I minë-eny Kòlòsi

1 Chū-ö Pôl, lamöktö in ngam kuilōn ngam Tēv öich tanīnöṙô Kristū Yēsū hēk tö ngam holmaneuk hī Timôtī, 2 kūichtö chitri yip töhet holmaneuk hī aṅ Kòlòsi hēk yip prötör chūök ṙinatö-ellōn yip mi-im hinëngö nö in Kristū:

Teūngen yin yēḵ tö ngam tökiröng miṙēḵlōn hēk lanāmö ngam lamöktö im Yöng hī ngam Tēv.

3 Yēḵ ih öi vë-elkui yīö ngaich örheūheu īhö öi kētö nööinyö ngam Tēv ngam Yöng ngam Mā hī Yēsū Kristū, 4 pò ih öi hang inlahen ngam ṙinatö-ellōn yīö in Kristū Yēsū hēk hāngö yīö inrē öi kirööngen hanangenlōn tö yip taṙòkhöre töhet tarik, 5 kūö ngam mineūka an, ngam tö hòṅ teungtakūö nö el halīöngö nö chö-öinyten tö yīö, hē e yī-ö öi hang inlahen ngih mineūka, hē yīö öi teūngen tö ngam kanô-en ngam tölöök inhānga, 6 ngam tö teungta ngaich nö in yīö, ṙônguvö ön ngih tölöök inhānga nö keuheūtngöre chūök ing panam hēk ṙūöhölre ṙôken inrē, ngatī inlahen angū-ö nö elhôi yīö ik ṙētak, hēten tö yīö öi hang inlahen ngam tökô-en tökiröng miṙēḵlōn ngam Tēv hēk lööngö mikahkūö inrē tö e. 7 Angū-ö ngih haköp yīö in ngam hanangenlōn ih töla-evṙen Epafaras, ngam lamöktö in ih nö tö hěngtak nö tökô-en mahalanṙen Kristū. 8 Anga-aṅ vamë-eny nang ih tö inlahen ngam töhet kumlēḵ nö ṙūöhlö ngam hanangenlōn nö in yīö.

9 Angū-ö ngih lāinyngen ih öi öt ṙāngenre vë-elkui yīö hēk öt ṙākenre inrē havë-a tö yīö öi holtö nup taṙòkhöre mikah hēk mikah elmat lamöktö in ngam töhet kumlēḵ öi tööḵlö tö ngam tölöng mikah elmat inlahen ngam kuilōn ò, hēten tö ih öi hang inlahen ngam hanangenlōn hēk ṙinatö-ellōn yīö. 10 Hòṅ ngam tinrīken yīö nö sā inlahen yip tarik Yāvē,* hòṅ yīö öi haṙamlōn ò inup tökeuheūttöre ngaich la-evṙen tö nup tölöök öi ṙūöhlö ṙôken ṙòng nup tölöök la-enre hēk ṙūöhlö ngam tökô-en mikah elmatre tö inlahen ngam Tēv. 11 Ngaich iṙūöhen yī-ö ngönlöre löktö im minhôiṅyö ngam Tēv ngam tö tööḵlö tö ineū-eu, hòṅ yīö öi köp öi holtö ṙanamlōnre hēk manööyöre inrē. 12 Ngaich kētö nööinyö ngam Yöng ngam vamīten yīö öi holten yip töhet tarik öi teūngen tö aminre, ngam mi-im hanātö.

13 Ṙānyen hī anga-aṅ öi ṙā-ang el ngam inyööngö tö ngam sinngūlö ngaich kēhöt hī nö el ngam Pūlngö ngam Kūönre ngam hanangenlōn ò, 14 ngaich löktö im ṙāi ṙinānyi anga-aṅ nö ṙānyen hī, ngam tö ngö, aṙēlen nup tökööl hī. 15 Nyat ngam tötmeūkö Tēv anga-aṅ hēk lanòh në taṙòkhöre tövīlöng; 16 pön löktö in ò në taṙòkhöre nö vīlöng el halīöngö hēk ing panam, tömeūkö, tötmeūkö hēk pòrô chūök anūichö rācha, inyööngö, mahayöng hēk tö chööngūvö, ṙòkhöre në chehen nö löktö in ò ngaich chö-öinyten tö ò nö vīlöng. 17 Anga-aṅ mu-urěh tö në taṙòkhöre chehen ngaich löktö in ò në taṙòkhöre chehen nö yih 18 ngaich anga-aṅ kui ngam alaha, ngam māṅ. Anga-aṅ ranehlö në taṙòkhöre chehen, anga-aṅ inrē lanòh nö tö hachohlöng nö ṙā-ang in yip tökapah, hòṅ ò nö kaheūkö nö raneh në taṙòkhöre chehen, 19 pön angū-ö tölöök nö imat ngam Tēv tö nup tökeuheūttöre hanëtö nö iyöng nö in ò, 20 ngaich löktö in ò tī anga-aṅ nö halāmtö nup taṙòkhöre chehen nö in re, pòrô nup chehen ing panam hēk el halīöngö, löktö im mahām tī ngam Tēv nö vīten ngam lanāmö ngam tökitaknyu tö Kristū nö in ngam chōn inkihten.*

21 Pò yīö sin misī tö marôvat tö ngam Tēv hēk tö kunyaha elmat inrē tö ò, pò yīö öi höng fēkö inlahen nup tötlöök la-en, 22 ngaich pöri ngam Tēv nö löktö in ngam kinpaha ò tī ngam kamëngen ngam alahare nö tökētu, halāmtöre nö in yīö, hòṅ ò nö kēten yīö nö ikūöre tī öi töhet, töt pitōtu hēk töt fāluṙen. 23 Tötṙānangen pöri ngam inlahen yīö öi chö-öinyten tö e öi hòṅ köp im ṙinatö-ellōn hēk köptī tö ngam machööḵlö hēk hangönöre, ngaich ui ṙāngen ngam maheūṅkköre ngam ahang yīö öi löktö in ngam tölöök inhānga hēk ngam ahang yīö inrē nö ngaich nö keuheūtngöre chūök ikūö ngih panam. Chū-ö Pôl öich vamītöre mahalanṙen ngih tölöök inhānga.

24 Ṙamölōn Chin ngaich töngamuh öich hakihtuṙen töpòkūö yīö ngaich kūö Chu öich pak alaha Kristū, lökten öich hòṅ la-al minë kanihngen minë tö hòṅ ōttit min, la-al u chin nö ṙòkhöre töpòkūö ngam alaha Kristū, ngam māṅ. 25 Asā ngam la-en taneūngen Chu lamöktö in ngam Tēv öich yōmkūö chehen öich vītöre mahalanṙen ngam māṅ töpòkūö yīö, hòṅ chu öich keuheūttö inlahenre öich ahangken ngam ṙô ngam Tēv, 26 ngam töhet töt mikahkūö sin ngam töhayūni in nuk tö urěhangen ṙētak* hēk tumkölchap ngaich pöri angū-ö töngamuh nö hameuknyu nö in yip töhet tarik ngam Tēv, 27 tölöök angū-ö nö imat ngam Tēv nö hameuknyö ngam töt insā-av kanôlò ngih töhet töt mikahkūö sin nö in cha ngam tövënyu nö in yip tahëng pumnāmö, anga-aṅ an ngòh Kristū ngam mi-im hinëngö nö in yīö ngam hol yīö min öi meūkkö ngam ineū-eure. 28 Anga-aṅ ön ngòh tö ahangka inlahen tö ih tö ngö manah, tö ih öi holtö mikah hēk mikah elmatre öi haköphöti, hòṅ ih öi kēten cha nö ikūö ngam Tēv nö tö sööḵngö* nö tarik nö im hinëngö nö in Kristū. 29 Chö-öinytö inteungngö ngih la-en chin öich ma-āinyre kalēḵ alaha ngaich löktö im kumlēḵ Chū-ö öich teungten, ngam töla-evṙen nö in chu.