I minë-eny Efisös
4 Lökten chin Chū-ö hòṅ kē-ě töpòkūöre öich mahaköp in ngam Mā, hòṅ aṙētu ṙô chin tö yīö tö ngam tinrīken yīö nö töhō-ovö nö sā ngam invëtö yīö ngam tö ngaich nö kētu nö in yīö, 2 holtö inyāichngö, ṙanëmen, manööyö hēk ṙināpö höö im hanangenlōn, 3 kalah haköpkö ngam lanāmö ihôi re ngam nyamëkngen yīö öi im hinëngö, lökten yīö mihôiṅ öi teūngen tö ngam töhet kumlēḵ. 4 Höng hěng an ngam alaha, hěng inrē ngam töhet kumlēḵ, sā ngam mineūka inrē nöng hěng, ngam invëtö yīö hòṅ yīö öi teūngen, 5 höng hěng ngam Mā, hěng ngam ṙinatö-ellōn, hěng inrē ngam vinôkö, 6 hēk höng hěngtak ngam Tēv yip taṙòkhöre, ngam Yöng, ngam mi-ikui taṙòkhöre hēk lamöktö i taṙòkhöre hēk töla-evṙen nö i taṙòkhöre.
7 Kö hěngtak in öi kē-ěvkūö tö Kristū tö ngam tötṙāyu inlōnti, asā e ngam tökiröng miṙēḵlōn nö kētu nö ikui hī öi kö hěngtak. 8 Lökten ngam līpöre nö ngö ṙô: “Hē ò nö yônlö nö lātulöng ngaich kēḵ yik töhaköövö anga-aṅ ngaich kētö inlōnti anga-aṅ aṅ i tarik.” 9 ‘Yônlö anga-aṅ,’ tö sitih manah angū-ö? Yônti anga-aṅ nö in minë kamngö, tö ngö manah, yônti nö ing panam. 10 Ngam yamônti, anga-aṅ an yamônlö nö lātulöng el halīöngö, hòṅ ò nö hateungngen minë taṙòkhöre ṙô.
11 Ngaich rīkre yip tövīlöng tö ò nö tanīnöṙô, rīkre pròfět, rīkre ma-ahangkö ngam tölöök inhānga,* rīkre yōm sīṅp hēk mahaköphöti, 12 hòṅ yip töhet tarik nö harūnö* ngaich la-evṙen tö ngam la-en mineukṙen hēk iṙūöhen sanīöplöre ngam alaha Kristū, 13 hanöng sā hī ṙòkhöre öl im ṙinatö-ellōn hēk im hinëngö öi kēḵ ngam tölöng mikah elmatre tö inlahen ngam Kūön ngam Tēv hēk yěi öl sölta im tölngö ṙôkö tarik i rò-òlòng sanööḵngö Kristū. 14 Lökten in ayī-ö ngaich öi öt sā yip nyīö töngamuh, yip töng hëmngö nö in nup ṙô tö minyôiny hēk heuingö öi in nup inköphöti, pò cha nöng hōḵ nö in nup ṙô yip tarik, nup tö holtö inchīlö hēk heuneū-enre nö hachōngen cha nö in minë tövaich ṙô. 15 Ta-a pöri töi kò-òṙô öi ṙò-òvö hēk holtö hanangenlōnre öi in nup taṙòkhöre ṙô öi kū-ö urěh in Kristū, ngam kui hī. 16 Löktö in Kristū minë tūmö pak ngam alaha nö ṙòkhöre nö tapöre nö in höö ngaich löktö in minë tanap minë töt ṙanāngen la-en nö holṙen höö, yěn ṙòkhöre minë tūmö pak ngam alaha nö lööngö inlahen nö la-evṙen ngaich sīöpö ṙôkö ngam alaha hēk ngönlöre inrē nö im hanangenlōn.
17 Lökten Chin öich ngö ṙô tö yīö öich ikūö ngam Mā hēk kētö inlēnö yīö, tö yīö öi ui asīntöre öi sā yip tarik aṅ ngih panam töngamuh, yip töng lamök in nup kuilōnre, nup töng chanök alaha.* 18 Höng köpsöṙen cha-a nö öt akahakūö hēḵ ngëḵngöre inrē ngam ellōn* cha, lökten ngam mikah cha nöng el sinngūlö ngaich marôvat cha-a tö ngam nômö, ngam kahëtö ngam Tēv. 19 Ngaich takô nöng hö-övö ngam miṙē-ěv cha,* lökten ngaich cha-a nöng kôten nö in minë töt sinrōngkūö la-en,* hòṅ cha nö la-evṙen tö nup taṙòkhöre töchōich la-en ngaich hēk inrē nö yiklöre ellōn nö la-evṙen tö u.
20 Öt ngatī inköpti pöri yī-ö tö inlahen Kristū, 21 yēḵ yīö ngaich hang öi löktö in ò hēk löktö in ò inrē öi haköptu, pò ngam kanô-en nö in Yēsū. 22 Haköptu yī-ö misī, tö yīö öi hòṅ luhngen nup töhötṙeh tinrīkenre ngaich kavalngen u, nup tö sā nup tinrīken yīö urěhngöre hēk asā nup kuilōn ò, nup mahalō-ongkūö ò nö chuh in ngam ötlanöökö. 23 Hēk tumfömlö ngam mufēre hēk tumfömlö ngam inlahenre yī-ö öi ngëicha, ngam mi-in yīö, 24 ngaich chumhënlöre tö ngam tufömngöre tinrīken, ngam tövī-i nö löktö i kuilōn ngam Tēv ngaich asā nup töhet inchöngten hēk asā ngam kanô-en chaniplöre.
25 Lökten yēḵ yīö öi ṙūöhöngre tö ngam inchīlö ngaich töngamuhten yī-ö öi holtö kanò-òṅ ṙôre öi ṙò-òvö öi in yip holre, pò hī ayī-ö öi töṙōlkangen öi pak ngam tö hěng alaha. 26 Yěi pòrô yīhi tanāinyö, uh pöri öi köölö fālen, un meutti ngam tavūöi tö rôta lanīnö yīö, 27 hēk un rēhěn nö kētu ṙētak* ngam Satān.* 28 Ngòh mu-ulāiya, hökngen ò yēḵ töngamuh nö un ulāiya, kalēḵ alaha pöri nö la-evṙen hēk holtö öt michūṙenre inrē nö la-evṙen, hòṅ ò nö aṅhavin tö heuneū-enre nö kē-ěkūö yip töhakten. 29 Un hěng töchōich* ṙô lamöknyö elvāng yīö, höng nup tölöök pöri lamöknyö elvāng yīö, nup tölöngö ṙētak nö kētö inreuskö alaha, hòṅ yip hamang nö yöölen. 30 Uh yin miṙivngölōn ngam töhet kumlēḵ ngam Tēv, ngam tö mikahayö nö in yīö ik sakāmö hē yīö öi löktö im ṙāi ṙinānyö min öi ṙānyu.
31 Ṙūöhöngre yin tö nup taṙòkhöre kumnyahlōn, tanāinyö, lanīnö, hinū-a hēk ötlinëkôre, holre inrē tö nup taṙòkhöre ṙô töchökhutī. 32 Holtö neūkölōnre pöri öi in höö ngaich hameuktö ṙanëmenre öi kö holtö ellōnre öi aṙēlen höö, sā inlahen ngam Tēv nö löktö in Kristū nö holtö ellōnre nö aṙēlen yīö.