Innëtö Chitri Yik Aṅ Kòrin
3 Hēk öi lang öi havantö ṙôre öi vë-eny inlahenre öi in yīö sāre yěi höng öt akahakūö tö ih? Hēk kūichtö līpöre hòng öi havëkö inlahenre öi sā inlahen yip rīkre tarik hēk kēḵ minë līpöre hòng öi in yīö öi havëkö inlahenre? 2 Yī-ö yin chitri öi talöökö ṙô ih, öi tökūichi öi ellōn ih, öi mikahkūö yip taṙòkhöre ing panam hēk tö vë-evkūö tö cha. 3 Hameuktu yī-ö tö ih öi chitri Kristū öi töt kūichö tö kinsum kūö kanūich tö ih īhö mahalanṙen, tö kūichö pöri öi löktö in ngam töhet kumlēḵ ngam tö aṅ Tēv hēk öt kūichö nö imat nup tö mitāk ihong, i ellōn pöri.
4 Angū-ö ngih ṙinatö-ellōn ih öi ikūö ngam Tēv öi löktö in Kristū. 5 Hö-ö in ngö ṙô tö minë aṅ in re taneungten nöng pòkūö tī ih, minë tö hòṅ taneungten ih pöri nöng tī ngam Tēv anū-ö, 6 kô-en anga-aṅ nö vamī-i hī öi teungten, öt asā nup tö kūichi pöri chööngö mahalanṙen ngam tö tufömngöre pöri kinlēḵngô hēk tö ngam töhet kumlēḵ, hòṅ ngam tökūichö chööngö nö ma-ahangtö ngam sācha ngam kinpaha, kamëtö ngam nômö pöri ngam töhet kumlēḵ.
7 Rö-ö nöng angū-ö, yēḵ ngam chööngö nö kamëtö ngam kinpaha hēk ngam töka-iphötvö misī nö imat ihong, holtö kanôlò angū-ö nö kētu lökten yik aṅ Israel nö ötkô nö meukkūö Môsös tökūö ngam yanāngö kūö ò ngam yanāngö ngam töng chuhngöre, 8 ngaich kūö yòh min ngam töhet kumlēḵ nö öt holtö kanôlòre nö kētuvö? 9 Yēḵ ngam chööngö ngam kamheūkö hī öi fāluṙen nö tööḵlö tö ngam kanôlò ngaich iṙôken tanööḵlö kanôlò ngam mineukṙen kamheūkö hī öi tölöök! 10 Ngaich yik tö hatööḵ-öiṙen nö kētu kanôlò nö inuk ṙētakre, kē-ěyö min ngam kanôlò nö in cha, pò ngam kanôlò mu-unôich nö yih nö mötlö angū-ö tö e. 11 Yēḵ ngam tö ahetiyö, yēḵ ò nö kētu nö holtö ngam kanôlò ngaich mötlö kanôlò min cha-a më tö ōtre!
12 Īnu in īhö tö ngam tö ngatī mineūka lökten öi holtö nganöönöre öi öt piyū-u ṙô öi ṙò-òvö, 13 ngaich öt ngatī inlahen īhö öi sā inlahen Môsös, hayunngö kūöre ök anga-aṅ tö ök hilā hòṅ yik Israel nö öt tēltamat nö meuk kanôlò ngam chööngö, ngam tö unôichngöre nö ahetiyö. 14 Ngaich pöri nöng öt akahaiṙen ngam mikah elmat cha yēḵ ngam töhötṙeh kinlēḵngô nö vë-evkūö nö söl ing töngamuh ngaich höng angū-ö ngih hilā ranangkūö tököpngö nö ellōn cha, pò e angū-ö hilā ranangkūö nöng löktö in Kristū min nö kē-ěyö. 15 Kô-en nö söl ing töngamuh yěn ahangnyu minë līpöre Môsös nö vë-evkūö ngaich höng köpngö ngih hilā ranangkūö nö ellōn cha. 16 Yěn ōt pöri mahavöötö ellōnre nö yihtöre nö in Yāvē* ngaich kē-ěyö ngih hilā ranangkūö. 17 Töt maneūken ang Yāvē* ngaich ip chūök ngam töhet kumlēḵ Yāvē* ngaich in e ngam töt inköövö ṙinānyi. 18 Hö-ö an ngam hilā ranangkūö nö ikūö hī ngaich ṙòkhöre ayī-ö öi sā ṙēngen öp tinmël öi hameuknyö ngam kanôlò Yāvē.* Ṙònghöichṙen in ayī-ö töngamuh öi vī-ire öi sā ngam Tēv. Ngaich kaheuk sakāmö ayī-ö öi ṙūöhlöre inlahen öi hameuktö ngam kanôlò ò, sā inlahen Yāvē* nö örheūheu nö hòṅ haṙīngen hī, ngam Tēv töt maneūken.*