I minë-eny Efisös
2 Rö-ö nöng angū-ö, pò yīö öi ha-aṅlöng tö ngam Tēv, pòrô yī-ö öi kapah tökūö minë fālenre hēk tököölre inrē, 2 ngaich höng hulalhak yī-ö öi in minë tököölre, ngaich höng sā inlahen tinrīken ngih panam* hē e, hang chööngö ngam rācha yī-ö ngam mahayöng nö ikui në chehen ngih panam, keuheūtngöre chūök ngih inyööngö nö sā inlahen ngam kuföt ngaich teungtöre nö ikui yip töt hamang chööngö. 3 Heūṅ, ngatī inlahen in ayī-ö inrē misī öi elhôi yip tarik öi lök kuilōn ngam alahare, ngaich la-evṙen inrē ayī-ö öi sā lōn ngam alaha hēk mufē e inrē. Ngaich löktökūö finötnyöre ayī-ö öi sā inlahen yip tarik yip tö aṅhav kui tö lanīnö ngam Tēv.* 4 Ngam Tēv pöri ngam töpōyen kanôlò tö neūkölōn, kirööngen hanangenlōn anga-aṅ tö hī. 5 Lökten anga-aṅ nö ha-aṅlen hī ngaich hěng ayī-ö öi in Kristū, pò hī öi töng kapah sin tökūö minë fālenre (kūö ngam tökiröng miṙēḵlōn ò yī-ö öi hayöökaṙen). 6 Anga-aṅ ngam Tēv maha-aṅlen hī öi im hinëngö öi in Kristū Yēsū ngaich ha-ūichlöng öi in ò öi el halīöngö, 7 hòn ip yamih ṙētak* ngam Tēv nö hameuktö ṙôkö ngam kanôlò ngam tökiröng miṙēḵlōnre nö in hī, yip mi-im hinëngö nö in Kristū Yēsū.
8 Kūö ngih tökiröng miṙēḵlōn yī-ö öi hayöökaṙen öi löktö in ngih ṙinatö-ellōn, rö-ö nö kūö tī yīö, pön inlōnti nö aṅ im Tēv. 9 Heūṅ, rö-ö nöng kūö nup la-en yīö, hòṅ e nö öt lāinyngen tarik nö hòṅ eū-eure. 10 Vahīkūö kuntī ngam Tēv in ayī-ö ngaich im hinëngö öi in Kristū Yēsū, tövīlöng ayī-ö öi töla-evṙen tö nup tölöök la-en, urěhngöre tī misī ngam Tēv nö halēnngen hī öi la-evṙen tö në.
11 Lökten yin köpölōn tö yīö öi lamöktökūö finötnyöre öi aṅ in yip tahëng mihëṅṙö tarik, kaheūkö yī-ö sin öi töt tunyīnyi tö yip tarik, yip lamöktö i alahare nö tunyīnyi tö tarik. 12 Öt in Kristū hē e yī-ö, harīkngöre inrē tö yik Israel, ötrēhěn yī-ö öi nôlhöt öi in minë kinlēḵngô, öt aṅhavin sin yī-ö tö maheūṅkköre hēk öt Tēvu inrē sin öi ing panam. 13 Ngaich pöri yī-ö töngamuh öi im hinëngö öi in Kristū Yēsū, hěng misī ök ṙētak yīö öi marôvat tö ngam Tēv ngaich pöri töngamuh öi löktö im mahām Kristū öi röhta öi in ò. 14 Lökten Kristū nö vī ngam lanāmö nö chö-öinyten tö hī, anga-aṅ vamī minë tö nët krup nö hěng ngaich tiṙōlngen ngam tananglö nö elhôi cha ngam maharēvngen cha tö höö. 15 Kēngen ngam alahare anga-aṅ nö ahetngen ngam kumnyah elmat, tö ngö manah, ahetngen ngam chööngö, ngam töṙōlkangen aṅmat tö minë chööngö, hòṅ ò nö vīten minë tö nët krup nö im hinëngö ngaich vīten cha nö tö tufömngöre tarik ngaich haköpken ngam lanāmö. 16 Hēk löktö im chōn inkihten* nö vīten minā tö nët kangen mihëṅṙö tarik nö hēngö alaha ngaich halāmten cha nö in ngam Tēv, pò ò nö kētöre nö ahetngen ngih kumnyah elmat. 17 Yih anga-aṅ nö ahangkö ngam lanāmö nö in yīö öi tö marôvat tö ngam Tēv hēk in yīö inrē öi tö röhta öi in ò. 18 Pò hī öi höng löktö in ò ayī-ö tö nët kangen mihëṅṙö tarik hēk löktö in ngam töhet kumlēḵ öi öt ansökkenröön öi chuh in ngam Yöng.
19 Lökten yin ngaich töngamuh öi öt aṅ tahëng panam, tarik yip töhet tarik pöri hēk mupākö alaha yip aṅ patī ngam Tēv. 20 Asöklöng yī-ö öi rööntö machööḵlö më tanīnöṙô hēk pròfět, ihong ang Kristū Yēsū nö yöngkūö sinkeukngö ngih machööḵlö. 21 Keuheūtlöre ön ngih patī nö in Kristū ngaich ṙòkhöre minë alaha e nö taphen höö nö kū-ö urěh nö im hinëngö, hòṅ e nö tövīlöng nö töhet patī Yāvē.* 22 Ṙòkhöre yī-ö öi hēngö ṙētak minānlö öi in ò öi im hinëngö, hòṅ yīö öi vītöre öi töhěng elyööngö ngam Tēv, ngam chūök ò nö iyöng nö löktö in ngam töhet kumlēḵre.