I minë-eny Filipī
2 Yēḵ yīö hòṅ hareuskö alaha höö in Kristū, hòṅ hangëken höö im hanangenlōn, hòṅ hěngṙen mufē, hòṅ hangenlōn tö höö hēk hòṅ hameuktö miṙēḵlōnre inrē tö höö, 2 ngaich hòṅ hēngö mufē yī-ö hēk hòṅ hěng inrē ngam hanangenlōn yīö tö höö, hòṅ in yīö ngam hinëngö hēk hēngö mufē elkuilōn inrē yī-ö, ngatī inlahen min yī-ö öi haṙamlōn chu. 3 Ui aṅhavin tö ngam tanāilölōn hēk inngëḵṙö, holtö inyāichngöre pöri öi mööḵlö mat tö yip tahëng töre, 4 un höng ngëichkö yanöölenre ngòh tö hěngtak, ngëichkö yanöölen yip tahëng pöri holre.
5 Sā mufē hēk tinrīken Kristū Yēsū pöri yī-ö, 6 pòrô anga-aṅ nö tö sā ngam Tēv, öt hěngheuh pöri anga-aṅ nö hòṅ fēkö ngam inlahenre nö hòṅ haṙongtöre nö in ngam Tēv. 7 Ngaich pöri anga-aṅ nöng harööḵngö* nup tö sitih taṙòkhöre hēk sā inlahen öp tö hěngtak mahalanṙen ngaich vī-ingre nö sā tarik. 8 Rö-ö nöng angū-ö, pön hē ò nö yih nö vī-ingre nö sā tarik* ngaich hayāichngöre anga-aṅ hēk uroh inrē anga-aṅ nöng hökngenre nö kapah, heūṅ, kapah nö im chōn inkihten,* kūöre nö hang chööngö. 9 Angū-ö lāinyngen ngam Tēv nö ṙūöhöl kamngö ò hēk nö lātulöng nö hapōilen ò ngaich hameuktö miṙēḵlōnre nö kētö minë-eny ò töp lāmatulöng tö në minë-eny nö ṙòkhöre, 10 hòṅ yip më-el halīöngö hēk mi-ing panam hēk yip lāmataṙeū töng tumlat, ṙòkhöre cha-a nö sulngöre nö i minë-eny Yēsū, 11 hòṅ në taṙòkhöre litāk nö hō-en Yēsū Kristū nö Mā hī, hòṅ ngam Tēv, ngam Yöng hī nö ha-öinyö.
12 Yī-ö hanangenlōn chu kahōlö, örheūheu yin öi hang chööngö, hē chu öich in yīö ngaich hang inrē yī-ö hēk pòrô chū-ö öich marôvat tö yīö ngaich mötlö inlahen yī-ö öi holtö ṙanamlōnre öi hang chööngö, ngatī inlahen yin öi holtö pinhë-eṅkūöre öi la-evṙen öi chö-öinytö ngam inyöökenre. 13 Pön höng ngam Tēv mahangönken yīö nö asā ngam kuilōnre ngaich anga-aṅ vamīhöt ellōn yīö hēk anga-aṅ inrē kamëtö kumlēḵ yīö öi hateungngen u. 14 Iṙūöhen la-evṙen tö minë taṙòkhöre la-en, öi ui uyëkuvö hēk ui la-al ṙô höö inrē, 15 hòṅ yīö kaheūkö öi kūön ngam Tēv öi tökô-en hēk töt fāluṙen inrē ngaich öt pitōtuvö öi elhôi ngih tökuròk hēk tötlöng tumkölchap öi sā mineūkö yanāngö ngam ëāṅvö öi elhôi ngih panam, 16 ngaich köptī öi kiṙapkö ngam ṙô ngam nômö. Hòṅ chu öich chööinyu ṙanamlōn ip sakāmö Kristū, tö chu öich höng rö-ö chök alaha im finālö hēk öt yanëḵngen inrē ngam kumlēḵ alaha chu. 17 Pòrô in nup tökētu tö yīö hēk nup töhet la-en* yīö nup lökten yīö öi ṙatö-ellōnre, tö chu öich ṙöstu öich sā inlahen ngam tö-òkö tökētu ngaich sön min Chū-ö höng ṙamölōn hēk hanôltö ṙanamlōnre inrē min Chū-ö öich in yīö öi ṙòkhöre. 18 Ngatī yī-ö inrē öi hol Chu öi ṙamölōn hēk kumchikngenre inrē.
19 Meūka Chin töngamuh yěn lōn ngam Mā Yēsū ngaich veūten min Chū-ö öich tīnten Timôtī nö chuh in yīö, hòṅ Chu öich teūngen tö inreuskö alahare öich hang inlahen yīö. 20 Pön öt tahëngu in Chu tö sā inlahen tinrīken ò, öp tökô-en ellōn min nö chumkūöṙen tö yīö. 21 Pò yip taṙòkhöre tahëng nöng ngëichkö yanöölenre, öt fēkö ngam la-en Yēsū Kristū pöri. 22 Akahakūö pöri yī-ö tö inlahen ò nö sā inlahen öp kūön hamòlṙen öp yöngre nö la-evṙen, ngatī inlahen anga-aṅ nö kalēḵ alaha nö holṙen chu öich tānyö ngam tölöök inhānga. 23 Lökten Chin maheūṅkku, yēḵ Chu min öich höng akahalōn töp inlankenre ngaich tīnten ò min Chū-ö nö in yīö. 24 Hēk ṙinatu-ellōn Chū-ö öich in ngam Mā, tö chu min inrē öich veūten chuh in yīö.
25 Tötṙanāngen pöri tö lōn chu ngam tīnintö Epafròtitös nö in yīö, hol chu anga-aṅ, hamòlṙen chu hēk kumyung nö tö söömtu tö yīö nö tarik chu nö mahayööken nö sā inlahen mahalanṙen, 26 hòṅ kapahare anga-aṅ nö hòṅ meukkūö yīö öi ṙòkhöre hēk haṙivlōn takô anga-aṅ, pò yīö öi hāngö ò nö pōihangen nö vāhavö. 27 Pōihangen takô anga-aṅ nö vāhavö ngaich nöng hòṅ chuh in ngam kinpaha, hameuktö miṙēḵlōnre pöri ngam Tēv nö in ò, rö-ö nöng in ò, pön in chu inrē, hòṅ chu öich öt tanta miṙivlōn. 28 Lökten chin öich veūten takô öich tīnten ò nö chuh in yīö, hòṅ yīö min hēk öi ṙamölōn öi meūkö ò ngaich kūöṅngöre min ngam pinṙūtölōn chu, 29 pön angū-ö ngih inlahen hī öi in ngam Mā öi holtö ṙanamlōnre hēk nganöötöre öi ha-öinytö yīhi ò hēk pōiṙāi mat tö më tö ngatī inlahen prötör. 30 Pò ò nö öt fēkö ngam nômöre töpòkūö ngam la-en Kristū* hēk öhtö hòṅ kapah inrē, hòṅ ò nö hateungngö ngam hanakten yīö öi umuh ngaich ichūök yīö nö meukṙen chu.