I minë-eny Kalatī
3 Ō yī-ö tarik töt akaha aṅ Kalatī! Achīö öp mahalō-ongkūö yīö, lööknyi vinë-eny nang yin vahë tö Yēsū Kristū nö kūö yòh anga-aṅ nö tōklöng nö irōi chōn? 2 Hěng ön ngih hatön* Chu in yīö, teūngen hòng yī-ö tö ngam töhet kumlēḵ öi löktö in minë la-en tö vënyu im chööngö hēk löktö im inlahenre hòng ṙöng öi hang ngam tölöök inhānga ngaich ṙatö-ellōnre? 3 Ngaich öi kan yī-ö öi höng yahngen töt mikah elmat? Rěhlöröönre yī-ö öi asā ngam töhet kumlēḵ ngaich yòh min im manā-aṅ sā inlahen tinrīken yip tarik öi kiröön? 4 Höng yëḵngen hòng ngam inlahen yīö öi la-al minë kanihngenre? Hö-ö, öt yëḵngen nun. 5 Lökten ngam kamë-ekūö yīö tö ngam töhet kumlēḵ hēk la-evṙen tö minë la-en minhôiṅyö nö ihôi yīö, ṙën hòng anga-aṅ nö ngatī inlahen kūö yīö öi la-evṙen tö minë la-en tö vënyu tö ngam chööngö hēk kūö yīö ṙöng öi hang ngam tölöök inhānga ngaich ṙatö-ellōnre öi in e. 6 Ngatī ök inrē Aprahām nö ṙatö-ellōnre nö in Yāvē,* ngaich angū-ö chö-öiny ò nö kaheūkö nö tölöök.
7 Kô-en yin yēḵ akahalōn tö ngòh lamök im ṙinatö-ellōn nöng cha-a tö kaheūkö nö Kūön Aprahām. 8 Urěhngöre ṙô ngam töhet līpöre tö ngam Tēv nö löktö im ṙinatö-ellōn nö kaheuk më tahëng mihëṅṙö nö tölöök ngaich vë-eny nang Aprahām tö ngih tölöök inhānga tö ngö: “Löktö in meh min minë taṙòkhöre pumnāmö nö teūngen tö inkôlòre.” 9 Lökten ngòh lamök im ṙinatö-ellōn, teūngen cha-a tö inkôlòre nö sā inlahen Aprahām ngam tö aṅhavin tö ngam ṙinatö-ellōn.
10 Yip töng ṙamatö-ellōnre nö in minë tö vënyu la-en ngam chööngö, elkatòh ngam ötinkôlò cha-a, pò e nö ngö kinūichngö: “Yip töt hamang minë ṙô tökūichi i mat ngam līpöre Chööngö tötkôlò anga-aṅ.” 11 Rö-ö nöng angū-ö pön lööknyi ṙô inrē nö öt hěngtak tö kaheūkö nö löök nö imat ngam Tēv nö asā ngam chööngö, pò e nö ngö kinūichngö, “ngòh tölöök, löktö im ṙinatö-ellōnre min anga-aṅ nö aṅ.” 12 Öt nôlhöt ön ngam ṙinatö-ellōn nö im Chööngö. Pön ngö inlahen vinënyi angū-ö, “ngòh töla-evṙen tö në anga-aṅ min tö aṅ.” 13 Havaha ayī-ö tö Kristū öi ṙānyu öi ṙā-ang im ötinkôlò ngam Chööngö ngaich hakôtenre anga-aṅ nö ichūök hī nö vītöre nö ötkôlò, pò e nö ngö kinūichngö: “Yip tarik töng kilöllöng nö irōi chōn, tötkôlò anga-aṅ.” 14 Ṙën angū-ö nö ngatī hòṅ ngam inkôlò taneungen Aprahām misī ngaich teūngen yip tahëng pumnāmö tö e nö löktö in Kristū Yēsū ngaich löktö im ṙinatö-ellōnre ayī-ö öi teūngen tö ngam töhet kumlēḵ ngam tökilē-ěyö misī.
15 Kahōlö, hachōḵ ṙôre Chin öich ṙò-òvö, öich löktö in minë inlahen hī öi tarik, nup töng ëkriment, pòrô anū-ö nö vahī ngòh tö hěngtak tarik, yěn ngaich nö hěngheuh nö haköpiyö ngaich ötkô angū-ö nö rökiṙen hēk ötrēhěn kô angū-ö nö vīhötvö aṅmat. 16 Nup kinlēḵngô misī tökilē-ěyö nö in Aprahām hēk in ngam Kūön* ò. Öt ngö ṙô ön ngam töhet līpöre, “hēk löktö in yip kūön* meh,” nö sā inlahen ṙamôtö yip töpōyen anga-aṅ, höng kakkö inlahen öp tö hěngtak pöri anga-aṅ misī “hēk löktö im kūön* meh,” anga-aṅ ang Kristū. 17 Ngö ṙô Chin inrē: Ngam tö urěhngöre misī ëkriment hēk kinlēḵngô ngam Tēv, öt rökiṙen angū-ö tökūö ngam Chööngö yamih unôichrit ngam tö 430 samyeūheu. 18 Lökten yēḵ ngam amin nö lökngörit im chööngö nö kētu ngaich öt kūö ngam kinlēḵngô angū-ö nö kētu. Ngih pöri tökô-en tö ngam Tēv nö hameuktö miṙēḵlōnre nö in Aprahām nö kē-ěkūö Aprahām tö ngih amin nö löktö im töhěng kinlēḵngô.
19 Kūö yòh pöri nö kētu ngam Chööngö? Ṙën angū-ö nö unôichngöre nö kētu, hòṅ e nö mahameuknyö minë tökööl, hòṅ e nö köp hanöng sā inlahen ngam Kūön* nö öl nö yih ngam tökē-ěvkūö tö ngih kinlēḵngô, söömtu ngih chööngö nö löktö in yip ma-ahānga nö eltī ngam tö hěngtak mahayööken. 20 Öt uroh nö lōntö mahayööken nö umuh yěn höng hěngtak ngam tö ṙò-òv, höng hěngtak pöri ngam Tēv ngam kumlēḵngôre tö e. 21 Ngaich yòh pökeh minë Chööngö, la-al minë kinlēḵngô ngam Tēv hòng? Hö-ö, öt ngatī! Pön yēḵ ngam chööngö öre nö kētu ngam tö mihôiṅ nö kētö nômö ngaich mihôiṅ öre nö kaheūkö ngòh tö hěngtak tarik nö tölöök yēḵ ò nö hang ngam chööngö. 22 Ngaich pöri ngam töhet līpöre nö kēten hī öi ṙòkhöre öi eltī ngam tökööl, hòṅ ngam kinlēḵngô lökten hī ṙatö-ellōnre in Yēsū Kristū, nö chö-öinyten cha yip ṙamatö-ellōnre nö in ò.
23 Urēhěkūö yanīhi ngam ṙinatö-ellōn pöri, laklöng ayī-ö hē e tö ngam chööngö ngaich kētu öi eltī e ngaich hökngen e angū-ö ṙinatö-ellōn ngam tö hòṅ hameuknyuvö. 24 Ngatī inlahen ngam chööngö nö vītöre nö mameukṙen* hī nö hateungten hī öi söl in Kristū, hòṅ hī öi löktö im ṙinatö-ellōn öi kaheūkö öi tölöök. 25 Ngaich ön töngamuh nö teung ngam ṙinatö-ellōn, lökten in öt elkatòh chööngö yip mameukṙenre.*
26 Rö-ö yin yīö pöi ṙòkhöre öi löktö im ṙinatö-ellōre in Kristū Yēsū öi kaheūkö kūön ngam Tēv. 27 Lökten yī-ö ṙòkhöre, yip tö ngaich nö vōkö nö in Kristū, mahayutlöre ngaich cha-a tö Kristū. 28 Lökten töngamuh nö öt hěngtak Yahūti, ötrēhěn nö Krīk, ötrēhěn nö töhaköövö hēk töthaköövö, ötrēhěn nö kikōnyö hēk kikānö, pò yīö öi ṙòkhöre öi im hinëngö in Kristū Yēsū. 29 Ngaich yēḵ yīö öi aṅ in Kristū ngaich kô-en yīö öi kūön* Aprahām.