I minë-eny Rōma
12 Lökten kahōlö, holtö neūkölōn ngam Tēv Chin öich vë-ekūö yīö öi kētö ngam alahare nö tö aṅ, töhet hēk tö hō-ovö tö ngam Tēv nö tökētu, ngatī inlahen min yī-ö öi la-evṙen tö minë töhet la-en öi holtö mikah elmatre. 2 Uh yin öi sā inlahen më tarik ing panam,* tumfömlö ngam mufēre pöri hòṅ yīö harikngenre ngaich ngëichköre min yī-ö öi iṙūöhen mikahtökūöre tö nup tölöök, tö hō-ovö hēk tö nup töhet kuilōn ngam Tēv.
3 Löktö im tökiröng miṙēḵlōn chin ngam kinë-ekūö chu öich ngö ṙô in yīö öi ṙòkhöre mū-umuh, ui mötlö elmat tö e asā öp tölngöre, asā ṙôken ngam ṙinatö-ellōn kinë-ekūö* yīö i tö hěngtak tö ngam Tēv ngatī inlahen yī-ö öi lööngö mufē. 4 Lökten sā ngam alaha hī nöng hěng, ṙōl pöri minë pak ngam alaha ngaich öt hěngren la-en nö ṙòkhöre minë pak ngam alaha, 5 ngatī ṙēngen ayī-ö öi pōyen öi hěng in Kristū öi hēngö alaha ngaich ṙòkhöre ayī-ö öi kö tūmö alaha höö. 6 Kö harīkngöre minë inlōnti kinë-ekūö hī nö löktö in ngam tökiröng miṙēḵlōn, lökten yěi aṅhavin tö ngam inlōnti inlahen nup tö eūka kinlēḵngô, ta-a chěi tö eūkö minë kinlēḵngô öi asā tölngö ṙôken ngam ṙinatö-ellōn kinë-ekūöre, 7 hēk yěi teūngen tö ngam inlōnti inyööken, ta-a chěi töi iṙūöhen öi hayööken yip tahëng ngaich ngòh tö teūngen tö inlōntire nö haköphöti ngaich hökngen ò nöng iṙūöhen nö haköphöti, 8 hēk ngòh tö teūngen tö inlōntire nö kētö inreuskö alaha ngaich iṙūöhen anga-aṅ nö ngatī inlahen, ngòh ma-alōnhöti,* keuheūttö ellōnre anga-aṅ nö alōnhöti ngaich ngòh mahachōkūö ngaich ma-āinyre* anga-aṅ nö ngatī inlahen, ngòh mahameuktö neūkölōnre ngaich holtö ṙanamlōnre anga-aṅ nö hameuktö neūkölōnre.
9 Un aṅhavin ngam hanangenlōn meh tö innyatkö elmat. Surīkhö minë tötlöök ṙô, iṙūöhen haköpngöre in minë tölöök ṙô. 10 Sā hanangenlōn yīö tö yip mikūönöre, ngatī hanangenlōn yī-ö tö höö. Kahngenre öi rēhěre öi hameuktö minlēḵṙenre tö yip tahëng 11 Ma-āinyre,* un ṙahata.* Hökngen ngam töhet kumlēḵ nö iṙūöhen hanūṙö. Vītöre yin mahalanṙen Yāvē* öi meukṙen ò. 12 Ṙamölōn tökūö ngam maheūṅkköre. Möi hē el ṙētak minë kanihngen. Iṙūöhen im vinë-ekūötēv. 13 Holṙenre öi meukṙen hanāten yip töhet tarik. Haköpkö ngam inlahenre im mineukṙen. 14 Yip töt lamēḵken yīö, iṙūöhen havëkö inkôlò cha in ngam Tēv. Heūṅ, havëkö inkôlò, un rūtiṙen. 15 Ṙamölōn in yip tö ṙamölōn, peūiny in yip pameūiny. 16 Sā mufē yīö tö inlahenre, ngatī mufē yī-ö tö inlahen yip tahëng. Uh yin fēkö nup tökiröng ṙô,* iṙūöhen pöri in minë ṙô töng rahëichyen hēk töng öt uroh ṙôken inrē. Uh man ngö lōn töre öm mötlö ṙôken aṅ in tö mikah.
17 Un havahlöng töchōich tö töchōich nö i tarik. Chumkūöṙen tö nup tölöng nö imat taṙòkhöre ngaich ngatī inlahen. 18 Öptöng tölngö inlahen yīö, pītnyöre öi vī ngam lanāmö öi i taṙòkhöre. 19 Kahōlö, um havahalvahre, kētö ṙētak ngam lanīnö* pöri, tön ngö kinūichngö ön: “Ngö ṙô an Yāvē,* la-en Chu ön ngam invahalvah, Chū-ö chin min mahavalvah.” 20 “Yēḵ ngam tö kunyaha elmat pöri tö meh nö ha-euk ngaich hanëlen ò më-eṅ, yěn haṙëhe nômö anga-aṅ ngaich kētö òk ò më-eṅ tö mak, pò meh yēḵ meh min öm ngatī inlahen ngaich sā ma-afônglö ta-ök min më-eṅ öm ikui ò.”* 21 Um öt mihôiṅ tö ngam tötlöök, mihôiṅ pöri tö tötlöök öm aṅhtī tö tölöök.