Raneh chitri Pītör
5 Lökten Chin hòṅ aṙēḵtu ṙô tö* yip minṙöinylen elhôi yīö, pò chu chū-ö inrē öich sā cha öich tö hěngtak öich minṙöinylen hēk tö kôtamat inrē öich meuk kanihngen Kristū ngaich hol ò min öich in ngam inpōilö ò ngam tö hameuknyu min. Hòṅ aṙēḵtu ṙô chin 2 tö yīö öi sā yip Yōm sīṅp öi haṙūötken minë kiteūm ngam Tēv më tö kētu nö in yīö ngaich sā yip mahayōmken cha* öi holtö ṙanamlōnre öi la-evṙen öi ikūö ngam Tēv, rö-ö öi höng pītnyöre, holtö ellōnre pöri im la-en mineukṙen, ui höng yal tö nup taneūngen lamöktö i michūṙen, 3 ngaich un hakeū chööngöre nö in nup kanôlò ngam Tēv, vītöre pöri öi tövai öi inchō-okūö minë kiteūm. 4 Ngaich yěn hameuktöre min ngam yöngkūö më yōm sīṅp ngaich teūngen min yī-ö tö ngam sapīöv inpōilö, ngam töt hōḵ min nö chuhngöre vanāiyö.
5 Ngatī inrē yī-ö ṙālö, öich hòṅ aṙēḵtu ṙô tö yīö, öi tumṙeūtöre tö më tö ṙēḵtivö.* Ṙòkhöre pöri yī-ö öi hameuktö ngam inyāichngö öi in höö,* pò ngam Tēv nö kunyahalōn nö in yip tö tāilölōn, hameuktö ngam tökiröng miṙēḵlōnre pöri nö in yip tarik tö yāichö ellōn.
6 Lökten yin hayāichngöre öi elkatòh ngam tökalēḵ kël ngam Tēv, hòṅ ò min nö ip tölöng ṙētakre nö hapōilen yīö, 7 lökten yin pehtö nup taṙòkhöre pinṙūtölōnre* in ò, pò ò nö tö chumkūöṙen tö yīö. 8 Hīnöre yin, aṅhtöre! Tön havöötaröön an ngam Satān,* ngam tö kunyaha elmat tö yīö nö sā ṙôktô layön nö chöh öp kahā-angre. 9 Hangönöre pöri yī-ö öi im ṙinatö-ellōn öi la-al ò, pò yīö akahalōn tö yip taṙòkhöre prötör tö keuheūtngöre chūök ikūö ngih panam nö ngatī inlahen nö la-al minë kanihngen. 10 Töng rahëichtakūö pöri në kanihngen yīö ngaich unôichrit e min ngam Tēv, ngam töṙōlkangen tī nö hameuktö ngam tökiröng miṙēḵlōnre nö keuheūtngö ngam inlahenre nö harūnö yīö. Havëten yīö anga-aṅ öi teūngen tö ngam töt chanuhuvṙen inpōilö. Pò yīö öi hol Kristū öi im hinëngö, anga-aṅ min mahangönken yīö hēk ma-asöklen yīö öi ngöntöhëichṙen. 11 Minhôiyö ò yēḵ nöng örheūheu. Āmen.
12 Löktö in Silvanös,* ngam chūök ṙinatö-ellōn Chu prötör, öich kūichten në töng rahëichyen ṙô öich in yīö, hòṅ chu öich hangönken yīö hēk kētö ṙinatö-ellōn yīö tö e nö angū-ö tökô-en tökiröng miṙēḵlōn ngam Tēv. Ngaich löktö in e yī-ö öi ngöntöhëichṙen öi sökhak. 13 Sinlāmu ṙô ön nö in yīö, ngam mi-i Pēpilön, ngam tö sā yīö nö tökatöllöngö, sinlāmu ṙô inrē ngam kūön chu nö in yīö, ang Mākös. 14 Salāmö höö yin holtö hināmökūö aṅ im hanangenlōn.
Angū-ö ön ngih havëkö chu tö yīö öi ṙòkhöre öi teūngen tö ngam lanāmö öi mi-im hinëngö öi in Kristū.