Inlahen La-en Yik Tanīnöṙô

2 Hē cha ngaich nö ṙòkhöre nö mūlhakṙen nö i patī, hē ṙētak sakāmö ök Pentĕkòs. 2 Chalô ngaich ök tö pōitô nö löktö el halīöngö tö sā ṙòktô tökalēḵ kuföt, keuheūtngöre hināngö angū-ö nö el ngam patī ngam chūök cha nö ūichhak. 3 Ngaich meuk ök tameūiyö cha-a tö sā mineūkö litāk ngaich kö hěng hěng anū-ö nö teungtöre nö ikui cha nö ṙòkhöre. 4 Tööḵlö ngaich cha-a tö ngam töhet kumlēḵ ngaich kaknyöre nö ṙò-òv tö minë tö ṙōlkangen ëlô, sā tī ngam töhet kumlēḵ nö kētö heuneū-eu ṙô cha.

5 Yih hē e yik Yahūti yik tö milēḵṙen takô tö ngam Tēv nö i Yērūsalem nö löktö in minë taṙòkhöre panam ik ṙētak. 6 Hē ngam ṙô nö hāngö, hamūlöre ngaich yik tömaṙôngö ngaich ṙòkhöre cha-a nö pingangkūö tö më mahaköp nö heuveū-eu ṙô tö ëlô cha. 7 Pingangkūö ngaich yik tarik ngaich ngö ṙô: “Më tarik tö ṙò-òv, röh aich kan nöng ṙòkhöre nö aṅ Kelelī? 8 Sitih inlahen pöri ayī-ö öi hang ṙô cha nö heuveū-eu ṙô tö ëlô* hī? 9 Yēḵ hī ayī-ö öi aṅ Partī, Māti, Ëlamī, Mësopotamīā, Yūta, Kapatosiā, Pòntus hēk aṅ Ēsiā 10 hēk Frukiā, Pömfūliā hēk lamöktö Aikup hēk im kamngö Lipyā ngam tö röhta nö i Kurěnī hēk mahavötköre nö löktö Rōm, ṙòkhöre ayī-ö öi Yahūti hēk vamītöre inrē im tinlööken Yahūti, 11 in hī inrē më aṅ Krēti hēk tö më aṅ Arēpīa inrē, sön pöri ayī-ö öi höng hang ṙô cha nö i ëlô hī nö vënyö minë pinngangkūö la-en ngam Tēv.” 12 Pingangkūö ngaich yik taṙòkhöre tarik nöng öt akaha elmat tö inlahen e, ngaich ngö ṙô nö hatöönö höö: “Asuh öng kan ngaich ngih tö ngatī?” 13 Rīkre pöri yik tarik tö miyëṙô tö yik mahaköp nö ngö ṙô: “Lohten yin kòl nöng òk tö tufömngöre* vāin, lökten nöng hiyōi.”

14 Söklöre ngaich ang Pītör nö elhôi yik tö Kahuksīön tak ngaich pōitô nö vë-ekūö yik tarik tö ṙònghöichṙen nö umuh nö ngö ṙô: “Yī-ö aṅ Yūta hēk yī-ö taṙòkhöre tarik aṅ Yērūsalem, hangihtöre yin tö ṙô chu. 15 Vaichö mufē yin kòl, hö-ö yin nö hiyōi pön ṙömöng machūötöre köiṅny ṙô tö lā peuheū. 16 Ṙën pöri angū-ö nö ngatī inlahen nö sā ṙô ngam tö vënyu tök pròfět Yô-ěl nö ngö ṙô: 17 ‘Ngö ṙô an ngam Tēv, “Kē-ěkūö yip taṙòkhöre tarik chin min tö kumlēḵ ip manā-aṅ sakāmö ngaich yip kūön yīö min kikōnyö hēk kikānö nö vënyö nup tö-eūka, ngaich yip ṙāl tarik yīö min nö hameukhumat, ngaich yip tö köinyö ṙēḵti min in yīö nö meuk nup heūvö. 18 Kē-ěkūö yip mahalanṙen kikōnyö hēk kikānö chū-ö min tö ngam töhet kumlēḵ ip hē u anū-ö sakāmö ngaich vënyen nup tö-eūka min cha-a. 19 Ngaich chū-ö min hameuktö pinngangkūö lātulöng el halīöngö, minkahngö inrē lātaṙeū ing panam, mahām, tameūyö hēk lul taṙul inrē. 20 Sangūli mat min ngam tavūöi ngaich sā nganāvö mahām min ngam chingëṅt, urēhěkūö yanīhi ngam tökiröng sakāmö Yāvē* nö hameuktö kanôlò re. 21 Ngaich yip töng mahavëkö minë-eny Yāvē* ngaich hayöökaṙen min cha-a.”’

22 Yī-ö tarik aṅ Israel, hang ngih ṙô chu yin; tö Yēsū ngam aṅ Nāsaröt, nö tö tīntu misī tö ngam Tēv nö in yīö, löktö in ò tī inrē ngam Tēv nö hameuktö nuk minhôiṅyö la-en hēk pinngangkūö nö ihôi yīö, sā mikahlōn yīö inrē tö u. 23 Kēten ngòh tarik yī-ö nö eltī yip tötlöök ngaich kilöllen ò nö irōi chōn nö fëli, halēnngen u ngam Tēv nö löktö i heuneū-enre nö akahakūö tö nup tö öltöre yanīhi hòn teung anū-ö nö in ò nö sā nup lōn* ò. 24 Ngaich pöri ngam Tēv nö ha-aṅlen ò ngaich ṙānyen ò nö ṙa-ang el inköövö* tö ngam kinpaha pön öt kanò-òṅvö ngam kinpaha nöng haköpken ò. 25 Lökten ang Tāvit nö vënyö inlahen ò nö ngö ṙô ò: ‘Örheūheu chin ikūö re tī* tö Yāvē* ngaich lāhāmö chu anga-aṅ hòṅ chu öt hanlöinyken. 26 Lökten an ngam ellōn chu nö kirööngen ṙanamlōn takô ngaich ngam litāk chu nö holtö ṙanamlōnre nö ṙò-òv. Holtö maheūṅkköre chin öich* aṅ. 27 Pò meh öt ṙāngen chu el anūlö* hēk öt hökngen ngòh tö chiplö tarik re nö chahū-uyö. 28 Hameukhömat chu më-eṅ tö ngam talöökö nômö ngaich tööḵlö min chū-ö tö ngam ṙanamlōnre öich lākūö meh.’

29 Kahōlö, öt piyū-uṙô chin öich vënyö inlahen Tāvit ngam yöng taṙòkhöre ngam tökapah ngaich ūli nö el anūlö ngaich ōt ngam anūlö ò nö söl ing töngamuh nö elhôi hī. 30 Tö hěngtak anga-aṅ nö pròfět ngaich akahalōn anga-aṅ tö ngam Tēv nö kilēḵngôre nö in yip kūön ò min, öp tö hěngtak nö ha-ūichlöng nö el kantēra ò. 31 Urěhten mikahkūö ang Tāvit tö inlahen Kristū nö ha-aṅlöng ngaich vënyö inlahen Kristū anga-aṅ nö öt ṙā-ayö nö el anūlö* hēk öt hökiṙen inrē ngam alaha ò nö chahū-uyö. 32 Anga-aṅ ön ngòh Yēsū tö ha-aṅlöng tö ngam Tēv ngaich ṙòkhöre īhö öi vamënyen u. 33 Ngaich an nö hapōilöng nö lāhāmö ngam Tēv ngaich sā minë kinlēḵngô ngaich teūngen anga-aṅ tö ngam töhet kumlēḵ nö löktö in ngam Yöngre, angū-ö ön ngih töhet kumlēḵ tö teung nö ikui yīö ngaich hāngö e yī-ö meūkö e inrē nö la-evṙen nö ikui yīö. 34 Öt chuh el halīöngö ök Tāvit, ngö ṙô pöri anga-aṅ: ‘Ngö ṙô ang Yāvē* nö in ngam Mā chu: “Ūichngöre man sin lāhāmö chu 35 hanöng saha tī chu vītö yip tö kunyaha elmat tö meh nö ranöönöröön meh.”’ 36 Lökten yī-ö taṙòkhöre aṅ patī Israel öi akahakūö takô tö ngam Tēv nö vīlen ò anga-aṅ ang Yēsū nö Mā hēk Kristū, ngam tö kilöllöng tö yīö nö irōi ök chōn nö fëli.”

37 Hē cha ngaich nö hāngö e haṙivlōn takô ngaich ngam ellōn cha ngaich ngö ṙô cha-a nö in Pītör tö yik tahëng inrē tanīnöṙô: “Kahōlö, asuh öp rih hēk tö hòṅ inlahen hī?” 38 Ngö ṙô ngaich ang Pītör nö in cha: “Havöötö ellōnre yin ngaich vōkö öi i minë-eny Yēsū Kristū öi havëkö inṙē-ěl nup tököölre ngaich möl min yī-ö öi teūngen tö ngam töt ṙāyu töhet kumlēḵ. 39 Pò ngih kinlēḵngô nö chö-öinyten tö yīö, yip kūön yīö hēk chö-öinyten tö yip tö maṙôvat tarik yip tö havëtu tö ngam Tēv hī Yāvē* nö in ò.” 40 Pōyen nuk vahënyö ò tövai ṙô nö in yik tarik, höng iṙūöhö ṙô anga-aṅ nö mikahtö elnang cha nö ngö ṙô: “Haköhngenre yin tö vē tarik in në ṙētak hī töngamuh ngaich kēḵ ngam inyööken.” 41 Yik tarik mahanôltö ṙanamlōnre nö hang ngih ṙô ngaich vōkö cha-a, lohten nö 3,000 ṙôken hēk yik mahamūltöre nö in yik mahaköp hē e angū-ö ṙētak. 42 Ngaich ṙòkhöre cha-a nöng iṙūöhen nö haköp nö in yik tanīnöṙô mūl cha-a ngaich holkūöre nö nyā ngaich vë-ekūötēv inrē.

43 Ngaich ṙòkhöre yik tarik nö pa-ekūö, pōyen inrē nuk pinngangkūö hēk minkahngö hameuktö yik tanīnöṙô. 44 Ṙòkhöre yik ṙamatö-ellōnre, mūl acha-a hēk nuk töng aṅ in cha ngaich katölhökūö höö cha-a tö u. 45 Havahngö nuk chehenre hēk kanôlòre cha-a ngaich nuk taneūngen cha rupīö ngaich katölhökūö höö cha-a nö asā ṙôken lōn öp tö hěngtak. 46 Höng hěng ngam chö-öiny lōn cha nö örheūheu nö yihtökūö nö el ngam chūök vinë-ekūötēv hēk örheūheu cha-a nö chuh patī höö nö nyā hēk holtö ellōnre hēk ṙanamlōnre nö katölhökūö höö tö minë nya-aṅkūö. 47 Örheūheu cha-a nö ha-öiny ngam Tēv ngaich ṙòkhöre yik tarik nö ṙamölōn nö in cha, kaheuk sakāmö ang Yāvē* nö ngatī inlahen nö hamūlhöt yik tarik tö hayöökaṙen tö ò.