I minë-eny Filipī
3 Im manā-aṅ kahōlö, höng örheūheu yin ṙamlōn im Mā. Öt kanihngen chu ön öich kūich minë töng hěngṙen ṙô, laklöng pöri min yī-ö tö u.
2 Haṙēmngenre yin tö yip töthet tarik,* haṙēmngenre tö yip tö pala-aiṙen tī hēk haṙēmngenre tö yip ṙamat ngam tūmö pak alaha. 3 Pò hī ayī-ö öi tölöngö inlahen öi tunyīnyi, yip töla-evṙen tö ngam töhet la-en nö löktö in ngam töhet kumlēḵ ngam Tēv hēk ineū-eu nö in Kristū Yēsū ngaich töt ṙamatö-ellōnre nö in ngam alaha, 4 yěn ōt pöri tö chööinyu nö ṙatö-ellōnre nö im alaha ngaich tö mötlö takô ngam aṅ in chu.
Ngaich yěn tarīku tö ngö mufē töre nö chööinyu nö ṙatö-ellōnre nö im alaha, ngaich mötlö takô tö e ngam aṅ in Chu: 5 im hinëvhöre sumkam Chū-ö öich tunyīnyi, lamöknyö im panam Israel chū-ö im miyööngö Penyamin, lamöktökūö finötnyöre chū-ö öich Hiprū, ngatī inrē nak yöng chu nö Hiprū ngaich tö hěngtak chū-ö öich Feresī öich asā ngam chööngö, 6 ngaich yěi ṙôtö ngam nganöötö chu ngaich tötlamëken minë māṅ sin chū-ö ngaich nup tölöök nö imat ngam chööngö, kaheūköre chū-ö öich töt fāluṙen. 7 Ngaich nup ṙô yanöölen chu, höng yanëḵngen anū-ö nö imat Chu töpòkūö Kristū.* 8 Rö-ö nöng anū-ö, pön ṙòkhöre nup ṙô nöng yanëḵngen töpòkūö ngam mikah elmat inlahen ngam Mā Chu Yēsū Kristū. Ngam tötkô nö kanṙeūken ṙāi, sō-en nup taṙòkhöre Chū-ö ṙô töpòkūö ò ngaich kaheūkö u Chū-ö nöng yanëḵngen nö ṙòkhöre, hòṅ Chu öich teūngen tö Kristū 9 ngaich kôti öich im hinëngö öich in ò, rö-ö nö kūö chu öich hang ngam chööngö ngaich kaheūkö öich tölöök, kūö chu pöri öich ṙatö-ellōnre öich in Kristū, lökten ngam Tēv nö kaheūkö chu öich tölöök. 10 Angū-ö ön ngih chö-öiny chu, hòṅ chu öich akahakūö tö Kristū hēk tö ngam minhôiṅyö ò nö havanlöre nö ṙā-ang im kinpaha ngaich sā inlahen ò öich la-al minë kanihngen ngaich asātu öich im kinpaha ò, 11 hòṅ Chu min öich in yip tarik, yip tö urěh min nö hachohlöng nö ṙā-ang im kinpaha.
12 Rö-ö nö kūö Chu ngaich öich teūngen tö ngih raneushöre hēk rö-ö inrē nö kūö Chu ngaich öich het, ma-āinyre pöri Chū-ö öich kalēḵ alaha, hòṅ Chu öich teūngen tö ngam raneushöre pòrô öp tö sitih, ngam chö-öiny Kristū Yēsū nö katöllen chu. 13 Kahōlö, rö-ö Chin ngaich öich kaheūköre öich teūngen tö ngam raneushöre, ngih pöri tökô-en: Nup ṙô lāma urěh, havaichngöre chū-ö tö u öich tūöktöre öich kū-ötö in minë ṙô lāma urěh, 14 ngam invëtö Chu öich löktö lātulöng tö ngam Tēv nö löktö in Kristū Yēsū ngaich ma-āinyre chū-ö öich in ngam chö-öinyre, hòṅ chu öich teūngen tö ngam raneushöre. 15 Lökten in ayī-ö ṙòkhöre tösööḵngö* öi hòṅ ngatī inlahen mufē hēk tinrīken, yēḵ yīö öi kū-ötö in nup tahëng ngaich hameuktö nup tölöng mufē hēk tinrīken min ngam Tēv nö in yīö. 16 Ngaich ngam sölö inlahen hī öi kū-ö urěh, ta-a töi höng iṙūöhen öi löökö röön öi lök in e angū-ö talöökö.
17 Kahōlö, ṙòkhöre yin öi holṙenre öi asīnkö röön chu ngaich iṙūöhen öi chumkūöṙen öi asā röön yip ma-asīnkö röön e, ngam tö ṙāḵtu tö ih nö chö-öinyten tö yīö. 18 Pōyen sin yik tö kakka inlahen tö Chu ngaich pöri Chū-ö töngamuh öich haṙivlōn yēḵ chu öich kakkö inlahen cha, pò cha ngaich nö vītöre nö tö kunyaha elmat tö ngam chōn inkihten* Kristū. 19 Teūngen min cha-a tö ngam ṙòng re ötinkôlò, pò cha nöng tēv tö aichre, ngaich nup ṙô sinrōngkūö cha öreh ngaich tāilölōn cha-a nö in u hēk höng fēken minë ṙô ngih panam cha-a inrē. 20 Tarik aṅ el halīöngö pöri ayī-ö ngaich in e ayī-ö min öi hökken ngam tö hěngtak mahayööken, ngam Mā Yēsū Kristū, 21 ngaich löktö in ngam tökiröng kumlēḵre tī min anga-aṅ nö kēten nup taṙòkhöre nö in re ngaich haṙīngö ngam tötkalē-en anga-aṅ alaha hī nö vīten e nö sā ngam alahare nö töhapōilöng.