I minë-eny Rōma

13 Hökngen më tarik nö ṙòkhöre nö nö elkatòh chööngö yip tö kētu minā-aṅ, pön öt hěng chööngö töt lamöktö in ngam Tēv, vīlen cha ngam Tēv yip tö kamngu tö ōttit mahayöng nö elkatòh chööngö ò. 2 Lökten ngòh lama-al më tö chööngu ngaich chamòhòlre anga-aṅ nö lama-al minë tö halēnlöng tö ngam Tēv, ngòh chamòhòlre nö la-al në tö halēnlöng, teūngen min cha-a tö sācha re. 3 Cha-a yin vē tarik tö pa-ekūö tö yip mahayöng, vē tötlöökö la-en, rö-ö nö vē tölöökö la-en. Hòṅ öt pinhë-evkūö öm më-eṅ tö yip tö chöönguvö? Iṙūöhen chěi la-en tö tölöök ngaich teūngen min më-eṅ tö ineū-eu öm löktö in cha. 4 Lökten yin më mahayöng nö mameukṙen ngam Tēv nö chö-öinytö lanöökö yīö, yēḵ meh pöri öm la-evṙen tö tötlöök ngaich pa-ekūö, pön rö-ö cha-a nö töng öt öt chööinyu nö aṅhavin tö sanëtre. Mameukṙen ngam Tēv cha-a ngaich ngòh töng iṙūöhen nö la-evṙen tö minë tötlöök la-en ikui cha min ngam tanāinyö ò.*

5 Ōt nup lāinyngen yīö öi elkatòh chööngö cha, tö sā ngam inlahen yīö öi kūö ngam hanëtö elkuilōnre öi elkatòh chööngö cha, rö-ö nö kūö ngam pinhë-ekūö yīö tö ngam tanāinyö cha. 6 Angū-ö lāinyngen yīö inrē öi kētö tax, pò cha nö tö halēnlöng tö ngam Tēv nö mameukṙen yip tömaṙôngö tarik ngaich iṙūöhen cha-a nöng in e angū-ö la-en. 7 Lökten ngòh tö hòṅ amīnu tö e, kē-ěkūö ò tö e. Ngòh mahavëkö nup tö ṙōlkangen tax, kē-ěkūö ò tö tax. Öp tö hòṅ pinhë-eṅkūö yīö, pa-ekūö yī-ö tö ò, öp tö hòṅ milēḵkaṙen, milēḵṙen yī-ö tö ò.

8 Un hötṙehevö nö i tarik höng ngam hanangenlōn yīö tö höö, lökten ngòh tö hangenlōn tö holre ngaich lööngö inlahen anga-aṅ nö hang minë chööngö ngam Tēv. 9 Pò në chööngö, “Uh man asěha,* uh man fël tarik, uh man ulāya, uh man yikhānga” ngaich in minë tahëng chööngö nö ṙòkhöre nö mūlhöt anū-ö nö in ngih chööngö “hangenlōn man tö holre sā hanangenlōnre töre.” 10 Ngòh tö hangenlōn öt lōntö töchōich anga-aṅ nö i holre, lökten ngòh tö hangenlōn nö lööngö inlaha nö hang minë chööngö.

11 Ṙënten yī-ö inrē hòṅ ngatī inlahen pò yīö öi akahakūö tö ngih ṙētak hī töngamuh öi aṅ, ngaich ön nö yih ngam ṙētak yīö öi choholre ṙā-ang im inròhò, pön röhta takô ngaich ngam ṙētak yanīhi ngam inyööken hī töngamuh hē ranehten hī öi ṙatö-ellōnre misī. 12 Hòṅ keuheūt ön ngaich ngam hatööm ngaich röhta maneutlö ngam sakāmö, lökten ta-a töi pehngö la-en ngam sinngūlö ngaich kēḵ minë aṅhtī ngam hanātö. 13 Ta-a töi kiröön öi sā inlahen yip tölēnen sā ṙētak lanöökö ngam sakāmö, rö-ö öi öt kūöngu inlahen öi in minë inṙamlōn, hiyōi tökūö ṙòkvatre im inòkö ka-eūt, yahlölōn in minë insěha hēk in minë töt sinrōngkūö la-en,* uh inrē öi iṙūöhen öi in minë linā-alkūö hēk ranāinyngö. 14 Hayutlöre pöri tö minë tinrīken ngam Mā Yēsū Kristū ngaich ui chöh inlahenre öi hateungngö kuilōn ngam alaha.