Raneh chitri Pītör
2 Lökten ṙūöhöngre tö nup taṙòkhöre ötlanöökö, inchīlö, innyatkö elmat, ranāinyngö hēk vinë-eng uk nang. 2 Sā inlahen öp tö fömnyöre finötnyö tëṅnö nyīö öi chö-öinytö ngam töhet* tūt, ngam tö ngö, asīöp ngam tökalēḵ neūköre öi in ngam ṙô ngam Tēv, hòṅ yīö iṙūöhöröön sanīöpö ngaich teūngen tö ngam inyöökenre, 3 pò yīö öi hakôtenre* öi kalah ṙôken neūkölōn ngam Mā.
4 Ngam Mā an tö aṅ ihong, ngam tö sō-ovö tö yip tarik, tökatöllöng pöri anga-aṅ tö ngam Tēv hēk töpōṙāi nö imat ò. Yihtöre yī-ö öi in ngam Mā, 5 lökten inrē yī-ö öi tö aṅ ihong ngaich löktö im töhet kumlēḵ öi mānlöng öi sā ṙēngen öp tökiröng patī. Ṙën angū-ö nö mānlöng, hòṅ yīö öi krup yip töhet kūönṙô ngaich löktö in Yēsū Kristū öi kētö nup tökētu ikūö ngam Tēv, nup tö sā kuilōn ngam töhet kumlēḵ hēk töhō-ov tö ò. 6 Pön ngö ṙô ngam līpöre: “Yěh meuk! Ṙāḵten ngam tökatöllöng Chin ihong i Siyôn, angū-ö ön ngih töpōiṙāi ihong sinkeukngö, ngam tö vītu machööḵlö tö chu ngaich yip ṙamatö-ellōnre nö in ò, öthō min cha-a nö haṙivlōn.”*
7 Pōiṙāi angū-ö nö in yīö, pò yīö öi ṙatö-ellōnre, ngö ṙô pöri ngam līpöre nö ṙô tö inlahen yip töt ṙamatö-ellōnre, “ngam ihong tö sō-ov tö yip mamānö ngaich anga-aṅ nö vītu nö yöngkūö minë ihong tanapkūö ngam patī” 8 ngaich chö-öinyten cha anga-aṅ “nö vītöre nö ihong lökngen fanukngö hēk vītöre anga-aṅ nö rôngö tö haṙivlōn tī tö cha.” Ṙën cha-a nö fukngö, pò cha nö öt hang chööngö ngam ṙô. Ngatī inlahen ngam manāngen cha. 9 Yī-ö pöri “tökatöllöng öi tarik, krup yip tökôlò kūönṙô, töhet panam hēk tökatöllöng tarik ngam Tēv, hòṅ yīö ikūö në taṙòkhöre panam öi vamënyen ngam tökiröng tinrīken ò”* ngam ṙamānyen yīö ṙā-ang el ngam sinngūlö ngaich havëten yīö öi el ngam töt insā-avö hanātö re. 10 Pò yīö sin misī öi öl öi tarik ngam Tēv inuk ṙētak ngaich pöri töngamuh öi tarik ò, töt teūngen yī-ö sin tö ngam neūkölōn ngaich pöri yī-ö töngamuh öi teūngen tö ngam neūkölōn.
11 Kahōlö, hòṅ aṙēḵtu ṙô Chin tö yīö öi sā inlahen yip aṅ tahëng panam, sā inlahen yip töt marô-òten öi ing panam öi ṙūöhöngre tö nup kuilōn ngam alaha, nup töng mi-iyöngö yīö nö hòṅ la-al yīö. 12 Havai nup tinrīkenre yin elhôi yip tarik, hòṅ cha yēḵ cha nö sūöichkö fālen yīö nö in nup tötlöök la-en ngaich kôtamat nö meuk nup tölöök la-en yīö ngaich hapōilöng ngam Tēv ip sakāmö ò min nö yih nö chöha.
13 Chö-öinyten ngam Mā yin tumṙeūtöre tö nup chööngö vahī tarik, tumṙeūtöre tö ngam rācha, pò ò nö tökirööngö minā-aṅ 14 hēk tumṙeūtöre tö yip mahayöng, më tö tīntu nö kētö sācha yip tötlöökö la-en hēk ameū yip tölöökö la-en. 15 Pön angū-ö kuilōn ngam Tēv tö yīö öi löktö in nup tölöök la-enre öi tilupngö elvāng* yip tökulō-ovö, yip töng öt akaha elmat nö ṙôtö inlahen yīö. 16 Sā inlahen yip tarik yin töthaköövö, uh pöri ngam ṙinānyö nöng löktö inlahen yīö öi vīkö inlahenre kēken nup tötlöök la-en, sā inlahen mameukṙen ngam Tēv pöri. 17 Milēḵṙen tö taṙòkhöre tarik, hangenlōn tö yip taṙòkhöre prötör, pa-ekūö tö ngam Tēv, milēḵṙen tö ngam rācha.
18 Hòṅ tumṙeūtöre yin më mahalanṙen tö më yöngṙenre ngaich sā öp tölöng pinhë-eṅkūö cha ngaich hòṅ ngatī pinhë-eṅkūö cha-a, rö-ö cha-a nö hòṅ tumṙeūtöre tö yip yöngṙen, yip tölöök hēk tö milēḵṙen, hòṅ ngatī inlahen pöri inrē cha-a nö in yip töt ṙanamulōn nö in cha. 19 Pön yěn ōt mahaköpkö ngam töhet elkuilōnre nö ikūö ngam Tēv nö la-al minë kanihngen* hēk ötlinëkenre ngaich tölöök angū-ö nö imat ngam Tēv. 20 Yēḵ meh fōho öm chö-öinytö minë fālenre hēk la-al u inrē ngaich asuh öp ineū-eu nö in e? Yēḵ meh pöri öm chö-öinytö ngam tölöök la-en öm kihngen ngaich tölöök angū-ö nö imat ngam Tēv.
21 Pön angū-ö invëtö yīö öi lök el ngih talöökö, pò Kristū inrē nö kihngen töpòkūö yīö ngaich ṙā-akūö yīö anga-aṅ tö inchōḵten, hòṅ yīö öi haröhtöröönre öi tömköröön ò. 22 Öt fāluṙen anga-aṅ, ötrēhěn nö ṙôtö nup töchōich nö löknyö elvāngre. 23 Hē ò nö miṙē-ěyö* ngaich öt havahalvahre anga-aṅ nö miṙēngen cha.* Hē ò nö hakihtuṙen ngaich öt pinhëṅ-elkūö cha anga-aṅ, höng kēten u pöri anga-aṅ nö eltī ngam Tēv, ngam Tökô-en kamhôka. 24 Hē ò nö kilöllöng nö irōi ök chōn ngaich keun në tökööl hī anga-aṅ nö i alahare, hòṅ hī öi ṙānyu öi ṙā-ang in minë tököölre ngaich la-evṙen tö nup tölöök la-en irò-òtenre öi aṅ. Ngaich “löktö in minë vah ò yī-ö öi lööken.” 25 Pò yīö sin öi höng sā inlahen nup sīṅp, nup tölō-ongkūö ngaich pöri töngamuh öi havan öi in ngam yōm sīṅp re hēk ngam amahtö ngam nômö yīö.