Inhānga Kahūich Yôhan
19 Kē-ě Yēsū ngaich ang Pailět ngaich fōhan. 2 Vī ök töchökhukūö sapīöv yik kumyung, ngaich sumpīövlen e nö ikui ò ngaich hanyutlen ò tö ök tö pörpölömat hilā. 3 Yihtöre cha-a nö chuh in ò nö ngö ṙô: “Ō më-eṅ Rācha më Yahūti salām!”* Ngaich fatākkūö ò cha-a. 4 Hēk ang Pailět nö kunyī-inyre nö chuh elkahôyö ngaich ngö ṙô nö in yik tarik: “Yěh meuk! Kēnyen ò chin nö lātunyī hòṅ yīö akahalōn tö chu öt kanôtukūö tö fālen ò.” 5 Kunyī-inyre ngaich ang Yēsū nöng sapīövu tök töchökhukūö ngaich kaṙumöre tök tö pörpölömat hilā. Ngö ṙô ngaich ang Pailět nö in yik tarik: “Ngëichken ngòh tarik yin!” 6 Hē yik mākūö kūönṙô hēk yik amahati nö meūkö ò, ngö ṙô ngaich cha-a nö ayôṙa: “Kilöllen ò nö irōi chōn! Kilöllen ò nö irōi chōn!” Ngö ṙô pöri ang Pailět nö in cha: “Hakôtenre yin yī-ö kē an ngaich kilöllen ò, tön öt maheūku chin chū-ö tö fālen ngòh tarik.” 7 Ngö ṙô ngaich yik Yahūti: “Hěng ön ngih chööngö ih tö ih öi hòṅ fëlngen ngòh tarik öi sā ngam chööngö, kūö ò nö vë-enyre nö kūön ngam Tēv.”
8 Pa-ekūö takô hēk ang Pailět hē ò nö hāngö e, 9 kuhēthötre hēk anga-aṅ nö el ök patīre ngaich hatöönö Yēsū nö ngö ṙô: “Aṅ yih öm kan?” Höng öt sapṙô ò pöri ang Yēsū. 10 Ngö ṙô ngaich ang Pailět nö in ò: “Öt hòṅ sapṙô chu ömeh? Öt akahalōn öm tö chu öich chöönguvö öich mihôiṅ öich ṙānyen meh hēk fëlngen meh inrē?”* 11 Ngö ṙô ngaich ang Yēsū nö sapṙô ò: “Yēḵ meh öre öt kētu chööngö öm löktö lātulöng ngaich öt chööngu öre më-eṅ öm ikui chu. Lökten öp tarik kamëten chu öich in meh anga-aṅ töpōyen kanöölö fālen.”
12 Angū-ö lāinyngen Pailět nö chöh tö inlahenre nö hòṅ ṙānyen ò, ayôṙa pöri yik Yahūti nö ngö ṙô: “Yēḵ meh min öm ṙānyen ngòh tarik ngaich öt hol ngam mahayöng* më-eṅ. Pò ngòh vamī-ilre nö rācha anga-aṅ lama-al ngòh mahayöng.” 13 Unôichrit Pailět nö hang në ṙô, kēnyen Yēsū ngaich anga-aṅ nö chuh lātunyī ngaich ūichhak nö el ök töhěng chūök kamhôṅka öp Tö-ihōngu Chöputöra invëka ngam Kapata nö ṙô Hiprū. 14 Ṙētak Inlēnkö ngam Pāska angū-ö; ngaich lohten angū-ö nö 12 köiṅny ṙô tö sakāmö. Ngö ṙô ngaich ang Pailět nö in yik Yahūti: “Yěh meuk! Ngòh yih rācha yīö!” 15 Ayôṙa ngaich cha-a nö ngö ṙô: “Fëlngen ò! Fëlngen ò! Kilöllen ò nö irōi chōn!” Ngö ṙô ngaich ang Pailět: “Kilöllen ngòh rācha yīö hòng chū-ö öich irōi chōn?” Ngö ṙô ngaich yik mākūö kūönṙô nö sapṙô ò: “Öt tahëngu rācha ih höng ngam mahayöng.” 16 Kēten Yēsū ngaich anga-aṅ nö in cha nö fëli nö kilöllöng nö irōi chōn.
Ngaich kē-ě Yēsū ngaich yik kumyung. 17 Keun ngam chōn inkihten* ngaich ang Yēsū, ngaich chuh in ngam chūökö tö Kui Kupah invëka, ngam chūökö tö Kòlkòta nö ṙô Hiprū. 18 In e anga-aṅ nö tōktu nö elhôi nak tö nët tak tarik hěng tak ök lāmahāmö ngaich hěngtak ök lāmatavē ngaich elhôi cha ang Yēsū. 19 Kūichten ngih ṙô ang Pailět nö ikui ök chōn inkihten:* “Yēsū aṅ Nāsaröt Rāchakūö Yahūti.” 20 Pōyen yik Yahūti mahaköpö e, pön ngam kamngö chūök Yēsū nö tōktu nö irōi chōn töng röhta angū-ö nö el panam, kūichi ngih ṙô nö i ëlô Hiprū, Latin hēk Krīk inrē. 21 Ngö ṙô pöri yik mākūö kūönṙô yik Yahūti nö in Pailět: “Uh man kūich ngih, ‘Rāchakūö Yahūti,’ kūich ngih ṙô ò pöri, ‘Chū-ö chin rāchakūö më Yahūti.’” 22 Ngö ṙô ngaich ang Pailět nö sapṙô cha: “Yěich ngaich öich kūichhöti, ngaich höng angū-ö ngaich.”
23 Tōkten Yēsū ngaich yik kumyung nö irōi chōn ngaich kē ök vanön ò ngaich fëntit tī nö tikāchö e ngaich katölhökūö höö, kö hēngö kahë cha-a tö nuk tinkachtit alaha e, kē ök inyut ò inrē cha-a ök töt taseūṙu töng kupātö pöri nö löktö lātulöng söl lātaṙeū. 24 Lökten ngaich cha-a nö ngö ṙô nö in höö: “Hö-ö in öi tikāchö e höng lòtrī ṙö e pöri ayī-ö öi ngëichkö öp tö teūngen tö e.” Ṙën pöri angū-ö nö ngatī hòn teungtökūö ngam ṙô ngam līpöre: “Katölhökūöre cha-a tö nuk hilā chu ngaich lòtrī taneūngenre tö nuk inyut chu.” Ngaich kô-en yik kumyung nö ngatī inlahen.
25 Höng söktöhëichṙen nöng röhta nö in ök chōn inkihten* Yēsū, ök yöng ò kikānö, ök māsi ò Mariā ök pīhö Klopas hēk Mëri Mektelīn inrē. 26 Hē Yēsū nö meuk ök yöngre kikānö hēk ök hanangenlōn ò mahaköp nö röhta nöng söktöhëich nö in ò ngaich ngö ṙô anga-aṅ nö in ngam yöngre kikānö: “Ngëichkö ngam kūönre man!” 27 Unôichrit e hēk ang Yēsū nö ngö ṙô nö in ök haköptöre: “Ngëichkö ngam yöngre man!” Im hē e angū-ö sakāmö ngaich ngam mahaköp nö chuh patīre tī tö Mariā hòṅ ò nö iyöng in ò.
28 Unôichrit e ngaich, hē Yēsū nö akahalōn tö minë taṙòkhöre vinënyö inlahen ò nö teungtökūö, ngö ṙô ngaich anga-aṅ: “Haṙëhe nômö chin.” Hòṅ ngih tökūichi ṙô ngam līpöre nö teungtökūö. 29 Ṙā-akṙen ök neū-euṅ nö umuh tö tööḵlö aṅ tö töpakīölhu vāin, lökten ngaich cha-a nö kasūmtö ök hilā nö el ök töpakīölhu vāin ngaich ṙāḵtö e nö in ök kanök hissòp* ngaich kēten e nö ikūö ò. 30 Hē Yēsū ngaich nö kalahken ngam töpakīölhu vāin, ngaich ngö ṙô anga-aṅ: “Teungtökūö nun nö ngaich!” ngaich sōntökūöre nö ṙā-ang nômöre.
31 Ṙētak sakāmö Inlēnken angū-ö hē e, ngaich öt lōnu yik Yahūti tö nuk alaha yik kupah nöng kilölhakṙen nö irōi ngam chōn inkihten hē el ṙētak Haneūheu Töhet Sakāmö (pön ṙētak tökiröng Haneūheu Töhet Sakāmö angū-ö hē e), lökten ngaich cha-a nö havëtö ṙôre nö in Pailět nö likölngö nuk kalröön yik tarik tökilöllöng nö irōi chōn ngaich hôḵtö nuk alaha cha. 32 Yihtöre ngaich yik kumyung ngaich likölngö kalröön ök raneh tarik hēk ök innëtö inrē tarik ök tö röhta nö lā in ngam chōn chūök Yēsū nö kilölhakṙen. 33 Hē cha pöri nö yihtöre nö in Yēsū ngaich meūkö ò cha-a nö kapah, lökten ngaich cha-a nö öt likölngö nuk kalröön ò. 34 Sön pöri nö hěngtak ök in yik kumyung kamënyö vöire nö sap ranūmö ò ngaich ilöö hëmnyi nuk mahām ò nö holtö mak. 35 Ngòh tökôtamat nö meūkö u nö ṙòkhöre, anga-aṅ vamënyö inlahen ò ngaich tökô-en minë vahënyö ò, akahakūö anga-aṅ tö nup töng ṙô ò nö kô-en, lökten anga-aṅ nö vënyen u hòṅ yīö öi ṙatö-ellōnre tö u. 36 Ṙënten angū-ö nö ngatī inlahen hòn teungtökūö ngam ṙô ngam līpöre: “Öt hěng hang tangëḵ ò töliköli min.” 37 Ōt an inrē ngam chūök e nö kūichi nö imat ngam līpöre: “Höng ngëichken ò min yip samapngen ò.”
38 Unôichrit e ngaich Yôsěf ök aṅ Arimataya nö havëkökūö Pailět tö ök alaha Yēsū. Tö hěngtak ang Yôsěf nö mahaköp nö in Yēsū kūö vanööṙöre pöri anga-aṅ tö yik Yahūti lökten nöng hayunkenre, halöngten ò ngaich ang Pailět nö kēḵ ök alaha Yēsū, lökten ngaich ang Yôsěf nö kiröönngöre nö kumten ök alaha ò. 39 Ngatī inrē ang Nikòtimös ök tö möl nö meūkö Yēsū tö hatööm, lohten anga-aṅ nö 30 kilo* kum tö tökatēhě masāla.* 40 Kēḵ ngam alaha Yēsū ngaich cha-a ngaich sā minë tö nehngenre inlahen më Yahūti nö lāpngö kupah nö lūöptö nup tötahūsa masāla ngaich haṙungngen ò nö el ök tövai hilā. 41 Lönglen ngam chūök ò nö kilöllöng nöng el ngam panô-òṅ ngaich in e ök tö tufömngöre anūlö ök tö öl nö chaptu aṅ tö alaha kupah. 42 El ngam anūlö tī cha-a nö ṙāḵten Yēsū pön angū-ö sakāmö Inlēnkö paratīn yik Yahūti ngaich röhta ngam anūlö nö in e.