Inlahen La-en Yik Tanīnöṙô
1 Tölngö tö-akaha Ti-òfilös, löktökūö in nuk ṙētak, hē Yēsū misī nö rultenre nö la-evṙen tö nuk töng sitih la-enre, nuk töng ṙô ò inrē nö haköphöti, kūichö anū-ö tö chu nö imat öp raneh līpöre kahūichtö chu 2 Kūichi nö imat e nuk ṙētak, hēk nuk ṙô Yēsū nö kētö inlēnö nö in yik katöllöre tanīnöṙô nö löktö in ngam töhet kumlēḵ, ngaich möl anga-aṅ nö kēḵlöng nö chuh el halīöngö. 3 Unôichrit inlahen ò nö hakihtuṙen nö söl ik kinpahare, ṙōlheuh anga-aṅ nö hameuktöre nö in yik haköptöre, nö inmeuktö ò nö kô-en nö ha-aṅlöng, fën anāi tum sumkam anga-aṅ nöng meūkö tö cha. Ngaich vë-eny nang cha tö inlahen ngam Pūlngö ngam Tēv. 4 Hē ò nö meukkūö yik haköptöre ngaich kētö chööngö anga-aṅ nö in cha nö ngö ṙô: “Uh yin kiröönngöre öi ṙāngö Yērūsalem. Höngngöh öi in e ngaich hökkö taneungtökūö nup ṙô kinlēḵngô ngam Yöng hēk nup ahang yīö inrē öi in chu; 5 pön höng aṅhtī tö mak misī ang Yôhan nö kētö vinôkö, höng öt ṙōltöre sumkam pöri min yī-ö öi löktö in ngam töhet kumlēḵ öi vōkö.”
6 Hē yik mahaköp nö hamūlöre ngaich hatöönö ò nö ngö ṙô: “Mā, havanten ngih inyööngö öm min öm in më aṅ Israel ingih ṙētak?” 7 Ngö ṙô anga-aṅ nö in cha: “Öt chööngu yin yī-ö akahakūö tö ngam ṙētak* hēk tö ngam kumföötö, höng ngam Yöng tö chööngu nö halēnken ngam ṙētak. 8 Yēḵ ngam töhet kumlēḵ pöri min nö in yīö ngaich teūngen min yī-ö tö kumlēḵre ngaich vënyö ngam inlahen chu, öi i Yērūsalem keuheūtngöre chūök i Yūta i Samariā hēk in nup tö marôvat kamngö ikūö ngih panam.” 9 Hē kinheūtö ṙô ò ngaich nö ṙôten në ṙô, ṙömöng ngëichken ò cha-a ngaich kēḵlöng ngaich anga-aṅ nö chuh lātulöng ngaich hayūni tö ök taṙul nö ikūö cha. 10 Hē ò nöng ṙònghöichröön nö kiröönngöre höng haköp matre cha-a nö ngëichkö el halīöngö, chalô ngaich tö nak tö nët tak tö isōho inyut tarik samökhak nö in cha 11 Ngaich ngö ṙô cha-a: “Yī-ö tarik aṅ Kelelī, kūö yòh öi sökhak öi höng ngëichkö el halīöngö? Anga-aṅ an ngòh Yēsū ngòh tö kēlöng nö chuh el halīöngö nö ṙā-ang in yīö, ngaich ngatī inlahen yanīhi min anga-aṅ, sā inlahen yīö öi meuk chanūhu ò nö chuh el halīöngö.”
12 Ngaich löktö im rôngö cha-a ngam tö Rôngö Òliv invëka nö havantöre nö i Yērūsalem, röhta ngih rôngö nö i Yērūsalem höng sā rò-òlkūö el talöökö cha yěn chuh in ngam Haneūheu Töhet Sakāmö. 13 Hē yik mahaköp nö teung nö in ngam panam Yērūsalem ngaich chuh in ök lāmatulöng cha-a uròhò ngam chūök cha nö höngngöh, cha-a yin vē mahaköp hē Pītör, Yôhan, Yāköp, Antaru, Filip, Tômas, Partòlòmai, Mëtiv, Yāköp ök kūön Alfai Sīmōn ök tö ngöt hēk Yūta ngam kūön Yāköp. 14 Ṙòkhöre cha-a nöng hēngö chö-öiny nö vë-ekūötēv, in cha inrē yik yöngnyīö, tö yik kahëm Yēsū hēk tö ök yöng ò Mariā.
15 Hē u anū-ö sakāmö hěngheuh ngaich ang Pītör nö söklöre nö elhôi yik mahaköp (lohten nö 120 ṙôken cha-a*) ngaich ngö ṙô anga-aṅ: 16 “Kahōlö, ngam tökilē-ěyö inlahen Yūta tö ngam töhet kumlēḵ nö in Tāvit tö hòṅ teung angū-ö. Kumtö yik tarik ang Yūta nö chuh in Yēsū yik tö hòṅ kēḵ an.* 17 Tö kaheukhötre anga-aṅ nö in ih hēk kamëtöre inrē nö la-evṙen nö sā ih. 18 (Anga-aṅ ön ngòh tarik lamöktö i michūṙenre nö havah ök tumlat, chavālkötikui anga-aṅ nö suktöre ngaich lakukköiny aich, chalulköiny ngaich nuk puhū ò. 19 Ṙòkhöre yik tarik mi-iyöng Yērūsalem nö akahalōn tö inlahen e, lökten ngaich cha-a nö kaheuk minë-eny ök tumlat nö i ëlô re nö Akeltama, ngam tö ngö invëka, “Tumlat mahām.”) 20 Pön ngö kinūichö angū-ö nö im līpöre Salmai, ‘Hökngen ngam patī ò nö ahetiyö nöng öt aṅhav kūö hēk ngam la-en ò nö kētu nö i tahëng.’* 21 Lökten angū-ö nö töt ṙanāngen, nö hòṅ katöllöng öp tarik nö ichūöktit ò öp lamöktökūö raneh nö ihôi hī, ik hēten ngam Mā Yēsū nö la-evṙen* nö ihôi hī. 22 Nö löktökūö ik ṙētak takô hē Yēsū nö vōkö tö Yôhan. Löktökūö in e angū-ö sakāmö söl ik hē ò nö kēlöng nö chuh lātulöng. Tö hòṅ kôtamat inrē öp tarik nö meūkö Yēsū nö hachohlöng nö ṙā-ang in yip tökapah.”
23 Lökten ngaich cha-a nö kēḵ minë-eny nak tö nët tak mahaköp, raneh ang Yôsěf ngam tö Pārsöpas hēk Yustös invëka, ngaich ngam tahëng ang Mātī. 24 Ngaich vë-ekūötēv ngaich yik mahaköp nö ngö ṙô: “Ō Yāvē,* më-eṅ öm tö akahakūö tö ellōn taṙòkhöre tarik vë-eny nang ih man tö öp katöllöre in nā tö nëttak tarik. 25 Hòṅ ò nö kēḵ ngam la-en hēk kamngö chūök tanīnöṙô ngam töhayë-eiṙen tö Yūta ngaich höng lök in nup kuilōnre.” 26 Chaplö nuk lòtrī ngaich cha-a nö i minë-eny cha. Ngaich Mātī tö meutnyi minë-eny, anga-aṅ ngaich tö kaheuklöng nö in yik tö 11 tak tanīnöṙô.*