I minë-eny Yāköp
3 Kahōlö, un ṙōltak in hī vamītöre nö mahaköphöti, pò hī akahalōn tö hī min kirööngen taneūngen tö sāchare. 2 Pò hī ṙòkhöre öi ṙōlheuh öi vaichköre inlahen,* yěn ōt öre tarik töt vāichköre inlahen nö im ṙinò-òvö ngaich töhet anga-aṅ hēk töheuveū inrē nö ṙap* ngam alahare nö keuheūtlöre. 3 Vītö inkālkūö nup kōra in ṙung ayī-ö hòṅ u nö hangṙô hī, lökten in u inrē ayī-ö mihôiṅ öi ṙap ngam alaha u nö keuheūtlöre. 4 Yěi fēkö inlahen në chōng inrē! Pòrô anū-ö nö kiröng hēk löktö i kumlēḵ kuföt nö kiröönngöre, sön ngam chumvēkūö chōng nöng löktö in öp kun kanehritlö ò nö chuvēkūö ò nö ip töng kū-ö lōn ò.
5 Ngatī ṙēngen an ngam litāk inrē nö tö kun kun nö tum mupākö ngih alaha hī. Sön angū-ö nö kirööngen ṙô nö eū-eure. Yěh meuk! mihôiṅ ön ngih töng kun kun tameūiyö nö ṙāpngö tī tö ngam el inchōnngö nö keuheūtngöre. 6 Tameūiyö an inrē ngam litāk ngaich chūök ngam ötlanöökö ngih litāk hī nö i tūmö pak ngam alaha hī, pò e nö keuheūtngöre tī tö ngam alaha hī nö ötlöök ngaich föngtökūö ngam tinrīken ngòh tarik nö keuheūtngöre tī nö sā kūö tameūiyö ngam Kehenna* nö ṙāpngö tī. 7 Mihôiṅ nun nö harūkö në töṙōlkangen töṙeūla aṅ elinchōn, chehechōn, ṙameul el tumlat hēk el mai inrē ngaich kô-en ṙung yip tarik nö harūkö u ngaich pilam anū-ö. 8 Öt hěngtak pöri tarik tökô nö ṙap ngam litāk, pò e nö töchökhukūö hēk tötṙanāpen, ngam tö tööḵlö tö ngam tökapahav kūö tī pòisön. 9 Löktö in e ayī-ö öi ha-öiny ngam Yöngre Yāvē* hēk löktö in e inrē öi ṙūttökui yip tarik “yip tö sā vinī-i ngam Tēv.” 10 Höng löknyö in ngam töhěng elvāng ngam ineū-eu hēk ṙinūttökui inrē.
Kahōlö, ötkô in öi ngatī inlahen. 11 Mihôiṅ öng ngam tökuchik mak hēk tö haṙeihu mak nöng hēngö chūök nö hëmlö? 12 Kahōlö, mihôiṅ öng ngam chōn anychīr nö ṙôngu tö ṙòng òliv hēk mihôiṅ hòng ngam chōn vāin nö ṙôngu tö ṙòng anychīr? Hö-ö, ngatī ṙēngen ngam tö haṙeihu mak hēk tökuchik mak nö ötkô nö hēngö chūök nö hëmlö.
13 Achīö öp in yīö tö akaha hēk tö akaha elmat? Ngòh tö īnu hökngen ò nö löktö in minë tövai tinrīkenre nö hameukhöti hēk la-evṙen nö asā ngam inyāichngöre lamöktö in ngam mikah. 14 Yěn ōt pöri in yīö tö aṅhav ellōn tö ngam ranāinyngö hēk linā-alkūö* ngaich un eū-eure anga-aṅ hēk un minyôiny-aṅ nö la-al ngam kanô-en. 15 Rö-ö ön ngih mikah nö lamöktö el halīöngö, pön aṅ ing panam, aṅ i töṙeūla hēk aṅ im Satān inrē. 16 Pön öp chūök ngam ranāinyngö hēk linā-alkūö,* in e ngam tinṙōlen hēk nup töṙōlkangen ötlanöökö inrē.
17 Ngam mikah pöri lamöktö el halīöngö, urěh angū-ö nö töhet hēk vamī ngam lanāmö, tö milēḵṙen, hööngöre nö hang chööngö, tö aṙē-ělōn hēk tö tööḵlö tö minë tölöök la-en, öt īnu tö intölten hēk innyatkö elmat inrē. 18 Ṙôngu ngam lanöökö yēḵ e nö teūichtu el ṙētak ngam lanāmö nö chö-öinyten tö cha yip vamī ngam lanāmö.