I minë-eny Heprāi
1 In nuk tö ha-ehāngen ṙētak misī ngam Tēv nö ṙōlheuh hēk ṙōlkangen inlahen nö vë-ekūö yik muvöhngö hī nö löktö in yik pròfět ṙô. 2 Ing mana-angrit në sakāmö pöri anga-aṅ töngamuh nö löktö in ngam Kūönre ṙô nö vë-ekūö hī, ngam tövīlöng tö ò nö amin në taṙòkhöre chehen hēk löktö in ò inrē nö vīlöng në chööngö ngih panam.* 3 Löktö in ngam kūön nö meūkö ngam kanôlò ngam Tēv hēk sā nyat ngam Tēv takô anga-aṅ, löktö im minhôiṅyö ngam ṙô re anga-aṅ nö ṙap minë taṙòkhöre chehen ngaich unôichrit kinheūten ò nö söichlö në tökööl hī nö ahetlen hī ngaich ūichngöre anga-aṅ nö lahāmö ngam tökiröng takô nö lātulöng. 4 Ngatī inlahen anga-aṅ nö mötlö tö më ma-ahānga, uroh inrē anga-aṅ nö amīnuvö tö tö mööḵlö lanöökö minë-eny tö cha.
5 Sā ngih inchō elmat, ihē ang ngam Tēv nö ngö ṙô nö in yip ma-ahānga: “Më-eṅ man kūön chu ngaich töngamuhten Chū-ö öich yöng meh”? Hēk ngih inrē: “Chū-ö chin min yöng ò ngaich kūön chu min anga-aṅ”? 6 Ngö ṙô pöri anga-aṅ nö ṙôtö inlahen öp ṙētak hē ngam Lanòh ò min nö havan nö yih nö ing panam: “Hökngen yip taṙòkhöre ma-ahānga ngam Tēv nö sulngöre nö ikūö ò.”
7 Ngö ṙô inrē anga-aṅ nö ṙôtö inlahen më ma-ahānga: “Vī më ma-ahāngare anga-aṅ nö tökalēḵ hēk sā hanūkūö tameūiyö yip tarik ò.”* 8 Ngö ṙô pöri anga-aṅ nö ṙôtö inlahen ngam Kūönre: “Örheūheu an ngam Tēv nö kantēra meh ngaich ngam tinkung meh nö tinkung lanöökö.* 9 Hangenlōn më-eṅ tö ngam lanöökö ngaich kunyaha elmat tö ngam ötlanöökö. Lökten ngam Tēv, heūṅ, ngam Tēv meh nö hacham elkui meh tö ngam tavī-i ṙanamlōn ngaich mötlö tī nö kētö ṙanamlōn meh tö më hol meh.” 10 Hēk ngih inrē: “Ō Mā, löktökūö raneh më-eṅ öm vīlö machööḵlö ngih panam ngaich vahīkūö kuntī meh ngam halīöngö. 11 Chuhngöre nun min anū-ö, öt chanuhuvṙen pöri min më-eṅ, sā ṙēngen öp chehen cha-a min nö ṙòkhöre nö hötṙeh. 12 Ngaich löömö cha min më-eṅ nö sā ṙēngen öp töhěng kinṙum, heūṅ, sā inlahen nup tölöömö hilā, haṙī-iyö min cha-a. Höng hěngren pöri min më-eṅ öm sā tö sā re, öt kinheūtu min ngam samyeūheu meh.”
13 Ihē pöri anga-aṅ nö ngö ṙô nö in yip ma-ahānga: “Ūichngöre man lahāmö chu hanöng saha tī Chu öich vītö yip tökunyaha elmat tö meh nö ranöönöröön meh”? 14 Röh yip cha-a nö ma-ahānga yip töhet mameukṙen,* më tö tīntu nö mameukṙen yip tarik yip tö hòṅ teūngen tö ngam inyööken?