I minë-eny Kalatī
5 Angū-ö ngih ṙinānyö aṅhtī Kristū nö ṙānyen hī, lökten yin hangöönöre öi sökhaka ngaich ui halöngtenre hēk öi keun kaneun ngam inköövö.
2 Yěh meuk! Chū-ö Pôl, vë-eny nang yīö chin, yēḵ yīö öi hòṅ tunyinyngöre ngaich töng öt yanööluṙen tī min ang Kristū tö yīö. 3 Ngö ṙô Chin hēk öich in yip tarik kamëkö ngam la-en tunnyinyngö, yēḵ ò nö tunyinyngöre ngaich hòṅ hang minë taṙòkhöre anga-aṅ Chööngö Môsös. 4 Yī-ö tarik öi kumpītkenre öi kaheūkö öi tölöök kūöre öi hang ngam chööngö ngaich yin öi köhngen tö Kristū ngaich vāngnyö röönre yī-ö öi lātunyī tö ngam tökiröng miṙēḵlōn ò. 5 Löktö in ngam töhet kumlēḵ pöri ayī-ö öi maheūṅkku töre öi kaheūkö öi tölöök hēk holtö manööyöre öi hökken ò. 6 Pò ngòh mi-im hinëngö nö in Kristū Yēsū, ötrēhěn ngam tunnyinyngö nö mööḵlö nö in cha hēḵ ötrēhěn ngam tö tunyīnyiyö, ngam ṙinatö-ellōn pöri tö mötlö, ngam tö meūkö nö im hanangenlōn.
7 Löökö röön sin yī-ö öi lök* el talöökö ngam kanô-en ngaich achīö ma-asökngö inlahen yīö öi ṙatö-ellōnre im kanô-en? 8 Në tö ngatī inlahen inköphöti, öt lamöktö in ngam Tēv anū-ö ngam mahavëten yīö. 9 Ngam tö rahëichnyen inföh nö mihôiṅ nö keuheūtngöre tī tö ngam tökirāchö atta nö föhlö. 10 Yī-ö mi-in ngam Mā öi im hinëngö, ṙatö-ellōnre pöri Chū-ö tö yīö öt hō-en nup tahëng min, ngaich yip chamòhòlre nö vīlö kanihngen yīö pòrô cha-a nö öp töng yòh, öthō min cha-a nö teūngen tö sāchare ngam tö hòṅ taneūngen cha. 11 Kahōlö, yěich ṙô tö ngih inlahenre pöri, yēḵ Chu töngamuh öich ṙömöng ahangkö ngam tunnyinyngö ngaich kūö yòh Chū-ö öich hakihtuṙen öich söl ing töngamuh? Yēḵ chu öre öich ngatī inlahen, ngaich öthō öre më tarik nö haṙivlōn tökūö ngam chōn inkihten.* 12 Tövai angū-ö nö in ngòh kikōnyö ngòh kumtöngngö ellōn yīö nö rökngen ngam tūmö alahare.*
13 Kahōlö, tö havëtu yin öi ṙānyu, uh pöri öi ngölōn töre öi mihôiṅ öi hateungngö kuilōn ngam alaha öi löktö in ngih ṙinānyi, sā öp mahalanṙen pöri öi kö meukṙen höö öi holtö hanangenlōnre. 14 Tön keuheūtlöre an ngih Chööngö nö in ngih töhěng ṙô: “Hangenlōn man tö holre öm sā hanangenlōnre töre.” 15 Yēḵ yīö pöri öi höng iṙūöhen öi im kināpö höö hēk kā-a höö ngaich hīnöre yī-ö, hòṅ yīö öi höng öt ahetngen höö.
16 Ngö ṙô pöri Chū-ö, iṙūöhen yin lök im inchōkūöre tö ngam töhet kumlēḵ ngaich öthō min yī-ö öi hateungngö minë kuilōn ngam alaha. 17 Pò ngam tötlöök kuilōn ngam alaha nö la-al ngam töhet kumlēḵ hēk ngam töhet kumlēḵ nö la-al ngam alaha, nëtre anū-ö nöng kö la-al höö, lökten nup lōn yīö inlahen yīö, hö-ö yīö ngatī inlahen. 18 Yēḵ yīö öi lök in ngam inchōkūöre tö ngam töhet kumlēḵ ngaich öt elkatòh ngam chööngö yī-ö.
19 Lööknyi mineukö nun minë la-en ngam alaha. Tö sā ngam chinô-òkānö,* töt hanëtö, töt sinrōngkūö la-en,* 20 vinë-ekūö insātēv, minlūönö,* kumnyah elmat, lanīnö, ranāinyngö, töhūlökūö tanāinyö, linā-alkūö, inköhngen, inrēvngö, 21 tanāilö, mihiyōi-aṅ, mahaṙamngölōnre hēk nup tahëng inrē tötlanöökö, hōten yīö Chin hööngöre tö në ötlanöökö sā inlahen Chu in nuk urěh, yip tarik töng iṙūöhen nö la-evṙen tö në ngatī la-en, öt aminuvö min cha-a tö ngam Pūlngö ngam Tēv.
22 Në pöri ṙòng ngam töhet kumlēḵ, hanangenlōn, ṙanamölōn, lanāmö, manööyö, miṙēḵlōn, lanöökö, ṙinatö-ellōn, 23 ṙanëmen, ṙināpöre. Öt ōt chööngö lama-al në ṙô. 24 Ngaich cha-a yip aṅ in Kristū Yēsū nö fëlngen ngam alahare tö nup töchōich lōn e inrē.
25 Yěn asā kuilōn ngam töhet kumlēḵ ngam tinrīken hī ngaich ta-a töi irūöhen öi lök in ngih töchip talöökö ngam töhet kumlēḵ. 26 Ui aṅhavin tö ngam tanāilölōn, ui rēhěn ṙūöhöl alaha höö im kinsālö hēk ui kö rāinyngö tö höö.