Innëtö Chitri Yik Aṅ Kòrin
13 Linūöi van chu ön ngih nö ngaich öich chuh in yīö. “Höng löknyö elvāng nap tö nët hēk yip tö lūöi tak min vamë-eny nö hameuknyu kanô-en nup töng sitih ṙô hēk fālen inrē.” 2 Rö-ö chin töngamuh pöich ṙömöng marôvat tö yīö, akaha elmat pöri yī-ö tö ngih nö innët van chu öich ōt elhôi yīö. Yip tarik mu-urěh sin nö kēken ngam tökööl, löktökūö ing töngamuh chin öich hōten cha hēk hōten yip tahëng inrē tarik nö hööngöre, yēḵ chu min öich havan öich yih öich chuh in yīö ngaich öthō min öich öt kētö sācha cha. 3 Pò yīö lōnu hameukten chu tö Kristū nö löktö in chu ṙô nö ṙò-òv, ngam tökalēḵ nö in yīö, rö-ö nö tötkalē-en. 4 Kô-en anga-aṅ nö öt kalē-en hē ò nö kilöllöngö nö irōi ök chōn nö fëli, sön pöri anga-aṅ nö löktö i kumlēḵ ngam Tēv nö hachohlöng. Ngih inrē tökô-en ngam inlahen hī öi sā ò öi ötkalē-en, sön pöri ayī-ö öi hol ò öi aṅ hēk löktö in e angū-ö kumlēḵ ngam Tēv ngam tö la-evṙen nö in yīö.
5 Ngëichköre yin yēḵ yīö im ṙinatö-ellōn hēk hö-ö, iṙūöhen yī-ö hameuktöre öi tö sitih inlahen öi tarik hēk öt akahaiṙen hòng yī-ö tö Yēsū Kristū nö im hinëngö nö in yīö? Yěn öt ngatī angū-ö ngaich tö ngö manah tö yīö öi tö sō-ovö. 6 Yěi ṙôtö inlahen ih pöri ngaich öt sō-ovö īhö hēk meūka chin tö yīö öi akahakūö tö ngih ṙô.
7 Vë-ekūötēv in töngamuh öi vë-ekūö ngam Tēv tö yīö öi ui kēken tövaich. Öt angū-ö pöri chö-öiny chu öich ngatī ṙô tökūö hī öi hòṅ meūkö öi töhō-ov. Ṙën pöri chū-ö öich ngatī ṙô, pöich hōten yīö iṙūöhen la-evṙen tö tölöök la-en, pòrô öi meūkö öi sā yip tö sō-ovö. 8 Pò hī ötkô la-al ngam kanô-en, höng mihôiṅ pöri öi chö-öinyten tö ngam kanô-en. 9 Yēḵ ih ötkalē-en ngaich ṙamlōn īhö yēḵ yīö öi kalēḵ, ngaich vë-ekūötēv īhö, hòṅ yīö höng iṙūöhen öi halööktitre. 10 Ṙënten chin öich kūich në ṙô, pòrô öich höng marôvat tö yīö, hòṅ chu yěich elhôi yīö ngaich öt chökhutī chū-ö öich yūs ngam chööngö kahëtö ngam Mā nö in chu, kētu ngih chööngö nö in chu nö mahangönken yīö, rö-ö nö ma-afukngen yīö.
11 Kahōlö, manā-aṅ ön ngih ṙô chu in yīö tö yīö iṙūöhen ṙamölōn, iṙūöhen im inlööktitre, iṙūöhen im inreuskö alaha, iṙūöhen hēngö mufē hēk im lanāmö ngaich möl min ngam Tēv hanangenlōn hēk lanāmö nö örheūheu nö holtöṙah yīö. 12 Kö salāmö höö aṅhtī tö töhet hināmökūö. 13 Sinlāmö yēḵ nö in yīö öi taṙòkhöre töhet tarik.
14 Ngam tökiröng miṙēḵlōn ngam Mā Yēsū Kristū hēk ngam hanangenlōn ngam Tēv hēk tö ngam töhet kumlēḵ ò nö örheūheu nö holtöṙah yīö ngam lökten yīö öi teūngen tö yanöölenre.