I minë-eny Kòlòsi
4 Yī-ö yöngṙen, hameuktö lanöököre yin hēk öt michūṙenre öi in më mahalanṙenre, öi akahalōn tö ngam Yöngṙen yīö inrē nö ōt nö el halīöngö.
2 Iṙūöhen im vinë-ekūötēv hēk höönga inrē ngaich örheūheu kētö nööinyö. 3 Vë-elkui ih inrē, hòṅ ngam Tēv nö löpnyökūö ngam inkūp ngaich ahangkö ngam ṙô ò īhö hēk vënyen ngam töhet töt mikahkūö sin inlahen Kristū, pön angū-ö ngih lāinyngen Chu öich el chēl, 4 hēk ngih inrē ṙô yīö öi vë-ekūötēv, hòṅ Chu öich lööknyiṙô öich vënyö inlahen e.
5 Löngötī yūs ngam ṙētakre* öi holtö mikahre öi in yip aṅ elkahôiṙen. 6 Hökngen nup ṙô yīö nö örheūheu nö lökngöre tī tö ngam ellōn hēk töhō-ovö,* hòṅ yīö öi heuveū-euṙô min öi sapṙô ngòh tö hěngtak.
7 Ngam hanangenlōn chu prötör ang Tikikös hēk tötmichūṙen nö mahalanṙen ngam Mā, anga-aṅ min vamë-eny nang yīö tö minë taṙòkhöre inlahen chu. 8 Lökten chin öich tīnten ò nö in yīö, hòṅ yīö akahalōn tö inlahen ih hēk hareuskö alaha yīö inrē anga-aṅ. 9 Tīnten ngam chūök ṙinatö-ellōnre chin hēk hanangenlōn chu inrē prötör Ònisimös nö hol ò, ngam töng aṅ in yīö, cha-a nan min mumkahtölōn yīö tö inlahen minë inlahngen nö ihih.
10 Sinlāmu ṙô ön Aristorkös, ngam mi-in chu nö el chēl hēk sinlāmu ṙô inrē nö in yīö ang Mākös, ngam tö sā ṙēngen kahëm Parnapas (ngam hinôtö yīö tö chu yēḵ ò min nö chuh in yīö ngaich ha-öinytö yīhi ò yī-ö), 11 hēk sinlāmu ṙô inrē nö in yīö ang Yēsū ngam tö Yustös invëka, ngam aṅ in yik tö tunyīnyi. Höng cha-a yin vē hamòlṙen chu öich chö-öinyten tö ngam Pūlngö ngam Tēv ngaich löktö in cha chū-ö öich teūngen tö inreuskö alahare.* 12 Sinlāmu ṙô inrē nö in yīö ngam mahalanṙen Kristū Yēsū ang Epafaras, ngam aṅ in yīö. Örheūheu anga-aṅ nö chö-öinyten yīö nö holtö ellōnre nö vë-ekūötēv, hòṅ yīö söl manā-aṅ öi sā yip tösööḵngö* tarik öi ngön öi söktöhëichṙen hēk kô-en ṙinatö-ellōn inrē yī-ö tö inlahen nup taṙòkhöre kuilōn ngam Tēv. 13 Heūṅ, Chū-ö chin ameūken ò nö pōyen la-en töpòkūö yīö hēk tö yip aṅ Lòtisiā hēk tö yip aṅ Hīrāpulis inrē.
14 Sinlāmu ṙô ön nö in yīö, ngam hanangenlōn hī prötör ang Lūkös ngam lamë-en tövāhavö hēk Tēmas inrē. 15 Sinlāmö lamöktö in chu, in yip prötör aṅ Lòtisiā hēk in sistör Nimfa hēk in ngam māṅ tö mūlhakṙen nö i patī ò. 16 Yěn vë-evkūö min ngih chitri nö ihôi yīö ngaich unôichrit e öi halēnlö inlahen vinë-ekūö e min nö el ngam māṅ i Lòtisiā ngaich nup chitri lamöktö Lòtisiā, vë-ekūö u inrē min yī-ö. 17 Ngaich ngö ṙô in Arkipös: “Chumkūöṙen man tö ngam la-enre ngam taneūngen meh mineukṙen ngam Mā ngam töhō-ov tö meh, hateungngen e më-eṅ.”
18 Hakôtenre chin, chū-ö Pôl, öich aṅhtī tö kuntīre öich kūichtö sinlāmö öich in yīö. Köpölōn tö minë inlök chu öich el chēl. Örheūheu an yēḵ ngam tökiröng miṙēḵlōn ngam Tēv nöng in yīö.