Inhānga Kahūich Yôhan
15 Chū-ö chin tökô-en vāin angkūr ngaich yōm panô-òṅ ngam Yöng chu. 2 Minë töng pak chu töt ṙônguvö fāngi min anū-ö tö ò ngaich nup pak tö ṙônguvö ngaich ahetlöng rōi anū-ö, pön hōtu anū-ö nö ṙūöhlöre ṙòng. 3 Ngam ṙô chu öich in yīö ngaich yī-ö öi höng urěhten öi hetlö tökūö e. 4 Köp yin im hinëngö in chu ngaich örheūheu min chū-ö im hinëngö in yīö. Ṙôngu ön ngòh pak hanöng saha e nö köp nö im vāin, öt kanahngenre ön ngam pak nö kētö ṙòngre yěn öt in ò ngam vāin, ngatī yī-ö yěi öt im hinëngö öi in chu ngaich ötkô öi kētö ṙòngre. 5 Chū-ö chin vāin ngam angkūr ngaich pak ò yī-ö, ngòh mi-im hinëngö nö in chu in ò chū-ö inrē im hinëngö, pōyen kahëti anga-aṅ tö ṙòngre öt kanò-òv ön yēḵ ò nö köhngen tö chu. 6 Yěn ōt töt mi-im hinëngö nö in chu ngaich kavaliyö anga-aṅ nö sā inlahen ngam töhěng pak nö kavaliyö ngaich nyangngö, ngatī inlahen yin vē tarik nö hamūl minë pak ngaich fönghöt u nö ikūö tameūiyö. 7 Yēḵ yīö öi im hinëngö öi in chu hēk ellōnre tī tö minë ṙô chu ngaich nup töng kuilōn yīö hēk havëkö yīö ngaich kē-ěvkūö min yī-ö tö u. 8 Löktö in e ön ngam nöönyö ngam Yöng chu yēḵ yīö min örheūheu kētö nup tö pōyen ṙòngre hēk hameuktöre öi mahaköp öi in chu. 9 Sā ngam Yöng nö hangenlōn tö chu ngatī hanangenlōn inrē chū-ö tö yīö, iṙūöhen yin öi köp im hanangenlōn chu. 10 Yēḵ yīö min öi hang minë chööngö chu ngaich köp min yī-ö öi im hanangenlōn chu, sā inlahen chu öich hang minë chööngö ngam Yöngre ngaich köp öich im hanangenlōn ò.
11 Ṙën chin öich vënyen në ṙô öich in yīö hòṅ yīö öi teūngen tö ngam ṙanamlōn ngam taneūngen chu. 12 Ngih ön chööngö chu hangenlōn yin tö höö sā chu öich hangenlōn tö yīö. 13 Ōt hòng tö ngatī ṙôken hanangenlōn nö uroh nö kēngö nômöre nö chö-öinytö holre? 14 Nup kahëtö chu chööngö yēḵ yīö min öi hāngö u ngaich hol chu min yī-ö. 15 Hö-ö chin ngaich öich mahalanṙen ngö ṙô öich havëken yīö, pò më mahalanṙen nö öt akahakūö tö la-en më mā re. Hol chu pöri yī-ö tö ṙô chu pò nup töng ahang chu öich in ngam Yöng ngaich vënyen u chū-ö nö ṙòkhöre nö in yīö. 16 Hö-ö yin yī-ö öi katöllen chu, katöllen yīö pöri chū-ö, ṙën chin öich vīlen yīö hòṅ yīö öi kiröönngöre ngaich iṙūöhen öi kētö ṙòngre hēk örheūheu inrē nup ṙòng yīö nö köp hòṅ nup havëkö yīö öi im Yöng öi lökngörit i minë-eny chu ṙô ngaich kē-ěvkūö min yī-ö tö u.
17 Ṙën chin öich kēten në chööngö öich löktö in në ṙô hòṅ yīö öi hangenlōn tö höö. 18 Yēḵ ngih panam nö surīkhen yīö ngaich köpölōn yī-ö tö e nö surīkhen chu urēhěkūö yīö. 19 Yēḵ yīö öre aṅkūö ngih panam ngaich hangenlōn ngih panam tö yīö kūö yīö öi aṅkūö e, hö-ö pöri yī-ö öi aṅkūö ngih panam, pò chu öich katöllen yīö öich ṙā-ang ing panam lökten ngih panam nö surīkhen yīö. 20 Köplōn yin tö nup ṙô vahënyö chu öich in yīö: Hö-ö ön ngòh mahalanṙen nö kiröng tö ngam yöngṙen re. Yēḵ cha nö ötlēḵken chu ngaich ötlēḵken yīö inrē min cha-a. Yēḵ cha nö hangṙô chu ngaich hangṙô yīö inrē min cha-a. 21 Kūö ngam minë-eny chu pöri min cha-a nö ngatī inlahen nö la-al yīö, pò cha nö öt akahakūö tö ngam tamīnten chu. 22 Yēḵ chu öre öt yih hēk öt vë-ekūö cha ngaich öt īnu cha-a töm tökööl ngaich pöri cha-a nö öt heuveū-eu ṙô nö mahangre tökūö nup tököölre. 23 Ngòh sumrīkhen chu, sumrīkhen ngam Yöng chu inrē anga-aṅ. 24 La-evṙen chin tö minë la-en öich elhôi cha minë töt la-en yip tahëng, yēḵ chu öre öich öt la-evṙen tö minë la-en öich elhôi cha ngaich öt aṅhavin öre cha-a tö ngam tökööl ngaich pöri cha-a nö meūkö chu ngaich surīkhen ai tö ngam Yöng chu. 25 Ṙënten pöri angū-ö nö ngatī inlahen hòṅ ngih tö kūichi imat nup chööngö cha nö teungtökūö: ‘Öt löknyu chööḵnyi cha-a nö surīkhen chu.’ 26 Kētö hamòlṙen yīö chin min öich ṙā-ang in ngam Yöngre ngam töhet kumlēḵ ngam kanô-en ngam lamöktö in ngam Yöng angū-ö min hamòlṙen yīö öi vënyö inlahen chu. 27 Ngatī inlahen inrē min yī-ö öi hòṅ vënyö inlahen chu, pò yīö öi löktökūö raneh öi in chu.