Innëtö Chitri Yik Aṅ Kòrin
7 Lökten yī-ö kahōlö, yēḵ hī ngaich īnu tö ngih kinlēḵngô ngaich ta-a töi ha-etlöre ngaich ṙūöhöngre tö minë tö chōichötī tö ngam ellōn hēk tö ngam alaha ngaich hateūngöre im hanëtö, löktö im pinhë-eṅkūöre tö ngam Tēv.
2 Höng kētö chūök ih yin ellōnre. Öt tarīku tötlēkaṙen tö ih, ötrēhěn öi pala-aiṙen tī tö tahëng, ötrēhěn öi kēnyö yanöölenre in yip tahëng. 3 Hö-ö chin öich samūichlö fālen yīö öich ngatī ṙô, pò chu öich urěhngen ṙô in yīö tö hī yěi pòrô öi aṅ hēk kapah, höng ellōn ih yī-ö. 4 Mihôiṅ chin öich öt piyū-u ṙô öich vë-ekūö yīö, eū-eu yīö takô chin. Teūngen chū-ö tö inreuskö alahare, höng ṙamlōn inrē ngih ellōn Chu hē el ṙētak chanökö hēk miṙivlōn.
5 Lökten hē ih öi teung i Maketònī ngaich höng öt teūngen īhö tö kumchikṙenre, höng la-al minë tö sitih pöri īhö inkihtenre, pön lina-alkūö nö elkahôiṙen ngaich pinṙūtölōn nö lātuhēt. 6 Ngam Tēv pöri ngam kamëtö inreuskö alaha yip tö haṙivlōn tarik, kētö inreuskö alaha ih anga-aṅ nö löktö in Taitös nö ōt nö umuh. 7 Öt höng angū-ö, pöi meūkö Taitös nö teūngen tö inreuskö alahare nö löktö in yīö. Havan anga-aṅ nö vë-eny nang ih tö yīö öi kapahare öi hòṅ meukkūö chu ngaich kirööngen miṙivlōn yī-ö hēk paṙūtalōn inrē yī-ö tö chu,* kirööngen ngam ṙanamlōn chu hē chu öich hāngö e.
8 Pòrô yī-ö öi haṙivlōn tö tī chu öi löktö in nup chitri chu ngaich öt afēken u chū-ö. Heūṅ, kô-en chin sin ik urěh öich fēken e (pön pòrô angū-ö nö töng rahëichtakūö ngaich pöri angū-ö nöng haṙivlōn tī tö yīö), 9 ngaich pöri chū-ö töngamuh öich ṙamlōn, ötkūö yīö sin haṙivlōn, kūö yīö pöri öi halööktitre tökūö ngam miṙivlōnre. Pò ngam Tēv nö haṙivlōn tökūö yīö öi haṙivlōn hēk öt pala-aiṙen tö tī ih. 10 Pò ngam miṙivlōn nö ṙamölōn tī tö ngam Tēv nö asīöp ngam invöötö ellōn ngaich kēten hī angū-ö im inyööken ngaich öthō min öi fēḵ unôich. Ngam miṙivlōn ngih panam pöri kamëtö kinpaha. 11 Yěh meuk! Iṙôken lanökngöre tī ngam miṙivlōn ngam tö ṙamlōn tī tö ngam Tēv, heūṅ, ngaich hameuktöre yī-ö öi öt hēngö fālen ngaich iṙôkö tanāinyö yī-ö öi meuk minë vanāichöre. Yih ngam pinhë-eṅkūö nö in yīö ngaich sīöplö ngam kumlēḵ lōn yīö hēk nganötö yīö ngaich halööktitre yī-ö tö minë vanāichöre, ngaich hameuktöre yī-ö in nup tö sitih öi töt pitōtuvö.* 12 Ngam kahūichtö chu chitri, rö-ö ön nö chö-öinytö yip tötlöökö la-en sin, rö-ö inrē nö chö-öinyten yip tö hayë-e nö kūichö. Ṙën pöri angū-ö nö kūichö, hòṅ yīö hameuktöre ikūö ngam Tēv tö yīö öi kô-en hangṙô ih. 13 Lökten in öi teūngen tö inreuskö alahare.
Rö-ö nö ngam inreuskö alaha ih, pön ngam ṙanamlōn taneūngen Taitös tö tī-iv tö ih inrē öi ṙamlōn. Pò yīö öi ṙòkhöre höhlö tī tö ngih ellōn chu. 14 Ngam ṙô chu öich eūkö inlahen yīö öich in Taitös, öt sirōngkūö chū-ö tö inlahen ò. Sā nup ṙô ih nö ṙòkhöre nö tölöng, nup ṙahônyö ih öi in yīö. Ngaich ngatī inlahen nup ṙô tö holtö ineū-eu vahënyö ih in Taitös, ngaich ṙòkhöre anū-ö nö kô-en inmeuknyi. 15 Rö-ö nöng angū-ö, yēḵ ò nö fēkö inlahen yīö öi ṙòkhöre öi hang chööngö hēk holtö pinhë-eṅkūöre öi ha-öinytö yīhi ò, ngaich ṙūöhölre hēk ngam hanangenlōn ò tö yīö. 16 Ṙamölōn takô chin, kūö chu öich ṙatö-ellōnre öich in yīö in nup tökeuheūttöre.*