Inhānga Kahūich Yôhan
21 Unôichrit e hēk ang Yēsū nö hameuktöre nö in yik mahaköp nö ikūö öp mai Tipěriös. Ngö inlahen anga-aṅ nö hameuktöre. 2 Holre hē e cha-a hē Sīmōn Pītör, Tômas (ök tö tumnëtö invëka) Netenīěl ök aṅ Kānā i Kelelī nak kūön Sepeti hēk tö nak tö nëttak inrē mahaköp nö in Yēsū. 3 Ngö ṙô ngaich ang Sīmōn Pītör nö in cha: “Kiröönngöre chin öich hatūök kāḵ.” Ngö ṙô ngaich cha-a: “In meh in īhö inrē kiröönngöre.” Kunyī-inyre ngaich cha-a ngaich yôklö nö el kupòk, höng öt pò-òv pöri cha-a ik hatööm.
4 Hē e ngaich nö hòṅ peuheū söktöhëich ngaich ang Yēsū nö ikūö kuyāyö, hö-ö pöri yik mahaköp nö akahakūö tö ò nö Yēsū. 5 Ngö ṙô ngaich ang Yēsū nö hatöönö cha: “Hol, ōt hòng nyā-aṅkūö* hī in yīö?” Ngö ṙô ngaich cha-a: “Hö-ö!” 6 Ngö ṙô anga-aṅ nö in cha: “Kavalngö ngam inhāṅlre yin lāhāmö ngam kupòk ngaich öthō min yī-ö öi öt pò-òv tö kāḵ.” Kavalngö ngam inhāṅlre ngaich cha-a, pōyen ngaich nuk pô cha kāḵ tö ahāṅlhötre ngaich ötkô ngaich cha-a nö tūök ngam inhāṅl. 7 Ngö ṙô ngaich ngam hanangenlōn Yēsū mahaköp nö in Pītör: “Ngam Mā ön kòl ngòh.” Hē Sīmōn Pītör ngaich nö hāngö e tö ò nö ngam Mā, hayutlöre* ngaich anga-aṅ pò ò nöng öt inyūtu* alaha ngaich sūtöre nö el ök mai. 8 El ök tö kun kupòk pöri yik tahëng mahaköp nö tūök ök inhāṅl tö tööḵlö aṅ tö kāḵ, kūö cha nöng öt yaha rôvat tö ngam kuyāyö, lohten cha-a nöng 300 fīt* rôvat tö e.
9 Hē cha nö teung nö i kuyāyö ngaich meuk nuk kāḵ cha-a tö ṙā-akṙen nö ikūö ök tö hūkūö ta-ök, ròtī inrē nuk umuh. 10 Ngö ṙô ngaich ang Yēsū nö in cha: “Nuk pô yīö taheui kāḵ kē-ěti yin in u.” 11 Yôklö ngaich ang Sīmōn Pītör ngaich tūök ök inhāṅl tö tööḵlö aṅ tö kāḵ, 153 ṙôken nuk tökiröng kāḵ. Pòrô pöri nuk kāḵ nö pōyen, sön ngam inhāṅl nö öt takaich. 12 Ngö ṙô ngaich ang Yēsū nö in cha: “Ta-a, töi nyā.” Öt hěngtak pöri in yik mahaköp tökô nö hatöönö ò nö ngö ṙô: “Achīö öm më-eṅ?” pò cha nöng akahakūö tö ò nö ngam Mā. 13 Kēḵ nuk ròtī ngaich ang Yēsū ngaich kē-ěkūö cha, kē-ěkūö cha inrē anga-aṅ tö nuk kāḵ. 14 Linūöi van Yēsū angū-ö nö hameuktöre nö ikūö yik haköptöre, unôichrit inchohlö ò nö ṙā-ang in yik tökapah.
15 Hē kinheūtkūö cha ngaich nö nyā ngö ṙô ngaich ang Yēsū nö in Sīmōn Pītör: “Sīmōn kūön Yôhan, mööḵlö hanangenlōn öm tö chu tö në?” Ngö ṙô ngaich ang Pītör nö in ò: “Heūṅ Mā, akahakūö man tö chu öich höng kirööngen hanangenlōn tö meh.” Ngö ṙô ngaich ang Yēsū nö in ò: “Hanëlen minë sīṅp chu man.” 16 Ngö ṙô hēk ang Yēsū nö in ò: “Sīmōn, kūön Yôhan, hangenlōn öm tö chu?” Ngö ṙô ang Pītör: “Heūṅ Mā, akahalōn man tö chu öich töng hangenlōn tö meh.” Ngö ṙô ngaich anga-aṅ nö in Pītör: “Sā inlahen më yōm sīṅp öm chěi, öm chumkūöṙen tö minë kun sīṅp chu.” 17 Ngö ṙô hēk ang Yēsū nö in ò: “Sīmōn, kūön Yôhan, hangenlōn öm tö chu?” Haṙivlōn ngaich ang Pītör hē ò nö hang ṙô ò nö lūöi heuh ṙô nö hatöönö ò nö ngö ṙô: “Hangenlōn öm tö chu?” Lökten ang Pītör nö ngö ṙô nö in ò: “Mā, keuheūtlöre mikahkūö man, akahakūö inrē më-eṅ tö chu öich kirööngen hanangenlōn tö meh.” Ngö ṙô ngaich ang Yēsū: “Hanëlen minë tö kun sīṅp chu. 18 Tökò-òṙô chin tö meh, hē meh ṙālö ngaich kahngenre më-eṅ chumhënöre ngaich öp töng lōn meh chahūhu meh chuh in e më-eṅ, hē meh pöri min öm köiny ngaich hateutnyö këlre min më-eṅ ngaich tahëng min öp tarik mahayutlen meh ngaich öp töt kū-ö lōn meh kiröönngöre ngaich chuh in e min më-eṅ.” 19 Ṙën anga-aṅ nö ngatī ṙô nö hameuktö ngam inlahen ò min nö kapah nö ha-öiny ngam Tēv. Hē kinheūt ṙô Yēsū, ngö ṙô ngaich anga-aṅ nö in ò: “Iṙūöhen man tömrit chu.”
20 Hē Pītör ngaich nö havöölökūöre ngaich meuk tö yīhi ök mahaköp anga-aṅ ök hanangenlōn Yēsū, anga-aṅ ön ngòh mahaköp hē ṙētak cha nö nyā tö harap ngòh samôntökūöre nö hatöönö Yēsū nö ngö ṙô: “Mā, achīö öp min mahachīlngövah meh nö kēngen meh?” 21 Hē Pītör ngaich nö meuk ök mahaköp, hatöönö Yēsū ngaich anga-aṅ nö ngö ṙô: “Mā, sitih inlahen ang min ngòh tarik?” 22 Ngö ṙô Yēsū nö in ò: “Yěn lōn chu angū-ö tö ò nö höngngöh hanöng saha yanīhi chu, kūö yòh öm më-eṅ hòṅ akahalōn tö inlahen e? Iṙūöhen man më-eṅ tömrit chu.” 23 Lökten ngaich nö keuheūtngöre chūök hināngö ngih ṙô nö elhôi yik prötör tö ngam mahaköp min nö öt kapah. Hö-ö pöri ang Yēsū nö ngö ṙô tö ò min nö öt kapah pön ngö ṙô anga-aṅ: “Yěn lōn chu angū-ö tö ò nö höngngöh hanöng saha yanīhi chu, kūö yòh öm më-eṅ hòṅ akahalōn tö inlahen e?”
24 Anga-aṅ ön ngòh mahaköp ngòh vamënyen në ṙô hēk kamūich në ṙô inrē, ngaich akahakūö ayī-ö tö minë vahënyö ò nö tökô-en.
25 Rö-ö pön pōyen minë la-en kahëken Yēsū misī, yēḵ u pöri nö ṙòkhöre kinūichhöt inlahen ngaich akahakūö chū-ö tö minë tö kūichi tölöömö līpöre nö öt chūökūö nö ikūö ngih panam.