I minë-eny Rōma

9 Kô-en ṙô Chin öich in Kristū, öt minyôny aṅ Chin, sā ngam elkuilōn chu nö hol ngam töhet kumlēḵ nö vë-eny 2 töchu öich kirööngen miṙivlōn hēk chanökö ellōn inrē ngam tö ötrēhěn nö ṙāḵkenre. 3 Ĕhten öre öich ichūök yip Yahūti prötör yip hanöngkisānö Chu öich kaheūkö öich tötkôlò öich tarik yip tö maṙôvat ngaich tö Kristū, 4 aṅ Israel yin, vē tö kē-ě nö sā inlahen kūön, cha-a yin töhapōilöng. Tökilē-ěyö cha-a hēk tö kē-ěvkūö tö ngam minlēḵken im Chööngö hēk tö minë töhet la-en hēk minë kinlēḵngô inrē. 5 Mi-in cha yip inrē muvöhngö hī misī ngaich löknyö im mikūönö cha ang Kristū nö yih. Ngam Tēv lāmātulöng tö hī öi ṙòkhöre, örheūheu ön yēḵ nö ha-öinyö. Āmen.

6 Öt tö ngö manah pöri angū-ö tö ngam ṙô ngam Tēv nö öt teungtakūö. Pön ṙòkhöre yip tarik lamöknyö in ngam mikūönö Israel nö ötkô-en nö aṅ “Israel.” 7 Ötrēhěn cha-a nö kūöre nö kūön* Aprahām nö ṙòkhöre nö tökô-en nö kūön ò, sā kinūichngö e pöri nö ngö, “Ngam tö kilē-ěyö nö kūön* meh löknyö in Isāk öp min nö yih.” 8 Ngam manah e tö yip kūön Aprahām lamöknyö in yip hanöngkisānö ò, töt kô-en cha-a nö kūön ngam Tēv, pön yip ma-asā ngam kinlēḵngô ngam Tēv nö kūön ò, cha-a yip tö kaheūkö nö kūön* Aprahām. 9 Pò ngam Tēv nö kilēḵngôre misī nö ngö ṙô: “Yih Chin min ip ih samyeūheu i ngih ṙētak ngaich hěngtak min öp kikōnyö kūön Sëra.” 10 Rö-ö pöri ngih kinlēḵngô nöng ik ṙētak, pön ik sā Repëka nö puyōsö nö löktö in ök muvöhngö hī Isāk ngaich tumnëtö nak nyīö tö pirūka tö ò, 11 öl hē e minā nyīö nö fötnyu ngaich hē e ngam kinlēḵngô ik ṙētak, ötrēhěn cha-a nö kēkö tölöök hēk töchōich la-en, hòṅ ngam kintöllö nö asā ngam kuilōn ngam Tēv, rö-ö nö asā minë la-en ngòh tarik, katöllen cha ön ngam Tēv yip Lōn ò, 12 ngö ṙô misī ngam Tēv nö in Repëka: “Mameukṙen ngam manāngö öp min maṙöinylö.” 13 Sā kinūichngö e inrē nö ngö: “Hangenlōn Chin tö Yāköp, kunyaha elmat pöri tö Isô.”

14 Sitih ṙô öi pökeh? Ötlöngö tī öng ngam Tēv yěn akah fālen? Hö-ö, öt ngatī! 15 Lökten anga-aṅ nö ngö ṙô nö in Môsös: “Öp chūök Chu öich hòṅ hameuktö ngam miṙēḵlōnre in ò Chū-ö öich hameuktö ngam miṙēḵlōnre ngaich öp chūök Chu öich hòṅ hameuktö neūkölōnre in ò Chū-ö öich hameuktö neūkölōnre.” 16 Katöllen chīö öng min ngam Tēv, yěn ötrēhěn anga-aṅ nö hayönglenre nö in nup kuilōn tarik, ötrēhěn nö in nup inlahen cha nö kalēḵ alaha nö la-evṙen,* höng ngam Tēv pöri tö mihôiṅ nö katöllö öp lōnre ngam mahameuktö miṙēḵlōnre. 17 Lökten ön ngam töhet līpöre nö ngö ṙô nö ṙôtö inlahen Fërō: “Ṙën Chin öich höng hökngen meh öm aṅ, hòṅ chu öich hameuktö ngam kumlēḵre, hòṅ ngam minë-eny chu nö ahangka nö ikūö në taṙòkhöre panam.” 18 Lökten, öp chūök lōn ngam Tēv, in ò anga-aṅ nö hameuktö miṙēḵlōnre, öp chūök lōn ò pöri ngaich hökngen ò anga-aṅ nö ngëḵ-eṅ ellōn.

19 Ngö ṙô pöri më-eṅ öm in chu: “Ngaich kūö yòh anga-aṅ nöng ṙömöng kaheuk më tarik nö tököölö fālen? Achīö öp tökô nö la-al ngam kuilōn ò?” 20 Ō më-eṅ tarik, achīö öm më-eṅ mahavalvahre öm sapṙô ngam Tēv? Mihôiṅ ön në chehen nö ngö ṙô nö in yip vamī-ire: “Kūö yòh öm ngatī tī vī-i chu?” 21 Öt kanahnguṙen öng ngòh vamī tanīöyö nö im tilin nö hēngö vahī anga-aṅ tö tanīöyö nö im tö hěng tilin nö vī tö hěng tanīönyö, nö tö yūsö nö in nup tö milēḵkaṙen la-en hēk vī öp tahëng nö töng örheūheu yinūsö nö in nup la-en?* 22 Lōnu ön inrē ngam Tēv nö hameuktö ngam tanāinyöre hēk hameuktö ngam kumlēḵre nö in yip tötlöök, sön pöri anga-aṅ nö īnu töm manööyö ngaich ṙāpöre anga-aṅ nö ikui më tötlöök yip tö hòṅ ahetiyö min ngam tö ngö minë tanīöyö ngam tanāinyö ò. 23 Ṙën anga-aṅ nö ngatī inlahen hòṅ ò nö hameuktö ngam tökiröng inpōilöre nö in yip tanīöyö miṙēḵlōn, yip tö urěhangen inlēnlö misī tö ò nö teūngen tö ngam inpōilö. 24 Tö ngö manah, in hī, yip töng rö-ö nö havëka nö in yip Yahūti, pön in yip tahëng mihëṅṙö tarik inrē. 25 Ngatī inlahen angū-ö sā ṙô ò nö in ök līpöre Hōsī nö ngö ṙô: “Vē töt tarik chu misī, ‘tarik chu,’ invëka min cha-a, vē töt hanangenlōn chu misī, ‘hanangenlōn chu,’ invëka min cha-a, 26 ngaich öp chūök cha misī nö vënyu nang tö ngih ṙô nö ngö, ‘Rö-ö yin yī-ö tarik chu,’ in e min cha-a nö kūön ngam tö aṅ Tēv invëka.”

27 Rö-ö nöng angū-ö, tön ngö ṙô inrē Isayā nö vë-eny inlahen yik Israel: “Öp tö yòh ṙôken më kūön Israel nö öt kanṙeūken nö sā ṙôken kuyāyö ngam mai, höng yip chööḵ pöri min tarik tö teūngen tö inyöökenre. 28 Pò Yāvē* min nö kēḵ kinṙötngöre nö ing panam ngaich veūten min ngih la-en nö keuheūten.” 29 Sā inlahen Isayā nö urěhngöre ṙô nö vë-eny nö ngö ṙô: “Yēḵ ngam Tēv yik tömaṙôngö ang Yāvē* öre nöng ṙāngen yip kūön hī nö öt aṅ ngaich sā inlahen yik aṅ Sôtöm öre ayī-ö hēk höng sā inlahen yik aṅ Kômòra inrē.”

30 Sitih ṙô öi pökeh? Pôrò vē tahëng mihëṅṙö tarik nö öt kumlē-ěv alaha nö sölta nö im lanöökö, sön pöri ngam Tēv nö kaheūkö cha nö tölöök, pò cha nö īnu töm ṙinatö-ellōn, 31 Ngaich pöri më Israel nö ma-āinyre nö hòṅ sölta nö im lanöökö nö lök im chööngö, sön pöri cha-a nö öt sölta nö asā ngam chööngö. 32 Asūp lāinyngen cha misī? Pò cha nö öt löktö im ṙinatö-ellōnre, löktö in minë la-enre pöri nö hòṅ sölta nö kaheūkö nö im lanöökö, sōngtöre kūö cha-a nö im “ihong tö fukngö tī,” 33 Sā kinūichngö e nö ngö: “Yěh meuk! I Siyôn tī chin öich ṙāḵtö ngam ihong tö sōngtörekūö tī hēk ngam ihong inrē lökngö nup chanökö, ngòh ṙamatö-ellōnre pöri nö in e, öt haṙivlōn min anga-aṅ.”