Raneh Chitri Tösalònikē

5 Kahōlö, ihē ön min në ṙô, öt uroh in öi kūichtö inlahen ngih ṙētak e hēk rôta e inrē. 2 Pò yīö öi akahakūö takô tö ngam sakāmö yanīhi Yāvē* nö sā inlahen yanīhi öp mu-ulāiya tö hatööm. 3 Hē yip tarik min nö ngö ṙô, “Lanāmö hēk kumchikṙen!” ngaich im hē e min nö rötten öp inlahen cha nö ahetiyö, sā inlahen öp tö puyōsö ṙung yöngnyīö nö rötten kinyô-ò ngaich öt löktu min cha-a nö ötkô-òngvah. 4 Kahōlö, hö-ö pöri yī-ö el sinngūlö töp lökten öp sakāmö min nöng rötten nö in yīö nö sā ngam mu-ulāiya nö rötlö tö ngam yanāngö. 5 Pò yīö ṙòkhöre kūön ngam hanātö hēk kūön ngam sakāmö inrē, ötrēhěn in ayī-ö aṅ im hatööm, ötrēhěn öi aṅ im sinngūlö.

6 Lökten, ta-a ui haṙòh öi sā yip tahëng, aṅhaṅti pöri hēk hīnöre inrē. 7 Yip mahaṙòh, haṙòh cha-a tö hatööm ngaich vē mihiyōi nö hiyōi cha-a tö hatööm. 8 Ayī-ö pöri mi-im sakāmö, ta-a töi hīnöre ngaich hayutlöre tö ngam ṙinatö-ellōn hēk hanangenlōn nö lanak elngòh ngaich sumpīövlöre tö ngam mineūka aṅ im inyööken. 9 Pön rö-ö ngam Tēv nö katöllen hī öi hökiṙen öi fukkui tö ngam tanāinyö ò, katöllen hī pöri anga-aṅ öi teūngen tö ngam inyööken öi löktö in ngam Mā hī Yēsū Kristū. 10 Kapah ang Kristū nö chö-öinyten hī, hòṅ hī pòrô aṅ hēk kapah, hol ò min ayī-ö öi aṅ. 11 Lökten yin iṙūöhen kö hareuskö alaha höö hēk kö hangëken höö, sā inlahen yīö öi ṙònghëichṙen.

12 Kahōlö, hòṅ aṙēḵtu ṙô in tö yīö öi milēḵṙen tö yip tö kalēḵ alaha nö la-evṙen nö elhôi yīö hēk mahachōkūö yīö nö im Mā hēk tö yip vamë-ekūö yīö nö halēnö yīö, 13 ngaich holtö hanangenlōnre öi milēḵṙen tö cha tökūö nup la-en cha, vī ngam lanāmö öi in höö. 14 Hēk kahōlö, ṙūöhöl alaha yīö in öi vëken* yip töng kamnahanglōnre nö in nup inlahenre, hareuskö alaha yip tö haṙivlōn öi löktö in nup ṙôre, kētö inyööken yip tötkalēḵ-en hēk hameuktö manööyöre öi in yip taṙòkhöre. 15 Chumkūöṙen un hěngtak mahavalvah töchōich nö i töchōich hēk örheūheu öi löökö inlahen öi in höö hēk in yip taṙòkhöre inrē.

16 Örheūheu ṙamölōn. 17 Iṙūöhen im vinë-ekūötēv. 18 Kētö nööinyö i tökeuheūttöre. Pön angū-ö kuilōn ngam Tēv nö in yīö nö löktö in Kristū Yēsū. 19 Un asökiröön ngam la-en ngam töhet kumlēḵ nö la-evṙen.* 20 Un miyëḵ elmat tö minë tö eūka. 21 Kalah nup ṙô i tökeuheūttöre ngaich nup tövai, köptī tö u. 22 Iṙūöhen ṙūöhöngre tö nup töng sitih ötlanöökö.

23 Ngih ön havëkö Chu tö ngam Tēv lanāmö nö ahetlen yīö öi ṙòkhöre. Kahōlö haköpken ngam ellōnre yin, nômöre* hēk alahare, hòṅ yīö öt fāluṙen i tökeuheūttöre im ṙētak yanīhi ngam Mā hī Yēsū Kristū. 24 Tökô-en an ngam mahavëten yīö ngaich öthō min anga-aṅ nö öt ngatī inlahen.

25 Kahōlö, iṙūöhen vë-elkui ih.

26 Sinlāmö in yīö ṙòkhöre prötör im töhet hināmökūö.

27 Kētö ngih la-en yīö Chin öich i minë-eny ngam Mā tö ngih chitri nö haköpö nö ikūö yip taṙòkhöre prötör.

28 Örheūheu an yēḵ nö in yīö ngam tökiröng miṙēḵlōn ngam Mā hī Yēsū Kristū.