Raneh chitri Yôhan
1 Kūichtö inlahen ò in öi in yīö ngam ṙô ngam nômö ngam lamöktökūö raneh hēk ngam tö hāngö ṙô tö ih, kôtamat inrē īhö öi meuk, ngam chumkūöṙen ih öi ngëichken ò hēk kôta tī inrē īhö öi lūölken ò, 2 (heūṅ, hameuknyu ön ngam nômö tö örheūheu-aṅ nö in ih ngaich meūkö e īhö ngaich eūken e īhö hēk vënyö inlahen e öi in yīö, lamöktö in ngam Yöng ön ngih nômö tö örheūheu-aṅ ngaich hameuknyu angū-ö nö in ih) 3 ngaich ngam tö meūkö tö ih hēk tö hāngö, angū-ö tö vënyu inlahen tö ih nö in yīö, hòṅ yīö inrē yī-ö hanôltöre in ih. Ngaich in ngam Yöng ngih innôlö ih hēk in ngam Kūön ò inrē ang Yēsū Kristū. 4 Ngaich kūichten në ṙô īhö öi in yīö, hòṅ ngam ṙanamölōn ih nö hateūngiyö.
5 Ngam inhānga ahang ih öi in ò ngaich vënyen e īhö nö in yīö, angū-ö ön ngih: Hanātö an ngam Tēv ngaich öt rahëichyen ngam sinngūlö nö in ò. 6 Yēḵ ih öi ngö ṙô, “Hamòlṙen ò in īhö,” ngaich yěi höng sönngenre pöri öi lök el ngam sinngūlö ngaich tö minyôny-aṅ min īhö hēk öt la-evṙen öi asā ngam kanô-en. 7 Yēḵ hī pöri öi lök el ngam hanātö öi sā ò anga-aṅ nö el ngam hanātö ngaich hanôltöre ayī-ö öi in höö ngaich ngam mahām ngam Kūön ò Yēsū nö söichlen minë taṙòkhöre tökööl hī nö ahetlen hī.
8 Yēḵ hī öi ngö ṙô, “Hö-ö in aṅhavin tö ngam tökööl,” ngaich töng mahachīlöre min ayī-ö hēk öt tö aṅhavin ayī-ö töm kanô-en. 9 Tökô-en hēk tö kanô-envö an ngam Tēv, lökten yēḵ hī öi hō-en nup tököölre ngaich öthō anga-aṅ nö öt aṙēlen nup tökööl hī. 10 Yēḵ hī öi ngö ṙô, “Öt köölö fālen in īhö,” ngaich kaheūkö ò min ayī-ö nö tö minyôny-aṅ ngaich töt īnu min ayī-ö tö ngam ṙô ò.