I minë-eny Rōma
2 Ō më-eṅ samūöichkö fālen holre, Ō më-eṅ tarik töng kamhôka, yēḵ meh öm sūöichkö fālen tahëng ngaich ötkô më-eṅ öm kaheūköre öm tölöng. Yēḵ meh öm sūöichlö fālen yip tahëng ngaich töng vamītö kuire më-eṅ tö ngam sācha re, pò nup la-en nup sinūöchlö fālen yip hol meh tö meh ngaich höng ngatī inlahen inrē më-eṅ öm höng kēken u. 2 Akahakūö in tö ngam kinṙôka aṅ im Tēv nö tökô-en ngaich yip töng iṙūöhen nö kēken në la-en, kētu sācha min cha-a tö ò.
3 Ō më-eṅ tarik töng samūöichkö holre nö in në tö ngatī la-en, öm höng kôten öm kēken në tö ngatī la-en, öt kò-òngvah öm min tö lōnre tö ngam sācha aṅ in ngam Tēv? 4 Miyëḵ elmat öm ṙöng tö ngam miṙēḵlōn, ṙinapöre hēk tö ngam manööyö ngam Tēv inrē? Öt akahakūö hòng më-eṅ tö ngam Tēv nö hameuktö ngam miṙēḵlōnre pön hōten meh öm kalahtenre öm halööktitre? 5 Ngaich pöri ngam ellōn meh nö ngëḵngöre hēk öt hīnöre inrē nö halööktitre, ngatī inlahen më-eṅ öm hamūllö ngam tanāinyö ngam Tēv nö ikui re ip yamih sakāmö, hē ò min nö kahôka nö asā minë töhet inchöngten. 6 Havahalvah u an min nö asā ṙôken la-en ngòh tarik, 7 ngòh tö iṙūöhen nö la-evṙen tö minë tölöök la-en nö holtö manööyöre, hòṅ ò nö teūngen tö ngam nööinyö, minlēḵken hēk ngam töt chanuhuvṙen nômö ngaich kē-ěvkūö min anga-aṅ tö ngam nômö tö örheūheu-aṅ, 8 vē tö aṅhavin pöri tö ngam lina-alkūö hēk öt hō-en ngam kanô-en, höng iṙūöhen pöri nö kēken minë tötlöng la-en ngaich ikui cha min ngam lanīnö hēk tanāinyö ò. 9 Vē tarik töng iṙūöhen tö minë tötlöök la-enre, teunghu kui min cha-a tö ngam miṙivlōn hēk kanihngen, urěh min më Yahūti ngaich hēk min më tahëng mihëṅṙö, 10 vē tarik pöri töng iṙūöhen nö la-evṙen tö minë tölöök la-en, kē-ěkūö cha min ngam Tēv tö ngam nööinyö, minlēḵṙen hēk lanāmö, urěh min më Yahūti ngaich hēk më tahëng mihëṅṙö. 11 Pò ngam Tēv nö töt atöltuṙen tö tarik.
12 Më taṙòkhöre töt aṅhavin tö ngam chööngö ngam Tēv nöng kēken mine tökööl, ṙòkhöre min cha-a nö ahetiyö nöng öt im chööngö, yip më-elkatòh ngam chööngö pöri nö kēken nup tökööl, kahòkkaṙen min cha-a nö asā ngam chööngö. 13 Pön öt höng yip hamang ṙô ngam chööngö tölöök nö ikūö ngam Tēv, yip tamūönkui ngam chööngö pöri, cha-a min tö kaheūkö nö tölöök. 14 Pò yip tarik töt aṅhavin tö ngam chööngö ngam Tēv, sön pöri cha-a nö hameuktöre nö sā inlahen tö aṅhavin tö ngam chööngö ngaich tūönkui ngam chööngö. 15 Hameuktö ṙô ngam chööngö cha-a nö kūichiyö nö ellōnre ngaich vënyu nang cha-a tö ngam lamātuhēt elkuilōnre ngaich ngam mufē cha nö fēḵlen cha, tö cha yěn fāluṙen hēk hö-ö. 16 Ip hē e min angū-ö sakāmö ngam Tēv nö löktö in Kristū Yēsū tī nö kahòkken nup töhayunka nö i tarik ngaich lökngörit in ngih tölöök inhānga min angū-ö nö kahòkkaṙen ngih vahënyö Chu.
17 Yēḵ meh öm Yahūti invëka hēk yěm ṙamatö-ellōnre in minë chööngö ngam Tēv hēk tailölōn öm in ngam innòlöre tö ngam Tēv, 18 hēk akahakūö inrē më-eṅ tö nup kuilōn ò, töhaköptu inrē më-eṅ tö minë Chööngö,* töp lökten meh öm akaha elnang takô tö minë ṙô, 19 ngaich ṙatö-ellōnre më-eṅ töre öm mahachōḵ talöökö yip tötmeuk hēk hanātö yip më-el sinngūlö inrē, 20 mahalööktö inlahen yip tökulō-ovö man hēk mahaköptö yip töt akaha inrē hēk akaha elmat inrē tö minë mikah elmat aṅ in ngam Chööngö hēk tö minë ranehlö ṙô mahaköp kanô-en— 21 nup haköptö meh i tahëng, öt haköptöre hòng më-eṅ tö u? Ngam ahangkö meh öm ngö ṙô, “Un ulāiya,” ngaich höng ulāiya hòng më-eṅ? 22 Ngö ṙô më-eṅ, “Un asěha,”* ngaich höng asěha hòng më-eṅ? Tösa-òkkūö më-eṅ tö insā, ngaich kôten hòng më-eṅ öm ulāiyngö nup patī nup insātēv? 23 Ameū-eure më-eṅ öm tö aṅhavin tö ngam chööngö, ngaich kôten hòng pöri më-eṅ öm filal ngam Chööngö öm öt milēḵṙen tö ngam Tēv? 24 Pön ngö kinūichngö angū-ö, “tö ngam minë-eny ngam Tēv nö ötlēḵkaṙen nö elhôi yip tahëng mihëṅṙö tö tī yīö.”
25 Yöölen min më-eṅ öm löktö in ngam tunnyinyngö yēḵ meh öm hang minë chööngö, yēḵ meh pöri min öm filal minë chööngö, ngaich öt manahavö min ngam inlahen meh öm tunyinyiyö. 26 Yēḵ ngòh tarik pöri töt tunyinyiyö ngaich höng hateungngö minë kuilōn ngam Tēv nö sā minë Chööngö, hö-ö hòng ngaich anga-aṅ nöng sā ṙēngen ngam tö tunyinyiyö? 27 Ngòh tarik töt tunyīnyi nö im alaha, hameuknyö vanāichö meh anga-aṅ yěn kēkö kaha minë Chööngö. Pöm aṅhavin më-eṅ tö minë chööngö, tunyīnyi inrē, sön öm halôngen minë chööngö. 28 Pön rö-ö nöng anga-aṅ Yahūti ngam tö meūkö nö lātunyī, rö-ö inrē ngam tunnyinyngö nö meūkö nö lātunyī nö i alaha. 29 Anga-aṅ pöri tökô-en Yahūti ngam lamātuhēt ngaich angū-ö tökô-en tunnyinyngö ngam töt kūichö nö lökngörit in ngam chööngö, pön löktö in ngam töhet kumlēḵ, ngam tunnyinyngö nö im ellōn, öt eū-eu anga-aṅ tö tarik, teūngen pöri anga-aṅ tö ineū-eure nö löktö in ngam Tēv.