I minë-eny Heprāi

6 Yēḵ hī ngaich öi kū-ö urěh tö minë ranehlô mahaköp inlahen Kristū ngaich ta-a töi kalēḵ alaha öi kū-ö urěh im chö-öiny sanööḵngö, ui hēk öi ṙāḵtö chūök rööntö, tö ngö manah, ui hēk öi rěhlöṙôre haköp nup ranehlö ṙô hī haköp, tö sā ngam invöötö ellōnre öi ṙāngen nup la-en töt yanööluṙen tī,* ṙinatö-ellōnre in ngam Tēv, 2 inköptö vinôkö, ṙināḵtö eltīre, inchohlö yip tökapah hēk inköptö ngam tö örheūheu kinṙôka. 3 Ngaich yēḵ ngam Tēv nö halöngten hī ngaich öthō min ayī-ö öi öt kū-ö urěh im chö-öinyre öi sööḵngö.

4 Yip tarik tö ngaich nö teūngen tö ngam hanātö mikah elmat hēk yip kamlahken ngam tötṙāyu inlōnti lamöktö el halīöngö hēk tö ngaich nö hamòlṙen ngam töhet kumlēḵ 5 hēk yip kamlah ngam töt insā-av ṙô ngam Tēv hēk nup chehen tö īnu tö nup minhôiṅyöre in nup yamih ṙētak,* 6 ngaich pöri töngamuh nö suktöre hēk marôvat ngaich ötkô öi havānö cha öi im invöötö ellōn, pò cha hēk nö kilöllen ngam Kūön ngam Tēv nö irōi ngam chōn ngaich miṙēḵngen ò nö ikūö tömaṙôngö. 7 Yēḵ ngam kumṙah nö örheūheu nö suktöre nö el ngam tumlat nö löktö i inkòlôre tö ngam Tēv ngaich nyôklen ngam mak angū-ö ngaich meunylö minë söpchī ngaich yöölen ngam tameūich nö löktö in u. 8 Yēḵ ò pöri nö teūichtö töchökhukūö chōn hēk töchökhukūö kiyôp ngaich sō-ovö min anū-ö, ilööṙen pöri min anū-ö nö kētu öt inkòlô, ngaich ip manā-aṅ min anū-ö nö föngtukūö.

9 Yěi ṙôtö inlahen yīö pöri töhanghuṙen kahōlö, ṙatö-ellōnre īhö tö yīö öi vāyö inlahen, tö ngö manah, tö yīö öi lök el ngam talöökö, hòṅ yīö öi teūngen tö ngam inyööken. 10 Rö-ö ngam Tēv nö tötlöök nö tö vaichngö tö nup la-en yīö hēk tö ngam hanangenlōn yīö öi chö-öinytö ngam minë-eny ò, tö ngö manah tö inlahen yīö öi meukṙen yip töhet tarik ngaich ngatī inrē töngamuh öi ṙömöng meukṙen cha. 11 Lōnu pöri īhö tö yīö öi kö hěngtak öi mā-ainyre öi la-evṙen, hòṅ yīö öi söl manā-aṅ öi kô-en ṙinatö-ellōn ngaich meuk taneungtökūö ngam tökô-en maheūṅkköre, 12 hòṅ yīö öt ṙahata, asīnköröön yip tarik pöri, yip tö amīnu tö minë kinlēḵngô nö löktö i ṙinatö-ellōn hēk manööyöre inrē.

13 Hē ngam Tēv nö nö kilēḵngôre nö in Aprahām, ngaich höng in re ṙô anga-aṅ nö chūöku ṙô nö kilēḵngôre, pön öt ōtngöre tökiröng tö ngam Tēv nö chūök ṙô ò öre nö kilēḵngôre. Chūöku ṙô anga-aṅ nö kilēḵngôre nö in re 14 nö ngö ṙô: “Kētö inkôlò meh Chin min ngaich ṙūöhöl ṙôkö meh.” 15 Hē Aprahām nö ngatī inlahen nö hameuktö manööyöre ngaich kilēḵngôre anga-aṅ nö in ò. 16 Chūökuṙô ön ngòh tarik nö kilēḵngôre nö in öp tökiröng töre ngaich ngam kinlēḵngô ò min nö sanap nup taṙòkhöre ṙô ip manā-aṅ, pön ngam chūök ṙô nö inmeuktö ngam kinlēḵngô ò angū-ö nö tökô-en.* 17 Ngatī inlahen hē ngam Tēv nö kēḵ fëslare tö ò min nö hameuknyen ngam kuilōnre nö öt harīkngöre nö in yip tö amīnu tö ngam kinlēḵngô ngaich chūökuṙô anga-aṅ nö hameuktö ngam kinlēḵngôre nö tökô-en,* 18 hòṅ hī ayī-ö öi löktö in në tö nët tököp ṙô ngam chūökṙô ngam Tēv nö öthō nö minyôiny-aṅ, tö ngö manah, ayī-ö famalhötre öi el ngam innyat kuire tö ngam Tēv öi teūngen tö ngam töt insā-av inreuskö alahare öi kēngöre tī tö ngam maheūṅkköre tö ṙāḵtu nö ikūö hī. 19 Töhěngkangen ön nö kirap ngam nômö hī ngih maheūṅkkö, ngam tökô-en hēk tö ngön inrē. Havangngen hī angū-ö öi lāmuh tö ngam hilā ranangkūö, 20 ngam chūök ngam mahachōkūö hī Yēsū ngaich nö kuhēthötre nö chö-öinyten tö hī. Vītöre anga-aṅ nö örheūheu nö köp nö mākūö kūönṙô, hòṅ ò nö sā inlahen Melkisitĕk nö kūönṙô.