Raneh chitri Pītör
4 Hē Kristū nö kihngen nö im alaha ngaich hòṅ sā mufē hēk tinrīken* ò yī-ö öi hīnöre, pò ngòh tarik tö kihngen, ṙāngenre anga-aṅ nö im tökööl, 2 hòṅ ò nö öt hateungngö kuilōn yip tarik in ngam tö ōttit ṙētak ò nö aṅ, hateungngö kuilōn ngam Tēv pöri anga-aṅ im rò-òten ò nö aṅ. 3 Pön ngaichö rò-òten ngam inteungngö kuilōn më tarik aṅ ngih panam, pò yīö sin öi in minë töt sinrōngkūö la-en* öi öt ṙāpöre öi in nup inteungngö kuilōn ngam alaha, pōivat òk ka-eūt, in nup inṙamlōn, kasalkūöre òk ka-eūt hēk höng in minë sin-òkkūö vinë-ekūö insātēv. 4 Kūö yīö pöri ngaich sōḵ kiyūötöre el ngam tilin tötlöng, lökten cha-a nö pingangkūö hēk ötlēḵkö ṙôre tö inlahen yīö. 5 Hòṅ kētö kinṙöötöre pöri min cha-a nö in ò ngam hamīnöre nö kahòkken yip tö aṅ tarik hēk tökapah inrē. 6 Ṙën yik tökapah nö ahangtu nang tö ngam tölöök inhānga, hòṅ cha nö asā ngam töhet inchō-okūöre tö ngam töhet kumlēḵ nö aṅ. Rö-ö min cha-a pön höng sā inlahen kinṙòkken yip taṙòkhöre tarik.
7 Röhten pöri öp manāngen në taṙòkhöre. Lökten havai mufēre hēk hööngöre* im vinë-ekūötēv. 8 Ngam tö mööḵlö pöri, öi kô-en hanangenlōn tö höö, pò ngam hanangenlōn nö ruptökui nup taṙòkhöre tökööl. 9 Uh yin uyëkuvö höng iṙūöhen pöri öi kö meukṙen höö. 10 Ngam tökiröng miṙēḵlōn ngam Tēv ngam tö ṙōlkangen inmeuknyi, yī-ö yin tö akaha yōm chehen, sā yīö ngaich öi mahayōmken chehen ngaich nup taneūngen yīö inlōnti öi kö hěngtak, yūsö u yī-ö öi meukṙen yip tahëng. 11 Yěn tarīku tö ṙò-òvö ngaich höng löknyö in ngam töhet ṙô ngam Tēv nö ṙò-òvö. Yěn tarīku mameukṙen ngaich höng hayönglenre nö im kumlēḵ ngam kahëtö ngam Tēv, hòṅ ngam Tēv nö harōilöng nö i nup taṙòkhöre nöng löktö in Yēsū Kristū. Nööinyö ò hēk kumlēḵ ò nöng örheūheu. Āmen.
12 Kahōlö, uh yin pingangkūö tö ngam töhūkūö tameūiyö elhôi yīö, nö sā tö harīktöre inlahngen, pò ngam tameūiyö nö sā ṙēngen kinlaha yīö. 13 Ĕhten pöri yī-ö öi ṙamlōn öi hol Kristū öi im kanihngen, hòṅ ngam nööinyö ò yěn hameuknyu min ngaich mötlö ṙôken ṙanamlōn hēk kumchikṙen yī-ö. 14 Yēḵ yīö pöri öi sūöichka inlahen* öi chö-öinytö ngam minë-eny Kristū ngaich ṙamölōn yī-ö, pò ngam nööinyö ngam töhet kumlēḵ ngam Tēv nö in yīö.
15 Un hěngtak pöri in yīö tö kihngen tökūöre nö fëlhang, ulāiya, in nup tötlöök la-en hēk höng kētöre nö in nup la-en yip tahëng. 16 Yěn ōt pöri tö kihngen tökūöre nö Kristīön ngaich un sirōngkūö anga-aṅ, hökngen ò nöng iṙūöhen nö hapōilen ngam Tēv nö kē-ě e angū-ö minë-eny. 17 Yih an ngaich ngam töhalēniṙen ṙētak hē ngam kinṙôka min ngaich nö rěhlöng inlahen nö i patī ngam Tēv. Yēḵ e nö rěhlöng inlahen nö in hī, ngaich sitih inlanken min yip tö sōḵ nö hang ngam tölöök inhānga lamöktö in ngam Tēv? 18 “Hēk yěn kihngen yip tölöök tarik nö teūngen tö ngam inyööken ngaich sitih inlahen min yip töt lamöklōn ngam Tēv hēk tököölö fālen?” 19 Lökten yip tö kihngen tökūö inteungngö kuilōn ngam Tēv, la-evṙen yin cha-a inrē tö tölöök nö kētöre nö eltī ngam tökô-en Vamī-il.