Raneh Chitri Yik Aṅ Kòrin
12 Kahōlö, lōnu chin tö yīö öi lööngö mikahkūö tö minë inlōnti lamöktö in ngam töhet kumlēḵ. 2 Akahalōn yin hē yīö misī ing panam* ngaich halō-oikūö yī-ö, hachō-oikūö inrē öi vë-ekūö minë töng öt ṙò-òvö insā, ngaich öp kū-ötī cha nö hachōngen yīö ngaich ngatī inlahen yī-ö. 3 Lōnu pöri chū-ö tö yīö öi akahakūö, yěn ōt tö hōḵnyu ṙô tö ngam töhet kumlēḵ ngam Tēv, ngaich öthō anga-aṅ nö ngö ṙô: “Tötkôlò an Yēsū!” hēk öt ōt tökô nö ngö ṙô yěn öt īnu tö ngam töhet kumlēḵ: “Mā an Yēsū!”
4 Ṙōlkangen nun minë inlōnti, höng hěng pöri ngam töhet kumlēḵ. 5 Ṙōlkangen nun minë la-en mineukṙen, sön pöri ngam Mā nöng hěng. 6 Ṙōlkangen nun minë la-en tö kēkaṙen, sön pöri ngam Tēv nöng hěng ngam kamëtö ngih la-en nö i taṙòkhöre tarik. 7 Sā inlahen ngam töhet kumlēḵ pöri nö meūkö nö la-evṙen nö in ngòh tö hěngtak tarik, ngaich chö-öinytö yanöölen yip taṙòkhöre anga-aṅ. 8 Sā yip tahëng nö teūngen tö inlōnti re nö heuveū-eu ṙô nö vënyö ṙô* mikah nö löktö im töhet kumlēḵ, rīkre yip tahëng nö löktö in e angū-ö kumlēḵ nö vënyö nup ṙô mikah elmat, 9 rīkre yip lamöktö in e angū-ö kumlēḵ nö teūngen tö inlōnti re nö ṙatö-ellōnre, rīkre yip tahëng nö löktö in e angū-ö kumlēḵ nö halanken tövāhavö, 10 rīkre yip tö teūngen tö inlōnti re nö kēken nup tökiröng la-en, rīkre yip ameūken nup yamih, rīkre yip tö heuveū-en nö ngëichken minë ṙô yěn lamöktö in ngam Tēv hēk yěn hö-ö, rīkre yip tö heuveū-eu ṙô nö ṙôtö tahëng ëlô* hēk rīkre yip tö heuveū-en nö translēt minë tahëng ëlô nö mikahtö elnang.* 11 Höng hěng pöri ngam töhet kumlēḵ ngam töla-evṙen tö në taṙòkhöre la-en, ngaich kö hěngtak kahë-ekūö anga-aṅ tö ngih inlōnti nö asā lōn ò.
12 Lökten sā ngam alaha nöng hěng, ṙōl pöri minë pak e hēk pòrô yěn ṙōlkangen minë pak ngam alaha, sön angū-ö nöng ṙòkhöre nöng töng hěng nö alaha, ngatī ṙēngen ang Kristū. 13 Pòrô Yahūti hēk Krīk, pòrô töhakövö, töthakövö, ṙòkhöre ayī-ö öi kēḵ ngam vinôkö im töhet kumlēḵ, pò hī öi hòṅ hēngö alaha hēk höng hěng ngam töhet kumlēḵ kinë-ekūö hī öi ṙòkhöre.
14 Kô-en, öt vī-ilre an ngam alaha nö löktö in ngam töhěng pak, pön löktö in minë tö ṙōlkangen pak ngam alaha nö vī-ilre. 15 Yēḵ ngam kalröön nö ngö ṙô: “Hö-ö chin chū-ö öich kël, lökten öich öt pak ngam alaha,” ngaich angū-ö hòng min lāinyngen e nö öt pak ngam alaha? 16 Ngaich yēḵ ngam nang nö ngö ṙô: “Hö-ö chin chū-ö öich mat, lökten öich öt pak ngam alaha,” ngaich angū-ö hòng min lāinyngen e nö öt pak ngam alaha? 17 Yěn ṙòkhöre öre ngam alaha nöng mat ngaich sitih inlahen min öi hang? Yěn ṙòkhöre öre ngam alaha nöng nang, ngaich sitih inlahen min öi tong? 18 Öp tölöng pöri nö imat ngam Tēv ngatī tī anga-aṅ nö ṙāḵ chūök minë pak alaha nö i chūök u.
19 Ngaich yēḵ u öre nö ṙòkhöre nö töng hěngren nö pak ngam alaha, alaha hòng öre angū-ö? 20 Ngaich pöri nö ṙōlkangen minë pak ngam alaha, sön pöri nöng hěng ngam alaha. 21 Ötkô ön ngam mat nö ngö ṙô nö im kël, “Sōḵ chin tö meh,” hēk ötkô ngam kui nö ngö ṙô nö in minë kalröön, “Sōḵ chin tö meh.” 22 Ngam pak ngam alaha pöri töt kalē-en tö nup tahëng tölōn hī, kô-en angū-ö nö tötṙanāngen, 23 ngaich nup tūmö pak alaha hī tökūöṅnö minlēḵken tö lōn hī ngaich kahumngen u ayī-ö öi milēḵken u, ngatī inlahen tī ayī-ö öi in nup tötvai pak alahare öi hameuktö minlēḵṙenre tö u. 24 Öt uroh pöri nup tövai pak alaha hī nö ngatī inṙūötken, sön pöri ngam Tēv nö ngatī tī nö vī ngam alaha hī tö minë pak tö kūöṅnlö minlēḵken ngaich hòṅ mötlö minlēḵken anū-ö tö hī. 25 Hòṅ ngam alaha nö öt harēvngöre tö höö, kö haṙūötken minë tūmö pak alaha höö pöri. 26 Yěn hěnghang ngam pak alaha tö chök ngaich ṙòkngöre minë pak alaha nö hol e nö chök. Yěn hěng ngam pak alaha tö teūngen tö minlēḵkenre ngaich ṙòkhöre minë pak alaha nö hanôltö ṙanamlōnre nö in e.
27 Alaha Kristū yin yī-ö ngaich kö hěngtak yī-ö öi pak alaha ò. 28 Ngaich kö kē-ěkūö tö hěngtak ngam Tēv tö chūök cha nö el ngam māṅ, raneh tanīnöṙô, innëtö pròfět, linūöyö mahaköphöti, unôichrit e yip tökirööngö la-en, hēk tö aṅhavin tö inlōnti re nö halanken tövāhavö, mameukṙen yip tö hayöökaṙen, töheuveū-en nö hachōḵ tölöng talöökö hēk töheuveū-eu ṙô nö ṙôtö tahëng ëlô. 29 Ṙòkhöre hòng cha-a nö tanīnöṙô? Ṙòkhöre hòng cha-a nö pròfět? Ṙòkhöre hòng cha-a nö mahaköphöti? Ṙòkhöre hòng cha-a nö la-evṙen tö minë tökiröng la-en? 30 Ṙòkhöre hòng cha-a nö teūngen tö inlōnti re nö halanken tövāhavö? Ṙòkhöre hòng cha-a nö teūngen tö inlōnti re nö ṙôtö tahëng ëlô? Ṙòkhöre hòng cha-a nö translēt nö mikahtö elnang? 31 Iṙūöhen pöri yī-ö öi pītnyöre* öi kēḵ minë tökiröng inlōnti aṅ im Tēv, hameukhömat yīö pöri chū-ö töngamuh tö ngam töt insā-vö talöökö.