Innëtö Chitri Yik Aṅ Kòrin
2 Ngaich Chin halēnngö ellōnre yēḵ chu min öich havan öich chuh in yīö ngaich öt hòṅ miṙivngölōn yīö. 2 Lökten yēḵ Chu min öich miṙivngölōn yīö, ngaich achīö min mahaṙamlōn chu, höng yip tö miṙivilōn tö Chu? 3 Ṙën Chin öich kūichten në taṙòkhöre öich in yīö ngaich yěich yih min ngaich yip chūök Chu öich hòṅ ṙamlōn ngaich uich haṙivlōn tö tī cha, pò Chu öich ṙatö-ellōnre öich in nup ṙô, nup löktö taneūngen Chu tö ngam ṙanamlōn, ngaich lökten in u anū-ö ṙô inrē yī-ö öi teūngen tö ngam ṙanamlōn. 4 Kūichhöti Chin öich in yīö öich holtö tökiröng kanihngenre hēk kanihngen ellōnre, holre tö ngam ṙôken mak matre, rö-ö nö kūö yīö öi hōtu öi haṙivölōn, ṙën pöri angū-ö nö ngatī, hòṅ yīö öi akahakūö tö ṙū-uti ngam hanangenlōn Chu tö yīö.
5 Yěn ōt tö haṙivölōn tī, rö-ö anga-aṅ nöng haṙivölōn tī tö chu, pön haṙivlōn tī inrē tö yīö öi ṙòkhöre. Hö-ö Chin lang hòṅ chökhu ṙô. 6 Ngam chinökṙen ngam tarik tö më tömaṙôngö ngaichö tölngö an, 7 hòṅ holtö neūkölōnre yī-ö öi aṙēlen ò hēk kētö inreuskö alaha ò, hòṅ ò nö ötkalē-ě miṙivlōn takô. 8 Lökten Chin öich ṙūöhöl alaha yīö öi kētö ṙinatö-ellōn öp tarik töre öi hangenlōn tö ò. 9 Lökten Chin öich kūichten ngih chitri öich in yīö, hòṅ Chu öich akahalōn tö yīö yěi hang minë chööngö öi i tökeuheūttöre hēk hö-ö. 10 Yip tarik tö aṙēlöng tö yīö, aṙēlen cha chū-ö inrē, ngaich yip töng aṙēlöng tö chu (yēḵ Chu öich aṙēlö tökööl), ikūö Kristū chū-ö öich ngatī inlahen töpòkūö yīö, 11 hòṅ ngam Satān min nö öt mihôiṅ tö hī,* tön rö-ö in öt akahakūö tö minë inchīlö* tī ò.
12 Ik hē Chu teung i Trô-as öich ahangkö ngam tölöök inhānga inlahen Kristū ngaich löpnyukūö ngam inkūp chu öich la-evṙen tö la-en ngam Mā, 13 höng öt ṙāḵtöre ngam mufē chu pöich öt kôtökūö tö ngam holre Taitös nö umuh. Lökten ngaich Chū-ö öich havë-eng chanūhure öich in yip mi-iyöng in e mahaköp ngaich kiröönngöre chū-ö öich chuh Maketònī.
14 Nööinyö ngam Tēv pöri ngam tö örheūheu nö urēhěkūö hī nö hachō-okūö hī nö im minhôiyö hī öi holröön Kristū ngaich löktö in hī tī anga-aṅ nö tānyö ngam tinhūsö ngam mikah elmatre!* 15 Pò hī ikūö ngam Tēv öi ahangkö ngam tötahūsa inlahen Kristū öi in më tö hòṅ hayöökaṙen hēk in më tö hòṅ ahetiyö, 16 ngam tö ngö, töng öt tahūsa angū-ö nö in më tö ahetiyö, yip kamū-ötö in ngam kinpaha ngaich tahūsa angū-ö nö in më tö hòṅ hayöökaṙen, yip kamū-ötö in ngam nômö. Ngaich achīö öp tö teungten nö kēken ngih tötṙanāngen la-en? 17 Teungten in ayī-ö, pò hī öt havahngen* ngam ṙô ngam Tēv öi sā inlahen yip rīkre tarik, tö tīntu pöri ayī-ö öi lamöktö in ngam Tēv öi hamòltö kanô-en ṙô re öi ṙò-òvö, heūṅ, lākūöre tī tö ngam Tēv öi ṙò-òvö hol Kristū.