I minë-eny Rōma
11 Ngö ṙô Chū-ö öich hatön? Sō-en yip tarikre ang ngam Tēv? Hö-ö öt ngatī! Pò chu Chū-ö inrē öich tö hěngtak öich aṅ Israel, hēk kūön* Aprahām lamöknyö im miyööngö Penyamin. 2 Öt sō-en yip tarik an ngam Tēv yip mikahkūö ò tö lā urěh. Öt akahakūö öi hē Ĕlaicha nö vë-eny inlahen yik Israel nö in ngam Tēv, ngaich asuh öp ṙô ngam töhet līpöre tö inlahen e? 3 “Ō Yāvē,* ngaich yik nö fëlngen yik pròfět meh ngaich ultuvö nuk tahaklö meh höng hěngtit tak Chū-ö ngaich hēk cha-a nö hòṅ kēngö nômö Chu.” 4 Sitih ṙô pöri ngam Tēv nö sapṙô ò? “Ṙömöng ōt yip tö 7,000 tarik chu, yip töt sāmimtö kui kinmônöre nö sōntöre nö ikūö Pē-al.” 5 Ngatī ṙēngen töngamuh yip tö ōttit tarik tö katöllöng tökūö ngam tökiröng miṙēḵlōn ngam Tēv. 6 Yēḵ ngih kintöllö nö löktö in ngam tökiröng miṙēḵlōn ngaich tö ngö manah angū-ö tö e nö öt löktö in minë la-en cha. Pön hö-ö öre ngam tökiröng miṙēḵlōn nö köp nö tökiröng miṙēḵlōn.
7 Sitih ṙô öi pökeh? Tö ngam chahöh më aṅ Israel nö holtö mana-anyre öt teūngen cha-a tö e, teūngen pöri yip tö katöllöng. Ngaich rīkre yip tahëng töngëḵ-eṅ ellōn, 8 sā kinūichngö e nö ngö: “Sā ṙēngen kamëtö tö lapat inròhò cha ngam Tēv ngaich sā tötmeuk minë mat cha hēk sā töt hang minë nang cha, söl ing töngamuh cha-a nöng ngatī inlahen.” 9 Ngaich ngö ṙô inrē ang Tāvit, “Ngam mīs cha nö vītöre nö inhūöt, tinngöp ihong kinvē-ěre hēk lāinyngen cha nö teūngen tö sāchare. 10 Hökngen nup mat cha nö sangūli hòṅ cha nö ötmeuk ngaich örheūheu ngam ṙat cha nö sangôni.”
11 Lökten chin ngö ṙô öich hatön, ngatī inlahen hòng cha-a nö kavē-ěre töp lökten cha nöng örheūheu nö fukngö? Hö-ö öt ngatī, kūö minë tövāich pöri kahëken cha nö teūngen më tahëng mihëṅṙö tarik tö inyöökenre hòṅ më Yahūti nö yīhi ranāinyngö. 12 Yěn kūö nup tövāich kahëken cha ngih panam nö teūngen tö inkòlô re hēk kūö kanūöṅnngöre cha nö teūngen më tahëng mihëṅṙö tarik tö inkòlô re, ngaich iṙôken yanöölen cha-a yěn pōyen kinṙeuklö!
13 Vë-ekūö yīö Chin yī-ö tahëng mihëṅṙö. Chū-ö chin tanīnöṙô më tahëng mihëṅṙö, tö ngö manah tö Chu öich tö tīntu öich chuh in cha, lökten Chin öich kirööngö minlēḵṙen* tö ngih la-enre 14 hòṅ chu öich harāinyngen yip tarikre ngaich hayööken yip rīkre in cha nö teūngen tö ngam inyööken. 15 Lökten hē cha nö sōḵ-ovö ngaich löktö in e nö vīnyöre kūö ngam talöökö ngih panam nö halāmtöre nö in ngam Tēv, ngaich fē-a man yēḵ cha nö hō-ovö ngaich sitih inlahen cha-a? Sā ṙēngen yip tökapah sin cha-a, hachohlöng pöri nö ngaich. 16 Hěnghöre yěn sā ṙēngen ngam raneh ṙòng ngam tökumul atta nö kē-ě nö töhet ngaich ṙòkhöre ngam tökirachö atta nö het ngaich yēḵ ngam ṙěh nö töhet ngaich töhet inrē minë pak.
17 Ōt nun minë töliköliyö pak ngam tövai chōn Òliv ngaich pòrô më-eṅ öm pak ngam chōn Òliv aṅ elinchōn ngaich taptu öm in e, ngaich vītöre më-eṅ öm tökôlò alaha ṙěh ngam chōn Òliv. 18 Lökten um kūöṅn elmat tö minë tölaköli pak ngam chōn tökūö tanööḵlöre tö ngam tanāilölōn* yēḵ meh öm tailölōn* ngaich köpölōn më-eṅ tö meh öt haköpken ngam ṙěh pön ngam ṙěh mahaköpken meh. 19 Ngö ṙô min më-eṅ: “Ṙën nun minë pak ngam chōn nö likölli pò chu hōtu hataptu in öp chōn.” 20 Löngö ṙô man, ṙën pöri cha-a nö likölli pò cha nö kūöṅnen ṙinatö-ellōn, kūö ngam ṙinatö-ellōnre pöri më-eṅ öm köp ṙāngen ngam tanāilölōn pa-ekūö pöri. 21 Lökten yēḵ ngam Tēv nö öt ṙāḵlö minë tökô-en pak ngaich öt ṙāḵlen meh inrē min anga-aṅ. 22 Lökten chumkūöṙen tö inlahen ngam Tēv nö sitih inlahen nö hameuktö miṙēḵlōnre hēk sitih inlahen nö hameuktö tanāinyöre. Yip tö fukngö, in cha anga-aṅ nö hameuktö ngam tanāinyöre, in yīö pöri ngam miṙēḵlōn ò lökten man haköpngöre im miṙēḵlōn tön fangiyö man min më-eṅ inrē. 23 Ngaich yěn hēk cha-a nö ṙatö-ellōnre ngaich hataptu hēk min cha-a nö in ngam chōn pò ngam Tēv nö mihôiṅ hēk nö hatapten cha. 24 Lökten yēḵ meh öm fangiyö öm ṙā-ang in ngam chōn Òliv aṅ elinchōn ngaich hataptu öm in ngam tökô-en chōn Òliv ngam tö teūchtu nö el panô-òṅ, yěn töng nehngenre ṙung anū-ö nö öt ngatī inlahen ngaich iṙôkö lanööṙen minë tökô-en pak nö hataptu nö in ngam chōnre Òliv.
25 Kahōlö, öt lōnu chu-ö tö yīö öi höng akaha öi imatre ngaich tölngenre öi öt akahakūö tö ngih töhet töt mikahkūö sin. Rīkre yip Israel töng ṙömöng köp nö ngëḵ-eṅ ellōn hanöng sā më tahëng mihëṅṙö nö öl nö ṙòklöre kinṙeūkö. 26 Ngaich ngatī inlahen nö ṙòkhöre më aṅ Israel nö teūngen tö inyöökenre. Sā kinūichngö e nö ngö: “Löktö Siyôn öp min ṙamā-any* nö yih, ngaich löktö in Yāköp tī min ngam Tēv nö ahetngen nup la-en, nup löktö inlahen ngam Tēv nö öt milēḵkaṙen.” 27 Yēk chu min öich ahetngen nup tökööl cha ngaich möl min chū-ö öich kilēḵngôre in cha. 28 Kô-en cha-a nö sō-en ngam tölöök inhānga ngaich vītöre nö tökunyaha elmat tö ngam Tēv ngaich lökten in e yī-ö öi pōyen yanöölen. Ngam kinlēḵngô pöri nö in yik muvöhngö cha misī, angū-ö lāinyngen më rīkre in cha nö katöllöng tö ò nö hol ò. 29 Lökten ngam Tēv nö öt haṙīḵngö ngam fëslare nö i alaha minë inlōnti hēk invëkö. 30 Hěng ök ṙētak misī hē yīö öt hang chööngö ngam Tēv, ṙën pöri yī-ö öi teūngen töm neūkölōn, pò cha nö öt hang chööngö. 31 Sā yīö öi teūngen tö ngam neūkölōn tökūö cha nö öt hang chööngö, ngatī inrē cha-a min nö teūngen tö ngam neūkölōn. 32 Lökten ngam Tēv nö hökngen cha nö ṙòkhöre nö el ngam inköövö töt hinang chööngö, hòṅ ò nö hameuktö ngam neūkölōnre nö in cha nö ṙòkhöre.
33 Öt kūöngu ṙū-uti ön ngam kanòlô, mikah hēk mikah elmat ngam Tēv! Öt akaha elmat ayī-ö tö nup fësla ò hēk öt akahakūö inrē tö nup talöökö ò. 34 “Achīö öp tökô nö akahakūö tö mufē Yāvē* hēk achīö öp tökô nö kētö inlēnö ò?” 35 Hēk, “Achīö öp kamë-ekūö ò hòṅ u nö haṙëniṙen tö ò?” 36 Pò në taṙòkhöre nöng aṅ in ò hēk lamöktö in ò në chehen inrē. Nööinyö ò yēḵ nöng örheūheu. Āmen.