kirapre öi höngngöh öi i Surkusā, 13 kiröönngöre ngaich īhö öi ṙā-ang umuh ngaich teung öi i Rēkīöm, unôichrit tö hěng sumkam ngaich ngam kuföt lamöktö lā lòhngö ngaich im tahëng sakāmö īhö öi teung öi i Putīöli. 14 In e īhö öi meukkūö më prötör ngaich hòṅ aṙēḵtu ṙô cha-a tö ih nö hōten ih öi sat sumkam öi höngöhtöre öi in cha, unôichrit e ngaich īhö öi kiröönngöre kū-ötö Rōm. 15 Ngaich hē më prötör nö hang yanīhi ih, ngaich chöhöre kūö ih cha-a nö söl in öp pachār Öppiūs hēk söl in nuk tö lūöi patī chūök hameūheure. Hē Pôl nö meuk më prötör nö umuh ha-öiny ngam Tēv ngaich anga-aṅ, ngaich teūngen tö nganöönöre. 16 Hē ih ngaich öi teung i Rōm ngaich halöngtuṙen ang Pôl nö hěngtiṙah, halēnlöng pöri ök tö hěngtak kumyung amahten ò.
17 Unôichrit tö lūöi sumkam ngaich anga-aṅ nö havëten yik tarik mākūö yik Yahūti nö chuh in ò. Hē cha nö mūl ngaich ngö ṙô anga-aṅ nö in cha: “Kahōlö, hö-ö chin chū-ö öich la-al më tarik hēk la-al nup tö nehngenre inlahen yik muvöhngö hī, sön pöri chū-ö öich hachēlhötvö i Yērūsalem ngaich kētu öich eltī më tarik aṅ Rōm. 18 Hòṅ ṙānyen chu cha-a unôichrit inlahen cha nö chöhnyö minë fālen chu, pön öt kanôtivö kūö cha-a tö fālen chu töp chö-öiny chu öich kētu sācha öich fëli. 19 Hē yik Yahūti pöri nö sōḵ, lökten chū-ö öich havëkö inlahenre öich chuh kūö ngam mahayöng, ötkūö chu pöri öich hòṅ vīlö fālen yip aṅ panamre. 20 Lökten chū-ö havëten yīö pò chu hòṅ vë-ekūö yīö, pò ngam maheūkkö më Israel, angū-ö lāinyngen chu öich nyëki tö sayōk.” 21 Ngö ṙô cha-a nö in Pôl: “Öt teūngen in tö chittire nö löktö in më Yahūti tö inlahen meh, ötrēhěn yik Yahūti prötör lamöktö muh nö vë-eny nang ih tö inlahen meh hēk öt vënyö nuk tötlöök inlahen meh. 22 Ngamuh pöri tölöng nö elmat ih, tö ih hòṅ hang ṙô meh öm vënyö nup töng ṙô ellōnre, pön asā tölngö mikahkūö ih tö inlahen ngih krup, keuheūtngöre chūök më tarik nöng sō-en minë ṙô meh.”
23 Halēnngö ök töhěng sumkam ngaich cha-a ṙētakre ngaich pōyen nö hamūlöre nö ip kamngö chūök ò nö höngngöh. Löktökūö peuheū söl harap ang Pôl nöng vamënyö inlahen ngam Pūlngö ngam Tēv hēk mikahtö elnang cha, ngaich löktö in nuk chööngö Môsös hēk löktö in nuk līpöre yik pròfět anga-aṅ nö vë-eny inlahen Yēsū. 24 Ōt yik in cha tarik ṙamatö-ellōnre nö in minë ṙô ò, rīkre pöri yik töt ṙamatö-ellōnre. 25 Öt hō-en ṙô höö cha-a lökten nö kiröönngöre nö ṙā-ang umuh, ngö ṙô hēk ang Pôl:
“Lööngö ṙô an ngam töhet kumlēḵ nö löktö in ök pròfět Isayā nö ngö ṙô tö yik muvöhngö yīö, 26 ‘Kuṙòh ngö ṙô in më tarik: “Hang yin min, höng öt akaha elnang pöri tö nup ahangre, meuk yin min, höng öt akaha elmat pöri tö nup maheukre. 27 Pò vē tarik ngaich nö kufëi ellōn, hang nun minë elnang cha, hö-ö pöri nö kētöre höng meuchngö matre cha-a hòṅ cha nö öt meuk nö löktö in minë matre, ötrēhěn nö hang minë nang cha hēk ötrēhěn minë ellōn cha nö akahakūö tö manah u ngaich havöötökūöre öre cha-a nö in chu hòṅ chu öich halanken cha.”’ 28 Lökten yin akahalōn tö ngih lamöktö in ngam Tēv inhangkö ngam inyööken nö söömtu nö in më tahëng mihëṅṙö ngaich öthō cha-a min nö öt hāngö e.” 29* ——
30 Nët samyeūheu ang Pôl nö el minë töṙāyu patī, ngaich yik töng tarik yamih nö umuh, holtö hanangenlōnre anga-aṅ nö ha-öiny tö yīhi cha. 31 Ahangkö ngam Pūlngö ngam Tēv anga-aṅ nö in cha ngaich öt pinyū-uvṙen hēk öt ansökken* röön nö haköptö inlahen ngam Mā Yēsū Kristū.