Innëtö chitri Pītör
3 Kahōlö, kūich ngih innëtö Chin chitri yīö, sā inlahen ök chitri kahūich Chu urěh ngatī chin inrē fēḵlen yīö tö në ṙô öich in ngih chitri hòṅ chu öich ṙūöhöl alaha yīö öi heuveū-en öi yūs ngam tövai mufēre, 2 yěi köpölōn tö nup ṙô tö urěhangen vinënyi tö yik töhet pròfět ngaich köplōn tö nuk chööngö ngam Mā hī hēk Mahayööken hī nuk kahëtö ò nö in yik tanīnöṙô yīö. 3 Urěh pöri yī-ö akahalōn tö yip tö miyëḵ ṙô min nö yih ip manā-aṅ sakāmö, yip töng lamök in nup kuilōnre min 4 nö ngö ṙô; “Kilēḵngôre misī anga-aṅ töre min nö hameuktöre, isuh pöri anga-aṅ? Ngaich yik muvöhngö ih nö kapah ngaich höng hěngren inlahen në taṙòkhöre nö sā vinīlö u ik raneh.”
5 Tölngenre cha-a nö öt chumkūöṙen tö ngih tökô-en, tö ngam halīöngö nö ha-ëhelen nö ik ṙētak nö löktö i ṙô ngam Tēv ngaich vīlöre ngam tumlat nö lātulöng tö ngam mak ngaich köp ngam panam nö elhôi ngam mak, 6 ngaich löktö in e ök ṙanööingö ngam panam ik ṙētak hēk ahetngen e. 7 Lökten in ngih ṙô ngam Tēv pöri nö halēniṙen ngam tameūiyö nö haṙāpngen ngam halīöngö töngamuh hēk töng panam ngaich halēniṙen angū-ö nö söl ip sakāmö kinṙôka hēk sakāmö inhetngö yip tarik töt maha-öiny ngam Tēv.
8 Yī-ö pöri tö hanghuṙen kahōlö, uh yin vāichngö tö ngam töhěng sumkam nö sā öp tököinyu samyeūheu nö imat Yāvē* ngaich ngam tököinyu samyeūheu nö sā ngam töng hěng sumkam. 9 Öt ahāṅkenre ang Yāvē* nö hateungngö ngam kilēḵngôre nö sā mufē yip rīkre tarik, hameuktö manööyöre pöri anga-aṅ nö in yīö, pön öt lōnu tö tö hěnghang tak tarik nö ahetiyö, hōten yīö pöri öiṙòkhöre öi teūngen tö ṙētakre öi havöötö ellōnre. 10 Sā yanīhi öp mu-ulāiya pöri min ngam sakāmö Yāvē,* hē e min ngam halīöngö nö chuhngöre nö holtö ṙòktôre ngaich yëngö min nup chehen el halīöngö hēk ing panam tökūö ngam ṙanāchö ngaich hameuknyu min ngam panam hēk tö nup la-en tö kēkaṙen nö ikūö e.
11 Lökten yēḵ në taṙòkhöre chehen nö ngatī inlahen nö yëngö ngaich fē-a yī-ö tö yīö öi tö hòṅ sitih inlahen öi tarik töngamuh! Tö hòṅ hëtö tinrīken yī-ö, hòṅ la-evṙen inrē yī-ö tö minë la-en maha-öiny ngam Tēv 12 hēk hòṅ hökkö yanīhi ngam sakāmö Yāvē* ngaich hòṅ örheūheu öi chumkūöṙen* tö ngam sakāmö nö veutta yanīhi ngaich kūö e angū-ö sakāmö min nö paṙööyi ngam halīöngö ngaich minë chehen u nö yëngö tökūö kumlēḵ ṙanāichöre! 13 Asā ngam kinlēḵngô ngam Tēv pöri ayī-ö öi hökkö öp tufömngöre halīöngö hēk tufömngöre panam ngam chūök ngam lanöökö min nö iyöng.
14 Lökten kahōlö, yēḵ yīö öi hökken në taṙòkhöre ngaich hameuktöre yī-ö öi ikūö ò öi töt pitōtuvö hēk töt fāluṙen hēk meūkö öi im lanāmö. 15 Ngaich ngö lōn tö hī öi teūngen tö ṙētakre tö ngam inyööken nö löktö im manööyö ngam Mā hī, sā inlahen ngam hanangenlōn hol maneuk hī Pôl nö kūichtö e nö asā ngam mikah taneūngenre nö löktö in ngam Tēv, 16 kūichtö inlahen në ṙô anga-aṅ nö in nup chitri re nö ṙòkhöre, ōt pöri nup in u ṙô töt mikah elnang cha ngaich yip tarik töt akaha elmat* tö në ṙô hēk tökatööngalōn ngaich harīkngö ṙôre cha-a nö vënyen u, sā cha nö ngatī inlahen nö in nup ṙô aṅmat ngam līpöre ngam vamī lāinyngen cha nö ahetiyö.
17 Lökten kahōlö, yī-ö tö urěhten mikahkūö tö inlahen në ṙô, haṙēmngenre yin öi ui lō-ongkūö tö ṙô yip tötlöök mahachīlö yīö ngatī inlahen pöri öi ngöntöhëichṙen, hòṅ yīö öt fukngö. 18 Iṙūöhen yin yēḵ öi teūngen tö ngam tökiröng miṙēḵlōn ngam Tēv ngaich asīöp ngam mikah elmatre tö inlahen ngam Mā hī hēk ngam Mahayööken hī ang Yēsū Kristū. Örheūheu an yēḵ ngam nööinyö ò töngamuh hēk höng örheūheu. Āmen.