Raneh Chitri Timôtī
1 Chū-ö Pôl öich tö hěngtak tanīnöṙô Kristū Yēsū öich löktö i chööngö ngam Tēv ngam Mahayööken hī hēk Kristū Yēsū ngam maheūṅkkö hī, 2 i minë-eny ngam hanangenlōn chu Timôtī* ngam tökô-en kūön chu im ṙinatö-ellōn.
Teūngen man yēḵ tö ngam tökiröng miṙēḵlōn, neūkölōn hēk lanāmö öm löktö im Yöng hī ngam Tēv hēk löktö im Mā hī Kristū Yēsū.
3 Hē Chu lang öich chuh Maketònī ngaich halēnngen meh Chū-ö höngngöh i Efisös, ṙūöhöl alaha meh chin hēk töngamuh öm vëkö ṙô yip tarik tö harīkngöre ṙô nö haköphöti nö umuh, ngaich kētö chööngö öm in cha nö un ngatī inlahen, 4 un rēhěn nö chumkūöṙen tö nup tö minyôiny istōri hēk tumkölchap yik muvöhngö, öt yanööluṙen in öi löktö in u pön höng ṙinūöhlö mufē ellōn anū-ö ngaich öt sā minë halēnlö ngam Tēv anū-ö ngam tö nôltö nö im ṙinatö-ellōn. 5 Kô-en nö angū-ö chö-öiny ngih inlēnö* hī öi hëtö ellōn hēk hëtö elkuilōn hēk asā ngam ṙinatö-ellōn öi hangenlōn, ngam töt aṅhavin tö innyatkö elmat. 6 Pōyen yip tölō-ongkūö tarik nö in minë ṙô töt yöölen tī. 7 Höng hòṅ vī-ire cha-a nö mahaköpten ngam chööngö, öt akaha elnang pöri tö nup ṙô re hēk nup ṙô tö kumlēlöng tö cha, ötrēhěn cha-a nö akaha elnang tö u.
8 Akahakūö in tö ngam Chööngö nö tölöök, höng hòṅ lööngö inlahen pöri öi hāngö e, 9 pön rö-ö angū-ö nö chö-öinytö yip tölöök tarik, tövī-i pöri angū-ö nö chö-öinytö yip tarik tötlöök hēk lama-al, töt lamöklōn ngam Tēv hēk tököölö fālen, yip töt chiplö,* tö minūö elmat tö minë töhet ṙô, famëlngö yöngre tö kikōnyö hēk tö kikānö, famëlhānga, 10 chamô-òṅkānö,* chamô-òṅ kikōnyö nöng kikōnyö, mö kitnëp, tö minyôiny-aṅ, öt mahateungngö kinlēḵngôre hēk nup taṙòkhöre tö ngatī la-en nup lama-al minë tö yöölen* tī inköphöti 11 ngih tö yöölen inköphöti nö lamöktö im Tēv ṙanamlōn, ngam töt insā-av tölöök inhānga ngam la-en chu tökētu öich ahangken e.
12 Ha-öiny tī ngam Mā hī chin Kristū Yēsū ngam kamëtö kumlēḵ chu, pò ò nö ṙinatu-ellōn nö in chu ngaich vīlen chu öich mahalanṙen ò, 13 kô-en chin sin öich töt lamëḵken ngam Tēv hēk tö tainy inrē, sön pöri anga-aṅ nö hameuktö ngam neūkölōnre nö in chu, pò chu öich öt tölngenre öich ngatī inlahen hēk öt aṅhavin inrē chū-ö sin tö ngam ṙinatö-ellōn. 14 Kirööngen pöri ngam tökiröng miṙēḵlōn ngam Mā hī nö ikui chu, hěnghöre ṙatö-ellōnre chū-ö in Kristū Yēsū hēk meuk ngam hanangenlōn ò inrē. 15 Mihôiṅ in ṙatö-ellōnre in ngih ṙô hēk hō-en e inrē tö Kristū Yēsū nö yih nö ing panam nö mahayööken yip tököölö fālen, chū-ö chin tö mötlö ṙôken fālen i tumtak cha. 16 Sön pöri chū-ö öich teūngen tö ngam neūkölōn, hòn hameuktu ngam manööyö Kristū Yēsū nö löktö in ngòh tökirööngen fālen, ngaich inchō-okūö cha chū-ö nö ṙòkhöre yip tö hòṅ teūngen tö ngam nômö tö örheūheu-aṅ ngaich ṙatö-ellōnre min nö in ò.
17 Örheūheu an yēḵ nö ha-ööinyö ngam rācha tö örheūheu-aṅ, töt kinpahavö, töt maneūken hēk milēḵṙen tö ngam töng hěngtak Tēv. Āmen.
18 Më-eṅ kūön chu Timôtī, minë inlahen meh tö-eūka chumkūöṙen tö u, kētö inlēnö* meh chin, hòṅ meh iṙūöhen kiyung im tölöök kinyūngö, 19 hēk köptī tö ngam ṙinatö-ellōn hēk ha-et elkuilōnre ngam töng fēti tö yip rīkre tarik, lökten ngam chōng ṙinatö-ellōn cha nö laköliyö. 20 Ngatī inlahen nan nā tarik nā Himenīös nā Aleksantör, lökten chin öich hökngen cha nö eltī ngam Satān, hòṅ cha nö haköplu nö un hēk min nö ötlēḵken ngam Tēv.