Raneh chitri Pītör
1 Chū-ö Pītör, tö hěngtak öich tanīnöṙô Yēsū Kristū, kūichtö ngih chitri chin öich i minë-eny yip tökatöllöng i Pòntus, Kalātiya, Kapatosiā, Ēsiā hēk yip tökeuheūtngöre chūök nö i Pitāniā yip töng rahëichtakūö nö ikūö ngam panam 2 löktö im heuneū-enre ngam Tēv, ngam Yöng hī nö katöllen cha yip tö akahakūö min tö inlahen öp yamih hēk löktö in ngam töhet kumlēḵ cha-a nö ahetlöng, hòṅ cha nö hamang chööngö ngaich kicheinytu ngam mahām Yēsū Kristū nö ikui cha.
Ṙūöhölre an yēḵ ngam tökiröng miṙēḵlōn ngam Tēv hēk tö ngam lanāmö nö in yīö.
3 Ha-öiny ngam Tēv hēk ngam Yöng ngam Mā hī Yēsū Kristū ngam mahachohlen Yēsū Kristū nö ṙā-ang in yik tökapah, ngatī inlahen anga-aṅ nö hameuktö ngam tökiröng miṙēḵlōnre nö in hī hēk tufömlö finötnyö hī hēk kētö ngam tökô-en maheūṅkkö hī, 4 hòṅ hī öi teūngen tö ngam amin ngam töt chanuhuvṙen hēk töt aṅhavin tö töchōich hēk ngam töthō nö chuhngöre. Höng el halīöngö ön ngih amin yīö nö höngken yīö, 5 heūṅ, höngken yīö ön nöng hayōmkaṙen tö ngam Tēv nö löktö im kumlēḵ ò, hòṅ yīö īnu tö ngam ṙinatö-ellōn, laklen yīö an ngam Tēv nö chö-öinytö ngam inyööken ngam tö hameuknyu min ip manā-aṅ ṙētak. 6 Angū-ö ön ngih lāinyngen yīö öi kirööngen ṙanamlōn, rö-ö sin pöi hòṅ rahëichtakūö öi kihngen tökūö minë töṙōlkangen kinlahare, 7 hòṅ ngam tökalaha ṙinatö-ellōn yēḵ nö teūngen tö ineū-eu, nööinyö hēk minlēḵṙen ip hē Yēsū Kristū min nö hameuktu. Pōiṙāi an ngam tökalaha ṙinatö-ellōn yīö tö ngam sunna tö kēnyu nö ṙā-angkūö tameūiyö. 8 Öt hěngheuh yin meūkö Kristū, sön pöri yī-ö höng hangenlōn tö ò, öl yin inrē töngamuh öi meūkö ò, sön pöri öi höng ṙatö-ellōnre öi in ò ngaich kirööngen takô ngam ṙanamlōn yīö öi ötrēhěn kô öi heuveū-eu ṙô öi vënyö ṙôken e. 9 Pò yīö öi ṙinatu-ellōn töre öi teūngen min tö ngam raneushö hēk inyöökenre öi löktö im ṙinatö-ellōnre.
10 Ngih inyööken tö hatönnyu inlahen hēk tö chöhö tö yik pròfět nö holtö chumkūöṙenre, yik ameūkö inlahen ngam tökiröng miṙēḵlōn nö ikui yīö min. 11 Höng iṙūöhen cha-a nö chöh ngam tö vënyu inlahen Kristū tö ngam töhet kumlēḵ ngam töla-evṙen nö in cha nö ihē min öp ṙētak e hēk inlahngen e nö teungtakūö. Pò ngam töhet kumlēḵ nö urěhnyi ṙô nö vë-eny nang cha tö inlahen nup kanihngen Kristū min hēk sitih inlahen min anga-aṅ nö hapōilöng unôichrit e. 12 Hameuknyu anū-ö nö in cha nö mahalanṙen ngam Tēv tö nuk ṙô cha nö rö-ö nö chö-öinyten tö cha pön chö-öinyten tö yīö. Minë ahangnyö cha ṙô, anū-ö në ṙô tö vënyu tö cha nö in yīö, më vamë-eny nang yīö tö ngam tölöök inhānga nö löktö im töhet kumlēḵ ngam tö söömtu nö löktö el halīöngö. Kuyulōn yin më ma-ahānga inrē nö hòṅ mikahtökūöre tö inlahen u anū-ö.
13 Lökten yin öi ma-āinyre öi hamūl nup taṙòkhöre kumlēḵ ngam elkuire, iṙūöhen pöri öi hīnöre ngaich haköpkö ngam maheūṅkköre öi im tökiröng miṙēḵlōn, ngam taneūngen yīö min ip hē Yēsū Kristū min nö hameuktöre. 14 Sā inlahen yip nyīö hamang chööngö öi ṙāngen nup kuilōnre nup mi-in yīö sin hē yīö öl akahakūö tö ngam Tēv. 15 Sā inlahen ngam töhet Tēv pöri ngam mahavëten yīö, ngatī inrē yī-ö öi hëtö tinrīken. 16 Pön ngö kinūichngö angū-ö: “Hòṅ köp yin im hanëtö, pò chu chū-ö öich töhet.”
17 Ngaich yēḵ yīö öi havëken ngam Yöng ngam töt aṅhavin tö ngam intölten nö kahòkken ngòh tö hěngtak tarik nö asā nup la-en ò, ngaich yēḵ yīö töngamuh öi höng rahëichtakūö öi sā inlahen yip aṅ tahëng panam ngaich holtö pinhë-eṅkūöre yī-ö tö ngam Tēv hanöng saha yīö öi aṅ. 18 Akahalōn yin tö ngam ṙanahata ngam haköp yīö sin tinrīken yik muvöhngö yīö, ṙānyu yī-ö tö u.* Rö-ö yī-ö ṙānyu öi löktö in minë sunna, chāntī minë töng chahū-uyö. 19 Teūngen pöri yī-ö tö ngam ṙinānyi öi löktö in ngam töpōiṙāi mahām Kristū, ngam töt pitōtu hēk sā nup töt hēngö fālen kun siṅp. 20 Löktö im heuneū-enre ngam Tēv nö akahakūö tö öp yamih ṙētak nö urěhngen tī nö katöllen ò, urēhěkūö ranehlö ngih panam. In ngih manā-aṅ ṙētak pöri anga-aṅ nö hameuknyu töpòkūö yīö. 21 Löktö in ò yī-ö öi ṙatö-ellōnre in ngam Tēv. Hachohlen ò ngam Tēv nö ṙā-ang in yik tökapah hēk hapōilen ò, hòṅ yīö öi ṙatö-ellōnre hēk meūka öi in ngam Tēv.
22 Ngaich hō-en ngam ṙô ngam kanô-en yī-ö öi ahetlöre ngam lökten yīö öi kô-en hanangenlōn tö höö, lökten öi holtö kumlēḵlōnre takô öi hangenlōn tö höö. 23 Pò yīö hēk tumfömlöng finötnyi ngaich hö-ö ngih nômö nö löktö in öp tö chahū-uyö, pön löktö in ngam töt chahū-uyö kulöl* nö kētuvö, ngam ṙô ngam Tēv ngam tö aṅ hēk tö köp. 24 “Pön ṙòkhöre më tarik nö sā ṙēngen kiyôp ngaich ngam vanāyö cha nö sā ṙēngen nup pūl el maitān. Nyīkngö nun minë kiyôp hēk nyangngö minë pūl, 25 höng örheūheu pöri ngam ṙô Yāvē* nö köp.” Angū-ö ön ngih “ṙô” tölöök inhānga tö ahangnyu nö in yīö.