I minë-eny Kòlòsi
2 Lōnu Chin tö yīö öi akahalōn tö ṙôken kanihngen chu öich chö-öinyten tö yīö hēk chö-öinyten cha inrē yip mi-i Lòtisiā hēk chö-öinyten cha inrē nö ṙòkhöre yip töt hěngheuh mat nö meukkūö chu. 2 Ṙën chin öich ngatī inlahen, hòṅ cha nö teūngen tö hanöhlö ellōnre hēk ṙongren inlahen inrē cha-a nö mūlhen höö nö im hanangenlōn ngaich teūngen cha-a tö ngam kanôlò ngam kamëtö ṙinatö-ellōn cha tö ngam mikah elmat cha takô nö löng ngaich möl min cha-a nö teūngen tö ngam töhet töt mikahkūö sin lamöktö in ngam Tēv, ngam tö ngö, teūngen tö ngam tölöng mikah elmat Kristū. 3 Chumkūöṙen inyunngö nö in ò minë taṙòkhöre kanôlò ngam mikah hēk mikah elmat. 4 Ṙën Chin öich ngatī ṙô, hòn öt tarīku lamöktö in nup ṙôre nö vë-ekūö yīö nö hachīlngen yīö. 5 Pòrô chū-ö öich öt in yīö, sön pöri ngam ellōn Chu nö in yīö, kirööngen ṙanamlōn chū-ö öich meuk inlahen yīö öi elhôi höö öi vāyö inlahen, ngön takô inrē ngam ṙinatö-ellōn yīö öi in Kristū.
6 Lökten sā ngam inlahen yīö öi hō-en ngam Mā Kristū Yēsū, ngatī inlahen yī-ö öi iṙūöhöröön holröön ò im hinëngö, 7 aṙū-uti tī öi köptī töm rööntö e hēk iṙūöhöröön öi kū-ö urěh hēk ngön öi im ṙinatö-ellōn, sā inlahen inköptö yīö, hěnghöre hòṅ löknyö ellōn yīö inrē ngam kinëtö nyööinyö.
8 Haṙēmngenre! Ui höng haköövö* tö minë ṙô ngih panam hēk tö minë töng inchīlö chanök alaha ṙô minë kui panam töng vahīken tarik hēk töng yanëḵngen ṙô ngih panam minë töt sā kuilōn Kristū, 9 pò minë taṙòkhöre tinrīken ngam Tēv nö keuheūtlöre nö meūkö nö in Kristū. 10 Ngaich teūngen yī-ö tö minë taṙòkhöre öi löktö in ò, ngam kui minë taṙòkhöre inyööngö hēk tö chööngu. 11 Lökten in ngam inlahen innôlö yīö öi in ò öi ngatī inlahen tunnyinyngö nö öt aṅhtī tö kuntī, kūö yīö pöri öi kavalngen ngam tötlöök alaha öi ngatī inlahen tunnyinyngö öi sā inlahen yip mahalanṙen Kristū. 12 Lökten yī-ö öi hol ò ūli im vinôkö ngaich kūö ngam innôlö yīö in ò öi hol ò öi hachohlöng, pò yīö öi ṙatö-ellōnre öi in ngam minhôiṅyö la-en ngam Tēv, ngam mahachohlen Kristū nö ṙā-ang in yik tökapah.
13 Rö-ö nöng angū-ö, pön hachohlen yīö ngam Tēv öi in ò öi hěng, pòrô yī-ö öi töng kapah tökūö minë fālenre ngaich öt tunyīnyi sin ngam alaha yīö, hameukten ngam tökiröng neūkölōnre anga-aṅ nö aṙēlen minë taṙòkhöre fālen hī 14 ngaich sichngen* ngam tökūichö tökūö kuntī nö imat ngam līpöre, minë tö aṅhav mat tö minë inchöngten hēk lama-al hī inrē. Ngaich kēngen ò nö ikūö hī nö tōklen ò nö irōi ngam chōn inkihten.* 15 Löktö in ngam chōn inkihten* tī anga-aṅ nö lichôingen më mahayöng nö ikūö yip taṙòkhöre tarik nö sā inlahen töt mihôiṅ, löktö im minhôiṅyöre pöri nö vīten cha nö famchūkörit ò.
16 Lökten nö un tarīku mahalēnngen öp tö hòṅ nyā-aṅkūö yīö hēk òk yīö inrē hēk tö minë tö hòṅ kēkaṙen tö yīö tökiröng sakāmö, tufömngöre chingëṅt hēk haneūheu töhet sakāmö. 17 Pò në nöng nyat nup taṙòkhöre tö hòṅ yih, Kristū pöri tökô-en. 18 Un tarīku yēḵ ṙamūöhngen yīö tö ngam raneushö ngam tö hòṅ taneūngen yīö, yip töng mahanyatkö elmat nö īnu tö ngam inyāichngö hēk tö ööire tö ngam vinë-ekūö yip ma-ahānga, “höng köp”* yip cha-a tarik nö in nup heūvö, yip töng vamë-enyre nö meūkö u, höng ṙamlōn cha-a nö in minë mufēre töng sā mufē tarik, nöng öt lāinynguṙen töp aṅ in re nö ngatī inlahen, 19 Öt ngön öp anga-aṅ tarik nö köp nö in ngam kui, ngam mahateungngö kuilōn ngam alaha nö keuheūtngöre ngaich löktö in ngam rahē alaha hēk tanap, ngam tamap ngam alaha nö keuheūtlöre ngaich asīöp ngam alaha nö sā lōn ngam Tēv.
20 Yēḵ yīö ngaich hěngheuh öi kapah öi in minë töng yanëḵngen ṙô ngih panam öi hol Kristū öi kapah ngaich kūö yòh hēk yī-ö öi sā inlahen yip tarik aṅ ing panam öi hökngenre öi haköövö tö në inchöngten: 21 “Un ṙāpa, un kalaha, un lūöla”? 22 Ṙôtö inlahen në chehen ön ngih inchöngten, minë töng yūsö ngaich chuhngöre. Töng haköptö tarik nun në inköphöti hēk chööngö. 23 Höng in minë lōnre cha-a inlahenre nö vë-ekūö ngam Tēv, hanyatkö elmat cha-a nö īnu tö ngam inyāichngö hēk ṙūöhlö ngam inlahenre cha-a nö kēten ngam alahare nö hakihten e. Pòrô anū-ö tölōn hī nö ṙô ngam mikah elmat, sön pöri öi öt yanööluṙen öi löktö in u öi la-al minë kuilōn ngam alaha.