Raneh Chitri Timôtī

3 Mihôiṅ in ṙatö-ellōnre tö ngih ṙô: Yěn tarīku tö hòṅ kū-ö urěh nö la-en tö ngam la-en minṙöinylen ngaich tövai angū-ö nö kuilōn nö la-en. 2 Lökten ngòh minṙöinylen nö tötkô nö aṅhavin tö töchōich, höng hòṅ hěngtak pīhö anga-aṅ, hòṅ ṙāpöre anga-aṅ nö i tökeuheūttöre, tö hòṅ löngö mufē,* tö lēnö inlahen, kū-ö urěh nö in minë mineūkṙen, tö hòṅ heuveū-euṙô nö haköphöti, 3 ötkô nöng töng mihiyōi-aṅ, ötkô nö famël holre, mahameuktö minlēḵṙenre pöri, ötkô nö la-alkūö holre, ötkô nö tö yal tö rupīö, 4 tö hòṅ heuveū-en* nö hachō-okūö ngam mikūönöre ngaich tö hòṅ kô-en inlahen yip kūön ò nö tumṙeūtöre tö ò 5 (pön yěn öt heuveū-en* min ngòh tö hěngtak tarik nö hachō-okūö ngam mikūönöre ngaich sitih inlahen min anga-aṅ nö ngëichken ngam māṅ ngam Tēv?), 6 ötkô nöng töng tufömngöre nö im ṙinatö-ellōn, hòṅ ò nö öt aṅhavin tö ngam tanāilölōn, hòṅ ò nö öt kētu sācha tö ngam sācha kinë-ekūö ngam Satān. 7 Rö-ö nöng angū-ö pön hòṅ vāyö minë-eny inrē anga-aṅ nö in yip aṅ elkahôiṙen, hòṅ ò nö öt sūöichlöng fālen* ngaich öt fukta anga-aṅ nö in minë tinngöp tī ngam Satān_.

8 Tö hòṅ ngatī inlahen inrē më mahayööken töla-evṙen nö tökô-en, ötkô cha-a nö ṙôten minë tö michūṙen ṙô,* ötkô nö pōivat nö òk vāin hēk ötkô nö yal tö nup töng taneūngen lamöktö i michūṙen 9 hēk tö hòṅ hëtö elkuilōn nö holtö ngam ṙinatö-ellōn, ngam tö ngö manah köptī töm töhet töt mikahkūö sin.

10 Rö-ö nöng angū-ö, pön urěh cha-a nö hòṅ ngëichka yēḵ cha nö tökò-òre inlahen hēk hö-ö ngaich yěn meūkö cha-a nö töt fāluṙen ngaich möl cha-a mihôiṅ nö kē-ěvkūö tö ngam la-en mineukṙen.

11 Ngatī inlahen inrē vē kikānö nö tö hòṅ kô-en, ötkô cha-a nö samūöichkö inlahen yip tahëng, hòṅ ṙāpöre i tökeuheūttöre, tö hòṅ kô-en nö in nup taṙòkhöre.

12 Töng hòṅ hěngtak pīhö ön ngòh mahayööken töla-evṙen, tö hòṅ vāyö inlahen hēk tö hòṅ heuveū-en nö hachō-okūö yip kūönre hēk mikūönöre. 13 Lökten cha-a vē tö vāyö inlahen nö la-evṙen teūngen cha-a tö ngam tövai minë-enyre hēk öt pinyū-uvṙô nö holtö ngam nganöönöre nö vënyö ngam ṙinatö-ellōnre ngam mi-in Kristū Yēsū.

14 Rö-ö pöich meūṅkkenre öich veutta yanīhi min öich chuh in meh, sön pöri Chū-ö öich kūichten në ṙô öich in meh, 15 hòṅ Chu yěich pòrô öich hāṅti yīhi ngaich akahakūö më-eṅ tö inlahenre öm in yip tarik el patī ngam Tēv. Māṅ ngam tö aṅ Tēv ön ngih patī ngaich machööḵlö ngam kanô-en hēk rööntö e inrē. 16 Kô-en nö tökiröng ngih töhet töt mikahkūö sin ngam vinë-ekūö ngam Tēv: ‘Hameuktu ang Yēsū nö alaha tö alaha tarik, kē-ěvkūö anga-aṅ tö ngam töt maneūken alaha ngaich kaheūkö nö tölöök, hameuktöre anga-aṅ nö ikūö yip ma-ahānga, ahangka inlahen anga-aṅ nö ikūö nup tahëng panam, ṙatö-ellōnre yip aṅkūö ngih panam nö in ò ngaich kē-ěvkūö anga-aṅ tö ngam ineū-eure ngaich kēlöng nö el halīöngö.’