I minë-eny Kalatī
6 Kahōlö, lohten nö ōt öp tarik tövaichö kahëken tö la-en ngaich höng öt akahaiṙen anga-aṅ tö inlahen e. Ngaich yī-ö töhalēnlöng tö ngam Tēv öi tö teungten, pītnyöre yin öi halööktit öp tarik, öi holtö ṙanëmenre. Chumkūöṙen pöri yī-ö öi ngëichköre, hòṅ yīö öt halō-oikūö. 2 Keunhökūö höö yin tö lumnganre ngaich ngatī inlahen öi hang ngam chööngö Kristū. 3 Yěn ōt töng rö-övö ngaich höng kiröng elmat töre, ngaich töng mahachīlöre anga-aṅ. 4 Kö ngëichkö minë la-enre pöri ngòh tö hěngtak. Ngaich teūngen min anga-aṅ tö ṙanamlōnre nö löktö in minë la-enre, rö-ö nö kūö ò nö hòṅ haṙongtöre nö in yip tahëng. 5 Pön höng kö keun kumre* ngòh tö hěngtak.
6 Rö-ö nöng angū-ö, pön ngòh töhaköptu tö ngam ṙô* ngam Tēv, vīten ngam tarik anga-aṅ nö teūngen tö minë taṙòkhöre tövai chehen ngam mahaköpten* ò.
7 Un hachīlöre: Tön töt hanyëḵngen an ngam Tēv. Ngòh tö hěngtak tarik tameūich, anga-aṅ min mahamūl ṙòng taneūich re, 8 pò ngòh tö chö-öinytö ngam alaha nö teūich ngaich hamūl ötinkòlô ngam alaha min anga-aṅ, ngòh tameūich pöri nö chö-öinytö ngam töhet kumlēḵ, hamūl ngam nômö tö örheūheu-aṅ min anga-aṅ nö löktö im töhet kumlēḵ. 9 Lökten ta-a, ui ṙëingöre öi la-evṙen tö minë tölöök la-en, pò hī yēḵ hī min öi öt heūlngöre* ngaich teūngen min ayī-ö tö ṙòng re ip ṙētak. 10 Lökten yēḵ hī ṙömöng ṙētakvö,* ta-a töi löökö inlahen öi i taṙòkhöre tarik, mötlö inlahen öi in yip prötör sistör, yip mi-im ṙinatö-ellōn.
11 Yěh meuk ṙôkö kinrööngö në kahūichtö Chu öich in yīö öich aṅhtī tö kuntīre.
12 Ṙòkhöre yip mahanyatkö elmat nö lātunyī nö hòṅ haṙamngölōn më tarik,* cha-a yin tökalēḵ alaha nö timlö alaha yīö öi tunyīnyiyö, nöng chö-öinyten cha nö sōḵ nö kihngen tökūö ngam chōn inkihten* Kristū. 13 Lökten vē töla-evṙen tö la-en tunnyinyngö, höng kôten cha-a nöng öt hang ngam Chööngö, ṙën pöri cha-a nö hòṅ tunyinyngen yīö, hòṅ cha nö ineū-euvö nö löktö im inlahen ngam alaha yīö. 14 Öt ineū-euvö Chin öich in nup tahëng, höng in ngam chōn inkihten* ngam Mā Yēsū Kristū, löktö in Kristū ngih panam nö kapah* nö in chu ngaich kapah Chū-ö öich chö-öinytö ngih panam. 15 Öt mööḵlö ön ngòh tö tunyinyi, ötrēhěn nö mööḵlö ngòh töt tunyinyi, mööḵlö pöri ngam tö tufömngöre vinīlöng. 16 In cha nö ṙòkhöre yip tölöngö inlahen nö lök in e nö asā ngam chööngö, tö ngö manah, teūngen yēḵ tö neūkölōn hēk lanāmö nö in yip Israel ngam Tēv.
17 Ngö ṙô chin ngaich töngamuh, un hěngtak mahakihten Chu, pò chu öich kumtö ngam pitōt alahare ngam minkahngö chu öich tö hěngtak mahalanṙen Yēsū.
18 Kahōlö, köp ön yēḵ ngam tökiröng miṙēḵlōn ngam Mā Yēsū Kristū tökūö yīö öi hameuktö ngam kumlēḵ alahare. Āmen.