Inlahen La-en Yik Tanīnöṙô
24 Unôichrit tö taneui sumkam ök mākūö kūönṙô Ananī nö holten yik tahëng tö haroh tumtak mākūö tarik nö holre tök vökīl tö Tertulös minënyi nö yih nö umuh, ngaich chuh kūö ök mahayöng anga-aṅ nö vënyen minë fālen Pôl. 2 Hē Tertulös nö kētu ṙô nö ṙò-òvö, rěhnyö ṙôre ngaich anga-aṅ nö sūöichlö fālen Pôl, nö ngö ṙô:
“Ō Më-eṅ Tökiröng Mahayöng Fëliks, höng löktö in meh in öi teūngen takô tö ngam kumchikṙen hēk lanāmö, kūö minë töhalēnlöng hēk tö halöktitvö tö meh öi yöölen öi ikūö ngih panam, 3 keuheūtngöre chūök yanöölen in öi löktö in u, lökten in pōyen ṙô öi ha-öiny minë tī meh. 4 Sōḵ pöri lang Chū-ö hēk öich hòṅ hakihten meh, lökten man öm aṙēḵtö ṙô Chu öm höng rahëichtakūö öm hangihtö ṙô ih. 5 Kôtökūö in tö ngòh tarik, nö vamī tinṙōlen* hēk halō-ongkūö më Yahūti inrē nö keuheūtngöre chūök ikūö ngih panam, nö hōten cha nö lā-al hī hēk tö hěngtak ön inrē nö yöngkūö më tamömrit yip krup aṅ Nāsaröt. 6 Hachōichngen ngam chūök vinë-ekūötēv ön inrē ngòh tarik, lökten in öi kē-ě ò. 7* —— 8 Ngaich në ṙô ih öi sūöichlö fālen ò, yēḵ meh hakôtö ṙôre öm hatöönö ò ngaich kôtökūö min më-eṅ tö në ṙô ih nö tökô-en.”
9 Hanôltö ṙôre inrē yik Yahūti nö sūöichlö inlahen Pôl ngaich vënyen minë inlahen ò nö tökô-en. 10 Ngaich hē ök mahayöng nö ringeul kuire nö hōnyö ṙô Pôl nö ṙò-òvö, ngö ṙô ngaich ang Pôl:
“Ṙamölōn chin pöich kētu ṙētak öich vënyen minë inlahenre öich ikūö meh, akahakūö Chin tö meh öm töṙōl samyeūheu öm kahòkken vē aṅkūö ngih panam. 11 Minë töng ṙô chu öich vë-eny nang meh, mihôiṅ man öm hakôtenre öm chöhnyö minë kanô-en u, öt yaha rò-angen tö tö 12 sumkam chin öich vë-ekūötēv öich i Yērūsalem, 12 ngaich öt hěng heuh më Yahūti nö meūkö chu öich lā-alkūö holre öich el chūök vinë-ekūötēv hēk öt hěng heuh inrē cha-a nö meūkö chu öich hamūl tarik öich el chūök vinë-ekūötēv hēk im panam inrē. 13 Ötrēhěn yin nö kô nö hameuktö kanô-en minë ṙôre nö sūöichlö fālen chu i ngih ṙētak. 14 Hō-en u pöri chū-ö öich lākūö meh, ngam talöökö tufömngöre tinlööken tö ṙô cha, ṙatö-ellōnre Chū-ö öich in e ngaich la-evṙen tö minë töhet la-en ngam Tēv yik muvöhngö ih, pò Chu ṙatö-ellōnre in minë Chööngö hēk in minë ṙô tökūichi tö yik pròfět. 15 Sā cha pöri Chū-ö öich maheūkku öich in ngam Tēv, tö yip tö nët kangen, tölöök hēk tötlöök tarik min nö hachohlöng nö ṙā-ang in yip tökapah. 16 Lökten Chū-ö örheūheu öich kalahtenre öich uich fāluṙen öich ikūö ngam Tēv hēk ikūö më tarik, hòṅ ngam lāmātuhēt elkuilōn chu nö het.* 17 Ṙōlhang samyeūheu Chin öich kumtö kòntripuisön öich chuh in vē tarikre töt aṅkūö ngih panam ngaich yih inrē öich kētö tökētu ikūö ngam Tēv. 18 Hē Chu la-evṙen tö në, ngaich kôtökūö cha-a tö chu öich el ngam chūök vinë-ekūötēv, öich hëtö inlahen öich sā minë chööngö Môsös, öt hōlu pöri chū-ö tö yik tömaṙôngö öich umuh, ötrēhěn öich vī tinṙōlen. Rīkre yik Yahūti aṅ Ēsiā tistrik tö ōt nö umuh hē e. 19 Yěn ōt ṙô cha öreh nö sūöichlö fālen Chu ngaich hòṅ ōt öreh cha-a nö ihih ngaich sūöichlö fālen chu cha-a nö ikūö meh. 20 hēk hönglöö vē tarik mi ihih nö vënyö inlahen chu hē chu öich sökhak ikūö yip kamhôka ngaich asuh öp kanôtökūö cha fālen chu, 21 höng hěng öp ṙô cha mihôiṅ nö sūöchkö fālen chu, öp ṙô chu sökhak öich pōitô hē chu ihôi cha öich ngö ṙô, ‘Kahòkkaṙen Chin töngamuh öich ikūö meh öich chö-öinyten ngam ṙô inlahen yip tökapah min nö hachohlöng!’”
22 Akahakūö ang Fëliks tö kanô-en ngam inlahen ngam ‘Talöökö ngam Mā’, sön pöri anga-aṅ nöng tīnngörit chu nö ngö ṙô: “Yěn yih min öp yōmkūö kumyung ang Lusīös nö ihih, ngaich möl min Chū-ö öich kēḵ fëslare tö ngih inlahngen meh.” 23 Kētö chööngö ngaich anga-aṅ nö in ök yöngkūö kumyung nö hachēlhöt ngòh tarik ngaich un yaha inkihten anga-aṅ hēk un asökiṙen yip tarik ò nö meukṙen ò.
24 Haroh tum hang sumkam ang Fëliks nö holtö ök pīhöre ang Trusilla, tö hěngtak anga-aṅ nö Yahūti ngaich tīnngö mahavëken Pôl anga-aṅ. Ngaich hē Pôl nö vënyö ngam lāinyngenre nö ṙatö-ellōnre nö in Kristū Yēsū ngaich hangihtö ṙô ò cha-a. 25 Hē Pôl pöri nö vënyö inlahen ngam lanöökö, ṙinapöre hēk inlahen ngam yamih ṙētak kinṙôka, pa-ekūö ngaich ang Fëliks ngaich ngö ṙô: “Kiröönngöre man sin ngaich, yěich ṙētakvö hēk min, öthō min Chū-ö hēk öt havëken meh.” 26 Meūkkenre inrē anga-aṅ nö teūngen tö rupīö nö löktö in Pôl. Lökten anga-aṅ nö örheūheu nö tīnngö mahavëken ò pön hòṅ vë-ekūö ò. 27 Ngatī inlahen ngaich nuk tö nët samyeūheu nö keuheūten ngaich i chūöktit Fëliks ngaich ang Pòrki Festös, hòṅ haṙamlōn yik Yahūti ang Fëliks, lökten anga-aṅ nöng ṙāngen Pôl nö el chēl.