Inhānga Kahūich Yôhan
2 Im linūöi sumkam hēk ök inpīhö tö kēkaṙen i Kānā i Kelelī, in e inrē ök yöng Yēsū kikānö. 2 Havëtu ang Yēsū tö yik haköptö ò inrē nö chuh im inpīhö.
3 Hē nuk vāin ngaich nö hòṅ keuheūt, ngaich ngö ṙô ngaich ök yöng Yēsū nö in ò: “Ngaich nun minë vāin nö keuheūt.” 4 Ngö ṙô pöri ang Yēsū: “Kūö yòh ai aya-a fēken e?* Öl an ngam ṙētak chu nö yih.” 5 Ngö ṙô ngaich ngam yöng ò nö in yik töla-evṙen: “Öptöng ṙô ò min nö in yīö, ngatī inlahen min yī-ö.” 6 Tafūöl nuk ihong neū-euṅ tö ṙā-akṙen nö umuh nö hòṅ sā inlahen minë chööngö yik Yahūti nö ha-etlöre, mihôiṅ minë neū-euṅ nö 44 hēk 66 lītör* ṙôken aṅ tö mak. 7 Ngö ṙô ngaich ang Yēsū nö in cha: “Hatööḵlö aṅ minë neū-euṅ yin tö mak.” Ngaich cha-a nö taṙēchi tī nö hatööḵlen nuk neū-euṅ. 8 Ngö ṙô ngaich anga-aṅ: “Rahëichyen kahë man in e ngaich kē-ěkūö öp mahalēnkö nyinā-aṅ inpīhö.” Kē-ě e ngaich cha-a nö chuh in ò. 9 Kalahken ngam mak ngaich ngam mahalēnkö nyinā-aṅ inpīhö ngam mak tö haṙī-ingre ngaich nö vāin, öt akahakūö anga-aṅ tö löktö ngam vāin (akahakūö pöri yik tö la-evṙen yik kamëtö ngam mak nö ṙa-ang el nuk neū-euṅ), havëken ök töhapīhö ngaich anga-aṅ kikōnyö 10 ngaich ngö ṙô: “Urěhnyö nup tö kuchik vāin yip ṙung tarik ngaich yěn hiyōi yip amôkö u ngaich möl cha-a nö kēnyö nup tökunyah. Ngaich pöri më-eṅ öm halinngö chūök ngih töt insā-avö kumchik vāin.” 11 Ngatī inlahen ang Yēsū nö hameuktö ngam raneh pinngangkūö nö i Kānā i Kelelī ngaich hameuktö ngam kumlēḵre, ṙatö-ellōnre ngaich yik haköptö ò nö in ò.
12 Unôichrit e ngaich ang Yēsū tö ök yöng ò kikānö, tö yik kahëm ò hēk tö yik haköptö ò nö chuh Kafarnahum, öt ṙōl sumkam pöri cha-a nö höngngöh nö in e.
13 Röhta yanīhi ngam Pāska yik Yahūti, ngaich chuh Yērūsalem ang Yēsū. 14 Meuk yik mi-inyīha hēk mahaṙīkö rupīö anga-aṅ nö kö el minë chūökre nö ūichhak nö el ngam chūök vinë-ekūötēv nö inyihkö minë nuā, sīṅp hēk nyö-öṅ inrē. 15 Vī ök rehen ngaich anga-aṅ aṅhtī re nö fōho cha, ngaich ahōnyen cha nö ṙòkhöre nö holtö nuk sīṅp hēk nuā re inrē nö ṙā-ang el ngam chūök vinë-ekūötēv. Hōngngö nuk coin yik mahaṙīkö rupīö ngaich anga-aṅ ngaich kuringngö nuk mīs cha inrē. 16 Ngö ṙô ngaich anga-aṅ nö in yik mi-inyīhkö nyö-öṅ: “Kiröönngöre yin öi kumngen në! Un vī-i ngih patī öp Yöng chu nö markět!”* 17 Fē-ělre ngaich yik haköptö ò tö ngam tö ngö kinūichngö: “Ökngö tī an tö chu ngam nganötö kumlēḵ lōn chu tö ngam patī meh.”
18 Ngö ṙô ngaich yik Yahūti hē cha nö meūkö e: “Asūp mihôiṅ pinngangkūö hameuktö meh öm in ih, öp löktö mikahkūö ih tö meh öm chööngu ngatī inlahen?” 19 Ngö ṙô ngaich ang Yēsū nö sapṙô cha: “Mihôiṅ chin öich afukngen ngih chūök vinë-ekūötēv ngaich lūöi sumkam tī öich asöklen e.” 20 Ngö ṙô ngaich yik Yahūti: “Fën anāi tafūöl samyeūheu rò-òtö tī öi vīlö ngih chūök vinë-ekūötēv, mihôiṅ hòng min më-eṅ öm lūöi sumkam tī öm asöklen e?” 21 Ngam manah ṙô ò pöri tö ngam chūök vinë-ekūötēv, nöng ṙô tö ngam alahare anga-aṅ. 22 Hē ò ngaich nö hachohlöng nö ṙā-ang in yik tökapah, fē-ělre ngaich yik haköptö ò tö ngam ṙô ò, ṙatö-ellōnre ngaich cha-a nö in ngam līpöre hēk in nuk ṙô Yēsū inrē.
23 Hē ṙētak ngam Pāska paratīn i Yērūsalem, ngaich pōyen yik tarik mameūkö ò nö hameuktö pinngangkūö ngaich ṙatö-ellōnre nö i minë-eny ò. 24 Öt hayönglenre pöri ang Yēsū nö in cha, pön akahakūö anga-aṅ tö cha nö ṙòkhöre 25 öt uroh inrē anga-aṅ nö hatönkūö yik tarik yěn hòṅ mikahtökūöre tö cha, pò ò nö mihôiṅ nö meuk ellōn ngòh tarik.