Raneh Chitri Tösalònikē
4 Kahōlö, haköplu yin öi in ih tö inlahen ngam tinrīken yīö yěi hòṅ haṙamlōn ngam Tēv ngaich kô-en yī-ö öi ngatī inlahen tinrīken, im manā-aṅ in ngaich öi i minë-eny ngam Mā Yēsū öi hòṅ aṙētu ṙô tö yīö hēk ṙūöhöl alaha yīö inrē öi iṙūöhen öi ngatī inlahen. 2 Akahalōn yī-ö tö nup inlēnö* yīö kahëtö ih lamöktö in ngam Mā Yēsū.
3 Angū-ö ön ngih kuilōn ngam Tēv tö yīö öi köp im hanëtö hēk ṙūöhöngre tö ngam chinô-òṅkānö.* 4 Kö aṅhavin pöri yī-ö tö ngam hanëtö hēk heuveū inrē öi ṙap ngam alahare* öi holtö minlēḵṙenre. 5 Rö-ö öi höng im yinikhanga hēk öt ṙap ngam inteungngö minë kuilōnre öi sā inlahen më tahëng mihëṅṙö tarik yip töt akahakūö tö ngam Tēv. 6 Un tarīku vamāngngö röönre tö në inlahen hēk un höng ngëichkö yanöölenre nö in öp holre, pò Yāvē* nö kētö sācha në taṙòkhöre tö ngatī la-en sā ṙô ih ngaich urěhngöre ṙô vë-eny nang yīö ngaich inrē öi kētö mikahlōn yīö. 7 Pön rö-ö ngam Tēv nö mahavëten hī öi in në töchōich la-en, havëten hī pöri öi im hanëtö. 8 Lökten ngòh tarik samô-en në ṙô ngaich öt samô-en tarik anga-aṅ pön samô-en ngam Tēv, ngam kamë-ekūö yīö tö ngam töhet kumlēḵre.
9 Ngam hanangenlōn yīö pöri tö höö öi sā töhěng mikūönö, öt uroh īhö öi kūichtö ngih inlahngen öi in yīö, pò ngam Tēv nö kôten nö haköpten yīö öi kö hangenlōn tö höö. 10 Ngaich kô-en yī-ö öi hangenlōn tö më taṙòkhöre prötör aṅ Maketònī. Kahōlö, kētö ṙinūöhöl alaha yīö pöri īhö tö yīö hēk öi kumlēḵlö alahare öi ngatī inlahen. 11 Ngaich sā ngam inlēnö yīö kahëtö ih, vī-i e yī-ö nö chö-öinyre öi holtö lanāmöre öi aṅ, höng ngëichken minë la-enre hēk ma-āinyre la-evṙen öi hakôtötīre. 12 Hòṅ yīö öi löök öi imat yip aṅ elkahôiṙen ngaich öt hěng hanāṅten yīö chehen.
13 Rö-ö pöri nöng angū-ö kahōlö, pöi öt lōnu inrē tö yīö öi öt akahalōn tö inlahen maheūṅkkö yik tö ngaich hol hī nö haṙòh nö im kinpaha, hòṅ yīö öi öt haṙivlōn öi sā inlahen yip tarik töt īnu tö maheūṅkköre. 14 Yēḵ hī öi ṙatö-ellōnre tö Yēsū nö kapah ngaich hachohlöng nö hēk ngaich ṙatö-ellōnre ayī-ö inrē tö yip tarik tökapah nö im hinëngö nö in Yēsū ngaich hachohlen cha min ngam Tēv nö löktö in Yēsū. 15 Pò ih öi vë-eny nang yīö öi löktö in ngam ṙô Yāvē* tö yip in hī tö aṅ ip yanīhi ngam Mā ngaich öthō min ayī-ö urěh tö yip tökapah nö ngaich. 16 Pön hakôtenre min ngam Mā ngam yöngkūö më ma-ahānga nö pōitô nö hū-a nö yônti nö löktö el halīöngö ngaich fööṙö min ngam fanöö ngam Tēv ngaich yip mi-in Kristū nö kapah nö im hinëngö, urěh min cha-a nö hachohlöng. 17 Ngaich unôichrit e min ayī-ö öi tö aṅ hēk yip tö ōtngöre chööḵ in cha min ayī-ö öi kēlöng öi el taṙul, hòṅ hī öi el kuföt öi meukkūö ngam Mā ngatī inlahen min ayī-ö öi höng örheūheu in ngam Mā. 18 Lökten yin öi iṙūöhen öi kētö inreushkö alaha höö öi in në ṙô.