Raneh Chitri Timôtī
4 Lööknyi vinënyi an ngam ṙô, ngam tö uhômhötvö tö ngam Tēv tö yip rīkre min tarik ip yamih ṙētak nö ṙāngenre nö im ṙinatö-ellōn tökūöre nö chumkūöṙen tö nup inköphöti tö sā lamöktö in ngam Tēv, hěnghöre hang minë inköphöti lamöktö in yip tötlöök ma-ahānga inrē, 2 pò cha min nöng hō nö hang nup tö minyôiny ṙô yip mahanyatkö elmat, yip töt akahaiṙen elkuilōn nö sā tökatānö töp töṙāich vët. 3 Sōḵ cha-a nö kēḵ ngam pinīhö ngaich kētö chööngö nö in yip tarik nö sōten cha nö lēköre nyā-aṅkūö, nöng angū-ö chö-öiny ngam Tēv nö vīlö në chehen, hòṅ yip ṙamatö-ellōnre hēk yip tölööngö mikahkūö inrē tö ngam kanô-en ngaich kētö nööinyö cha-a ngaich nyā-aṅvkūö tö u. 4 Pò në taṙòkhöre vahīlö ngam Tēv nö tölöök ngaich öt hěng in në chehen tö sō-ovö, yěi höng kētö nööinyö ò pöri ngaich nyā-aṅvkūö tö u, 5 pön löktö in ngam ṙô ngam Tēv hēk löktö im vinë-ekūötēv minë chehen nö hetlöre.
6 Yēḵ meh min öm kēten ngih inlēnö öm in më prötör ngaich kaheūkö min më-eṅ öm tölöök mahalanṙen Kristū Yēsū ngaich löktö in minë ṙô ṙinatö-ellōn hēk harūkö inrē öm löktö in minë tölöök inköphöti, minë tö chumkūökaṙen tö meh öm söl ing töngamuh. 7 Sō-en nup töminyôiny pöri istōri nup tötlamëkôre tö ngam Tēv, sā ṙēngen öp tö ahangnyu tö yip tököinyö ṙēḵti yöngnyīö, iṙūöhen pöri öm kahngenre harūnöre öm vī ngam vinë-ekūö ngam Tēv nö chö-öinyre. 8 Pò ngam eksösais ngam alaha nöng tölngu tī tö yanöölen, yöölen tī pöri ngam vinë-ekūö ngam Tēv nö in nup tökeuheūttöre ṙô, pò ò nö kilēḵngôre nö kētö ngam nômö ing töngamuh hēk ip yamih inrē min ṙētak. 9 Mihôiṅ in ṙatö-ellōnre öi in ngih ṙô hēk mihôiṅ inrē öi hō-en e takô. 10 Lökten in öi holtö kanihngenre öi ma-āinyre la-evṙen, pò ih öi maheūṅkkū öi in ngam tö aṅ Tēv ngam Mahayööken yip töṙòktöre mihëṅrö tarik, mötlö nö in cha yip tö īnu tö kanô-enre.
11 Iṙūöhen kētö chööngö hēk iṙūöhen haköpten cha tö inlahen u. 12 Un tarīku tö kūöṅnö elmat tö meh tökūö meh kūöṅnö ṙēḵti, tövai pöri öm inchōkūö yip tökô-en tarik öm im ṙinò-òv, tinrīken, hanangenlōn, ṙinatö-ellōn hēk hanëtö. 13 Hanöng sā chu öich öl yih, iṙūöhen më-eṅ öm haköp öm ikūö yip tarik öm ahangtö elnang cha, kētö ṙinūöhlö* alaha cha hēk holtö kumlēḵ alahare öm haköphöti. 14 Um öt chumkūöṙen tö ngam inlōntire ngam kinë-ekūö meh ik ṙētak hē ngam tö-eūka inlahen meh hēk ṙāḵtö eltīre inrē yik tūmö alaha yip minṙöinylen nö in meh hē e. 15 Iṙūöhen öm aṙū-uti mufē* tö inlahen në ṙô hēk iṙūöhen inrē öm in u, hòn lööknyi mineūkö ngam inlahen meh öm kū-ö urěh tö yip taṙòkhöre tarik. 16 Iṙūöhen man chumkūöṙen töre hēk tö minë ṙôre yěm haköphöti. Iṙūöhen öm in në ṙô, yēḵ meh min öm ngatī inlahen ngaich teūngen min më-eṅ hēk yip hamang ṙô meh tö ngam inyöökenre.