Innëtö chitri Pītör
1 Sīmōn Pītör, ngam mahalanṙen hēk tanīnöṙô Yēsū Kristū, lamöö in yip tarik ön ngih chitri yip tö sā hī nö teūngen tö ngam töpōiṙāi ṙinatö-ellōn nö löktö im lanöökö ngam Tēv hī hēk löktö in ngam mahayööken hī Yēsū Kristū.
2 Ngih ön havëkö chu, tö yīö öi höng iṙūöhen kēḵ ngam tölöng mikah elmatre tö inlahen ngam Tēv hēk tö inlahen ngam Mā hī Yēsū, hòṅ yīö hēk īnu tö ngam tökiröng miṙēḵlōn hēk teūngen inrē yī-ö tö ngam lanāmö. 3 Pò ngam Tēv nö kē-ěkūö hī tö në taṙòkhöre chehen nö löktö im minhôiṅyöre, nup tötṙanāngen nö in hī asā inlahen hī ha-öiny ngam Tēv. Ṙën ayī-ö öi teūngen tö në chehen, pò hī öi kēḵ ngam tölöng mikah elmatre tö inlahen ngam Tēv ngam mahavëten hī nö löktö im nööinyöre hēk lanöököre. 4 Kūö ngih nööinyö hēk lanöökö anga-aṅ nö kilēḵngôre nö in hī tö minë töpōiṙāi hēk töt insā-av kinlēḵngô, hòṅ yīö öi löktö in në kinlēḵngô öi sā ò öi öt maneūken, ṙën anga-aṅ nö kilēḵngôre nö in hī, pò hī ngaich öi ṙānyu öi ṙā-ang in ngih töt kanôluṙô takô panam, nup lamöktö in nup tötlöng kuilōn.
5 Angū-ö lāinyngen yīö öi pītnyöre ṙūöhlö ngam lanöökö holtö ngam ṙinatö-ellōnre, mikah elmat holtö ngam lanöökö, 6 ṙināpöre holtö ngam mikah elmat, manööyö holtö ngam ṙināpöre, nööinyö ngam Tēv holtö ngam manööyö, 7 hangenlōn tö më prötör holre tö ngam nööinyö ngam Tēv ngaich ṙūöhlö ngam hanangenlōn nö holre tö ngam hanangenlōnre tö më prötör. 8 Yēḵ yīö aṅhavin tö ngih tinrīken hēk hòṅ sīöplöre angū-ö nö in yīö ngaich kamëken ngam tölöng min yī-ö mikah elmatre tö inlahen ngam Mā hī Yēsū Kristū öi kētö ṙòngre hēk öt kaheūkö öi tö ṙahata.*
9 Ngòh tarik töt aṅhavin tö në tinrīken, tötmeuk anga-aṅ ngaich tilupngö matre* anga-aṅ pön sōḵ nö meuk ngam hanātö hēk vaichngö inrē töre nö ahetlöng nö ṙā-ang in minë tökööl minë kahëken ò sin ik lā urěh. 10 Lökten kahōlö, mā-ainyre yin hēk öi kalēḵ alaha öi la-evṙen, hòṅ yīö öi tö köp öi töhō-ovö öi im invëtöre hēk kintöllöre, yēḵ yīö min öi iṙūöhen öi in në taṙòkhöre ngaich öthō min yī-ö öi öt teungten. 11 Rö-ö pön töt insā-av min ngam inlahen yīö kuhēthötre el ngam Pūlngö ngam Mā hī hēk ngam mahayööken hī Yēsū Kristū ngam töng örheūheu nö köp.
12 Angū-ö lāinyngen chu öich kēḵ fëslare tö chu öich örheūheu fēḵlen yīö tö në ṙô, rö-ö yin pöi akahalōn tö u hēk köptī inrē tö ngam kanô-en ngam haköp yīö. 13 Hanöng sā chu öich ṙömöng el ngih inrūkui,* tölöng angū-ö nö in chu tö chu höng iṙūöhen fēḵlen yīö tö në ṙô, hòṅ chu öich hangönkö alaha yīö. 14 Pò chu akahalōn tö ngih inrūkuire nö veutten min öp ṙinòngngö e, sā inmeuknyö e nö in chu tö ngam Mā hī Yēsū Kristū. 15 Lökten chin mā-ainyre örheūheu fēḵlen yīö, hòṅ yīö min öi kahngenre fē-ělre tö* në ṙô unôichrit chanuhu chu.
16 Hē ih öi vë-eny nang yīö tö inlahen ngam minhôiyö hēk yanīhi ngam Mā Yēsū Kristū ngaich höng öt hayönglenre īhö öi in minë tövīka inlahen tö minyôiny istōri, pò ih öi tö kôtamat öi meuk ngam töt insā-av nööinyö ò. 17 Lökten anga-aṅ nö teūngen tö ngam minlēḵṙen hēk ineū-eure nö löktö in ngam Tēv ngam Yöng hī, hē ngam tökiröng mahayöng nö ngö ṙô nö in ò:* “Hanangenlōn chu ön ngòh nö Kūön chu in ò chin ṙamölōn takô.” 18 Heūṅ, hang ngih ṙô ò īhö hē e nö löktö el halīöngö hē ih öi hol ò öi ikui öp töhet rôngö.
19 Ngatī inlahen īhö hēk öi ngönlöre ṙinatö-ellōn öi in minë tö-eūka (hanöng saha ngam minlīlö ngam sakāmö nö öl ngaich öt meutlö ngam taneūsömat ngam sakāmö) ngaich tövai ngam inlahen yīö iṙūöhen öi chumkūöṙen tö u, sā ṙēngen öp töhūkūö ëāṅvö el sinngūlö, ngam tö ngö manah yang angū-ö nö ellōn yīö. 20 Lökten yī-ö urěh akahalōn tö nup töng sitih tö-eūka imat ngam līpöre nö rö-ö anū-ö nö asā nup töng mufē elkuilōn ngòh tarik. 21 Pön öt hěng tö-eūka lamöktö i kuilōn tarik, halöinyka ellōn* pöri yik tarik tö ngam töhet kumlēḵ nö ṙò-òv nö löktö in ngam Tēv.