I minë-eny Taitös
2 Iṙūöhö ṙô pöri më-eṅ vënyen minë ṙô minë tö yöölen* tī inköphöti. 2 Tö hòṅ ṙāpöre ön ngòh tököinyö ṙēḵti tarik nö i tökeuheūttöre, tö hòṅ kô-en, tö hòṅ lööngö mufē, tö hòṅ ngöönö ṙinatö-ellōn, tö hòṅ tööḵlö tö ngam hanangenlōn hēk tö hòṅ īnu tö ngam manööyö. 3 Hòṅ ngatī inlahen inrē yip tököinyö ṙēḵti yöngnyīö nö sā inlahen yip töhet tarik nö hō-ov, ötkô cha-a nö samūöichkö holre, ötkô inrē nö töpōivat nö òk vāin, hòṅ mahaköptö nup tölöök ṙô pöri, 4 hòṅ cha nö kētö inlēnö* më ṙālö yöngnyīö tö cha nö hòṅ hangenlōn tö öp pīhöre hēk tö më kūönre, 5 tö hòṅ lööngö mufē, tö hòṅ hëtö tinrīken, holre tö ngam inlahen cha nö tö hòṅ la-evṙen nö i patīre,* tölöök hēk tumṙeūtöre inrē tö öp pīhöre, hòṅ ngam ṙô ngam Tēv nö öt hachōichi.
6 Ngatī inlahen ṙūöhöl alaha më ṙālö prötör, tö cha nö hòṅ löökö mufē, 7 hēk ngatī inrē më-eṅ öm hameuktöre öm tövai öm inchō-okūö inup taṙòkhöre tölöök la-en ngaich holtö kanô-enre öm haköptö nup ṙô nup töhet,* 8 hēk vënyö nup tölöök* ṙô, hòn öt löknyu ṙô yip tahëng nö vënyen u nö töchōich, hòṅ yip lama-al hī nö sirōngkūö hēk ötlöknyu ṙô inrē nö ötlēköṙôre tö hī. 9 Yip mahalanṙen, tö hòṅ tumṙeūtöre cha-a tö yip yöngṙenre nö i tökeuheūttöre, hòṅ haṙamlōn cha, un mihôiṅ ṙô nö sapṙô cha, 10 un ulāingö nup töng aṅ in cha, tö hòṅ chūök ṙinatö-ellōn pöri, hòṅ cha nö i nup taṙòkhöre nö ṙūöhöl nup inköphöti aṅ in ngam Tēv ngam Mahayööken hī.
11 Hameuktu an ngam tökiröng miṙēḵlōn ngam Tēv ngam kamëtö inyööken yip tökeuheūttöre mihëṅṙö tarik. 12 Haköpten hī angū-ö, tö hī öi sō-en minë töt sā kuilōn ngam Tēv la-en hēk nup kuilōn ngih panam inrē ngaich tö hòṅ lööngö mufē öi ing panam* hēk keuheūttöre öi hol yip tölöök hēk maha-öiny ngam Tēv, 13 ngaich iṙūöhen öi hökkö öp ṙētak hē ngam maheūṅkkö hī min nö teungtakūö ngam kamëtö ṙanamlōn hī ngaich hameuknyu min ngam kanòlô ngam tökiröng Tēv hēk ngam Mahayööken hī Kristū Yēsū, 14 kēngö nômöre ang Kristū töpòkūö hī, hòṅ hī ṙānyu öi ṙā-ang in minë taṙòkhöre ötlanöökö* ngaich ahetlen hī öi tarik ò, hòṅ hī öi amin ò ngaich kalēḵ alaha öi in minë tölöök la-en.
15 Iṙūöhen më-eṅ vënyen në taṙòkhöre ṙô in cha, iṙūöhen mikahtö elmat* cha hēk holtö chööngöre öm iṙūöhen halööktit cha. Un hěngtak tökūöṅnö elmat tö meh.