Inhānga Kahūich Yôhan
18 Unôichrit ṙô ò ngaich nö ṙò-òv tö në ṙô, holröön yik haköptöre ngaich anga-aṅ nö havāngngöre tök Töhëm mak Kitròn* nö chuh in ök panô-òṅ, kuhēthötre ngaich anga-aṅ tö yik haköptö ò nö chuh el ök panô-òṅ. 2 Akahakūö ök mahachīlngövah ò ang Yūta tö ngih chūökö, pön örheūheu ang Yēsū nö holtö yik haköptöre nö chuh in e. 3 Lökten ang Yūta nö kumtö krup yik kumyung, yik amahtö yik Feresī hēk mākūö kūönṙô nö chuh muh, kumtö ëāṅvö cha-a hēk aṅhtī re inrē. 4 Akahakūö ang Yēsū tö nup inlankenre min, lökten anga-aṅ nö chuh lākūö cha ngaich ngö ṙô: “Achīö öp chahöh yīö?” 5 Ngö ṙô ngaich cha-a: “Yēsū öp aṅ Nāsaröt.” Ngö ṙô ngaich ang Yēsū nö in cha: “Chū-ö chin.” Höng söktöhëich inrē ök mahachīlngövah ò Yūta nö in cha.
6 Hē Yēsū pöri nö ngö ṙô, “Chū-ö chin,” heūlngöre ngaich cha-a ngaich fukngö nö el tumlat. 7 Lökten ang Yēsū nö havannyö ṙô re nö hatöönö cha, nö ngö ṙô: “Achīö öp chahöh yīö?” Ngaich ngö ṙô cha-a: “Yēsū öp aṅ Nāsaröt.” 8 Ngö ṙô ngaich ang Yēsū: “Ngaich chin öich keuheūtö ṙô öich in yīö tö chu öich chū-ö. Yēḵ yīö öi chöhö chu ngaich hökngen vē nö kiröönngöre.” 9 Ṙën angū-ö nö ngatī hòṅ ngih ṙô ò nö teungtökūö: “Vē kahëtö meh in Chu, öt hěngtak tö chatngen in cha.”
10 Ahāṅvin ang Sīmōn Pītör tö sanët, kēnyö ök sanët re ngaich anga-aṅ ngaich fangngö ök lāhāmö nang ök mahalanṙen ök mākūö kūönṙô. Malkös minënyi ök mahalanṙen. 11 Ngö ṙô ngaich ang Yēsū nö in Pītör: “Hayulhöt ngam sanëtre man. Ötkô hòng ṙöng chū-ö òkkūö ngam kulah kahëtö ngam Yöng chu?”
12 Ngaich yik kumyung tö yik yōmkūö kumyung hēk tö yik amahati tö tīntu tö yik Yahūti nö kē-ě* Yēsū ngaich nyëkngen ò. 13 Urěh cha-a nö kē-ě ò nö chuh in Annas, pön yöng pīhö Kaifas anga-aṅ ök mākūö kūönṙô ik hē e angū-ö samyeūheu. 14 Anga-aṅ ön ngòh Kaifas tö ṙò-òvö nö in yik Yahūti sin nö yanöölen cha min angū-ö yēḵ ngòh tö hěngtak tarik nö kapah nö chö-öinytö taṙòkhöre tarik.
15 Höng chūkörit Yēsū ang Sīmōn Pītör. Ngatī inrē ök tahëng mahaköp ök mikahkūö ök mākūö kūönṙô ngaich holröön Yēsū anga-aṅ nö kuhēthötre nö lākūö ngam patī ngam mākūö kūönṙô, 16 Höng sökhak pöri ang Pītör nö lātunyī nö lā-uk inkūp.* Ngaich ök tahëng mahaköp ök mikahkūö ök mākūö kūönṙô, kunyī-inyre ngaich anga-aṅ ngaich vë-ekūö ök amahtökūö inkūp ngaich kumten Pītör ngaich anga-aṅ nö kuhēthötre. 17 Ngaich ök kikānö mahalanṙen ök amahtökūö inkūp, nö ngö ṙô nö in Pītör: “Më-eṅ man kòl inrē mahaköp öm in ò, yiröh?” Ngaich ngö ṙô anga-aṅ: “Hö-ö chin chū-ö.” 18 Sökhak yik mahalanṙen hēk tö yik amahati yik mahameūyöre nö ikūö tameūiyö tökūö laneūichöre. Ngatī ang Pītör nö sökhak nö in cha nö hameūyöre.
19 Hatöönö Yēsū ngaich ök mākūö kūönṙô tö inlahen yik haköptö ò hēk tö nup inköphöti inrē. 20 Ngö ṙô ang Yēsū nö sapṙô cha: “Ngaich chin hameuknyöre öich ikūö ngih panam. Töng örheūheu chin haköphöti el chūök vinë-ekūötēv hēk el töhet chūök inrē, ichūök yip Yahūti nö hamūlöre ngaich öt hěng ṙô tö hayūni tö Chu. 21 Ngaich kūö yòh pöri öm hatöönö chu? Hatön yip töng hamang ṙô chu man in nup töng vahënyö chu. Yěh meuk! Akahakūö yin tö nup töng vahënyö Chu.” 22 Hē ò nö ngatī ṙô ngaich hěngtak ök in yik amahati samökhaka nö fatākkūö Yēsū ngaich ngö ṙô: “Ngatī ṙô öi kan yěi sapṙô mākūö kūönṙô?” 23 Ngö ṙô ngaich ang Yēsū nö sapṙô ò: “Yēḵ Chu öich vaichö ṙô ngaich vë-eny nang chu, yēḵ Chu pöri löngö ṙô ngaich kūö yòh öm fëlö chu?” 24 Ngaich ang Annas nöng söömten ò nöng nyëkhakṙen nö chuh in Kaifas ök mākūö kūönṙô.
25 Höng sökhak ang Sīmōn Pītör nö hameūyöre nö ikūö ök tameūiyö. Ngö ṙô ngaich yik tarik nö in ò: “Röh öm më-eṅ inrē mahaköp öm in ò?” Mahangre ngaich anga-aṅ nö ngö ṙô: “Hö-ö chin chū-ö.” 26 Hěngtak inrē ök mahalanṙen ök mākūö kūönṙô samökhak nö umuh, hanöng kisānö ök tarik ök tö fāngi nang tö Pītör, ngö ṙô ngam mahalanṙen: “Röh öm më-eṅ taheui maheuk chu el panô-òṅ öm in ò?” 27 Hēk pöri ang Pītör nö mahangre ngaich ilööṙen ök hayöm nö takeūk.
28 Ngaich kēngen Yēsū cha-a nö ṙā-ang in Kaifas nö chuh patī ök mahayöng. Ṙētak peuheū angū-ö hē e. Öt kuhēthötre pöri cha-a nö el patī ök mahayöng, hòṅ cha nö öthuich ngaich nyā ngam nyīna-aṅ Pāska. 29 Lökten ang Pailět nö kunyī-inyre ngaich yihtöre nö in cha nö ngö ṙô: “Asuh öp falngen ngòh tarik töp lökten yīö öi kumten ò öi chuh hih?” 30 Ngö ṙô ngaich cha-a: “Yēḵ ò öre nö töt fāluṙen* ngaich öthō öre īhö kēten ò in meh.” 31 Ngö ṙô ngaich ang Pailět nö in cha: “Kēḵ an yin yī-ö ngaich kahòkken ò öi asā nup chööngöre.” Ngö ṙô ngaich yik Yahūti nö in ò: “Öt tölöṙô in īhö öi fël tarik öi asā minë chööngöre.” 32 Ṙënten angū-ö nö ngatī hòṅ ngam ṙô Yēsū nö teungtökūö, urěhngöre ṙô anga-aṅ nö vë-eny inlahen ngam kinpahare.
33 Havan hēk ang Pailět nö chuh patīre ngaich havëten Yēsū ngaich hatöönö ò nö ngö ṙô: “Rāchakūö Yahūti öm më-eṅ?” 34 Sapṙô ò ngaich ang Yēsū nö ngö ṙô: “Löktö in re ṙô öm kan öm ṙò-òvö hēk löktö in yip tahëng ṙöng yip vamë-eny inlahen chu nö in meh?” 35 Ngö ṙô ngaich ang Pailět nö sapṙô ò: “Yahūti öich kan chū-ö? Kēten meh yip tarik meh hēk mākūö kūönṙô nö in chu. Vë-eny nang chu man, asūp falngen meh?” 36 Ngö ṙô ang Yēsū nö sapṙô ò: “Öt aṅ ngih panam ön ngam Pūlngö chu, yēḵ ngam Pūlngö chu öre nö aṅ ngih panam ngaich kiyung öre yip mahalanṙen chu, hòṅ chu öt kētu in yip Yahūti. Kô-en pöri ngih Pūlngö chu nö öt aṅ ngih panam.” 37 Ngö ṙô ngaich ang Pailět nö in ò: “Tö hěngtak öm kan më-eṅ öm rācha?” Ngö ṙô ngaich ang Yēsū nö sapṙô ò: “Ngaich man öm ngatī ṙô tö Chu öich tö hěngtak öich rācha. Lökten Chin öich fötnyu ngaich yih öich ing panam öich vënyö ngam kanô-en. Ngòh kamë lā-a ngam kanô-en, hamang ṙô chu anga-aṅ.” 38 Ngö ṙô ngaich ang Pailět nö in ò: “Asuh öng ngam kanô-en?”
Unôichrit kinheūtṙô Pailět ngaich, kunyī-inyre hēk anga-aṅ nö chuh in yik Yahūti ngaich ngö ṙô nö in cha: “Öt maheūku chin chū-ö tö fālen ò. 39 Sā minë tö nehngenre inlahen yīö ngaich hòṅ ṙānyen ngòh tö hěngtak tarik chū-ö hē el ṙētak paratīn Pāska. Lōnu öi tö chu öich ṙānyen ngòh Rāchakūö Yahūti öich chö-öinyten yīö?” 40 Ayôṙa hēk cha-a: “Hö-ö, un ṙānyu ngòh tarik, höng ṙānyen Parapas man!” Rö-ö ang Parapas pön tö hěngtak nö tötūmu.