Kahūich Lūkös
3 Im 15 samyeūheu Tipērias Kaisör nö hayöng, hē e ang Pòntiös Pailĕt nö hayöng nö i Yūta ngaich tistrik rūlör ang Heròt* nö i Kelelī tö ök kahëm ò inrē Filip nö tistrik rūlör nö i Itūriā hēk Trakônītis inrē, ngaich ang Lusaniās nö tistrik rūlör nö i Apilēnī. 2 Ngaich mākūö kūönṙô ang Annas hēk Kaifas inrē, hē u anū-ö sakāmö ngam ṙô ngam Tēv nö teung nö in Yôhan ök kūön Sakariā hē ò nö el tönyalnyi.
3 Lökten ang Yôhan nö ahānga nö in minë kamngö tö röhta nö in ngam tahël Yôtön nö tölṙô më tarik nö hòṅ kēḵ ngam vinôkö, nö minkahngö min nö in cha, tö cha nö haṙivlōn tö nup tököölre, hòṅ aṙēlöng cha-a inrē. 4 Sā kinūichngö e tö ök pròfět Isayā nö imat ngam līpöre nö ngö ṙô: “Hangihtöre, hāngö öp pööinyṙô öp tö hěngtak hamū-a nö el tönyalnyi, ‘Halēnkö talöökö Yāvē* yin, hachip nup talöökö ò! 5 Hatööḵlöngö nup min vëlö; piṙāptukui inrē në rôngö, chip min nup tö kuròk; faṙëcha ël inrē nup talöökö töpisūköre; 6 ngaich ṙòkhöre min yip tarik nö meuk ngam inyööken aṅ im Tēv.”*
7 Yik tömaṙôngö tarik yamihtöre nö in Yôhan nö kēḵ ngam vinôkö, ngö ṙô anga-aṅ nö in cha: “Yī-ö kūön pēch, achīö öp ngaich tamölṙô yīö öi falngöre tö ngam yamih lanīnö? 8 Lökten yin öi löktö in nup la-enre öi hameuktöre havöötö ellōnre, ui höng kahngenre inrē öi ngö ṙô, ‘Muvöhngu in īhö tö Aprahām.’ Tön ngö ṙô Chin tö yīö tö ngam Tēv nö mihôiṅ nö vīten në ihong nö kūön Aprahām. 9 Ngaich an ngam hanīöng nö i rööntö minë chōn. Nup chōn töt ṙôngu min tö tölöök, kūöltu min anū-ö ngaich kavalhötvö nö ikūö tameūiyö.”
10 Ngö ṙô ngaich yik tömaṙôngö tarik nö hatöönö ò: “Hòṅ asuh öp chěi inlahen ih?” 11 Ngö ṙô ngaich anga-aṅ tö cha: “Öp tarik tö nëtö aṅ in tö chehen, ngaich hěnghata anga-aṅ nö in öp töt aṅhavin, ngatī inlahen inrē yip tö aṅhavin tö nup nyā-aṅkūö.” 12 Chuh in Yôhan inrē yik mahamūl ṙāi kinëhöt chehen nö kēḵ ngam vinôkö, ngaich ngö ṙô cha-a nö in ò: “Mahaköphöti, asuh öp öre inlahen ih?” 13 Ngö ṙô ngaich anga-aṅ: “Sā ṙôken nup tax, ui yahlö ṙôken havëka* tö u.” 14 Yik mi-in yik kumyung sin hatöönö Yôhan cha-a nö ngö ṙô: “Asuh öp öre inlahen ih?” Ngö ṙô ngaich anga-aṅ, “Uh yin hakihten* holre hēk ui vīlö fālen holre, nup töng taneūngen yīö pöri nyā-aṅkūö* in u yī-ö ṙamölōn.”
15 Pò më tarik nöng meūka tö yanīhi Kristū, lökten cha-a nö ṙòkhöre nöng fēkö inlahen Yôhan nö ngö lōn, “Hö-ö ang vö nöng anga-aṅ ngòh Kristū?” 16 Ngö ṙô ngaich ang Yôhan nö in yik taṙòkhöre tarik: “Höng aṅhtī tö mak Chin chū-ö vōkö yīö, öp yamih pöri min tö mötlö kanô-òṅ min anga-aṅ tö chu, ötrēhěn Chin chū-ö kô luhnyö nup rehen kūö kunrööpö ò. Anga-aṅ min vamôkö yīö nö aṅhtī tö ngam töhet kumlēḵ, tameūiyö inrē. 17 Eltī ò an nö ngaich ngam chōn kinchang ṙòng sāiny,* ha-etlö el öp chūök sāiny re min anga-aṅ ngaich hamūl nup sāiny nö el nup chūök re, fönghöt nup nëlö pöri min anga-aṅ nö ikūö tameūiyö öp töthō min nö nyangngö.”
18 Höng iṙūöhen ang Yôhan nö haköptö yik tarik hēk vë-eny nang cha inrē tö ngam tölöök inhānga. 19 Hē Yôhan pöri nö vëken ök tistrik rūlör ang Heròt kūö ò nö kē-ě Heròtī nö pīhöre ök pīhö ök kahëm ò, ōt inrē nuk tötlöng la-en ò, 20 kēhöt Yôhan ngaich ang Heròt nö el chēl, ngatī inlahen anga-aṅ nö ṙūöhlö ṙôken nup tötlöng la-enre.
21 Hē kinheūten yik tömaṙôngö tarik nö kēḵ ngam vinôkö, ngaich vōkö inrē ang Yēsū, hē ò nö vë-ekūötēv löpnyörekūö ngaich ngam halīöngö, 22 ngaich ngam töhet kumlēḵ ngam Tēv nö sā inlahen nyö-öṅ nö teungtöre nö ikui ò, löktö el halīöngö ngaich nö hāngö ök ṙô tö ngö: “Hanangenlōn chu ön ngòh nö Kūön chu, in ò Chin ṙamölōn* takô.”
23 Hē Yēsū nö rultenre nö la-evṙen ngaich lohten anga-aṅ nö 30 samyeūheu ṙēḵti, sā mikahkūö hī misī tö ò,
nö kūön Yôsěf misī,
ngaich Yôsěf nö kūön Heli,
24 Heli nö kūön Mattat,
Mattat nö kūön Lēvī,
Lēvī nö kūön Melkī
Melkī nö kūön Yannai,
ngaich Yannai nö kūön Yôsěf misī,
25 Yôsěf nö kūön Mattatiās,
Mattatiās nö kūön Amôs,
Amôs nö kūön Nahom,
Nahom nö kūön Eslī,
ngaich Eslī nö kūön Nakkai misī,
26 Nakkai nö kūön Māt,
Māt nö kūön Mattatiās,
Mattatiās nö kūön Semëin,
Semëin nö kūön Yôsěk,
ngaich Yôsěk nö kūön Yôta misī,
27 Yôta nö kūön Yôanan,
Yôanan nö kūön Rēsa,
Rēsa nö kūön Sěrupāpěl,
Sěrupāpěl nö kūön Sialti-ěl,
ngaich Sialti-ěl nö kūön Nērī misī,
28 Nērī nö kūön Melki,
Melki nö kūön Atī,
Atī nö kūön Kôsam,
Kôsam nö kūön Elmātam,
ngaich Elmātam nö kūön Er misī,
29 Er kūön Yēsū,
Yēsū nö kūön Eliēsör,
Eliēsör nö kūön Yōrim,
Yōrim nö kūön Mattat,
ngaich Mattat nö kūön Lēvī misī,
30 Lēvī kūön Sumiōn,
Sumiōn kūön Yūta,
Yūta kūön Yòsěf,
Yôsěf nö kūön Yônām,
ngaich Yônām nö kūön Ēllīakim misī,
31 Ēllīakim kūön Melëa,
Melëa nö kūön Menna,
Menna nö kūön Mattatā,
Mattatā nö kūön Natān,
ngaich Natān nö kūön Tāvit misī,
32 Tāvit kūön Yēsī,
Yēsī nö kūön Opět,
Opět nö kūön Pōas,
Pōas nö kūön Salmòn,
ngaich Salmòn nö kūön Nāsön misī,
33 Nāsön nö kūön Aminatap,
Aminatap nö kūön Arnī,
Arnī nö kūön Hesròn
Hesròn nö kūön Pērěs,
ngaich Pērěs nö kūön Yūta misī,
34 Yūta kūön Yāköp,
Yāköp nö kūön Isak,
Isak nö kūön Aprahām,
Aprahām nö kūön Tīöra,
ngaich Tīöra nö kūön Nāhôr misī,
35 Nāhôr kūön Sēruk,
Sēruk nö kūön Rēu,
Rēu nö kūön Pēlěk,
Pēlěk nö kūön Eper,
ngaich Eper nö kūön Sēla misī,
36 Sēla kūön Kāinan,
Kāinan nö kūön Arfaksāt,
Arfaksāt kūön Sem,
Sem nö kūön Nō-a,
ngaich Nō-a nö kūön Lamek misī,
37 Lamek kūön Matūsala,
Matūsala nö kūön Enòk,
Enòk nö kūön Yāret
Yāret nö kūön Mahallēl
ngaich Mahallēl nö kūön Kāinan misī,
38 Kāinan kūön Enòk,
Enòk nö kūön Set,
Set nö kūön Ātöm,
ngaich Ātöm nö kūön ngam Tēv misī.