I minë-eny Yāköp

1 Yāköp ngam mahalanṙen ngam Tēv hēk ngam Mā Yēsū Kristū, kūichhöti an nö in më tö 12 miyööngö më tökeuheūtngöre chūök nö parātiyö:

Sinlāmö!

2 Kahōlö, ṙanamölōn an yēḵ nö in yīö yēḵ yīö öi la-al minë töṙōlkangen kinlaha, 3 pò yīö öi akahalōn tö ngam tökalaha ṙinatö-ellōn yīö nö angū-ö min ma-asīöp ngam manööyö. 4 Hökngen ngam manööyö pöri nö keuheūtngö ngam la-enre, hòṅ yīö öi kô-en* öi in nup taṙòkhöre hēk öt pitōtuvö ngaich öt hāṅten öi in nup tökeuheūttöre.

5 Lökten yěn ōt tö hāṅten tö mikah nö in yīö, hökngen ò yēḵ nö iṙūöhen nö havëkö kūö ngam Tēv ngaich kē-ěkūö ò min anga-aṅ, pò ngam Tēv nö tötṙāyu tī nö kē-ěkūö taṙòkhöre hēk öt mumṙē-ang inrē.* 6 Hökngen ò pöri nö holtö ṙinatö-ellōnre nö havë-a nö un rahëichnyen kintööḵngölōn, pò ngòh tö katööḵngalōn nöng sā mahūṅvö ngam mai ngam töng hōḵ nö fööka tö kuföt nöng halönyköre. 7 Lökten öp tö ngatī inlahen tarik nöng un meūkkö nup taneūngenre nö in Yāvē.* 8 Höng tö tönëtkangen ellōn öp anga-aṅ tarik hēk katööḵngaṙen ellōn nö inup taṙòkhöre.

9 Ngòh prötör töng yāicha, hökngen ò yēḵ nö ṙamölōn* kūö ò ngaich nö hapōilöng. 10 Ngaich ngòh tökôlò, hökngen ò yēḵ nö ṙamölōn, kūö ò ngaich nö hayāichiyö, pò ò min nö sā inhetngö minë tö sīöplö pūl el maitān. 11 Sā ṙēngen ngam tavūöi yěn meūtlö nö holtö ṙanāchö matre ngaich nyangngö ngam chōn ngaich sukngöre minë pūl tökūö nyanīkngöre ngaich hö-övö ngam vanāyö e, ngatī inlahen vē tökòlô tarik min nö hetngö tökūöre nöng chūkörit minë kanôlò re.

12 Töṙamölōn öp anga-aṅ tarik öp tö möi nö el ṙētak kinlaha, pò ò min yěn köp nö el minë kinlaha* ngaich teūngen min anga-aṅ tö ngam sapīöv nômö ngam tökilē-ěyö tö Yāvē* nö in ò ngam töng örheūheu nö hangenlōn tö ò. 13 Yěn ōt tökalaha ngaich uh anga-aṅ nö ngö ṙô: “Kalaha chin tö ngam Tēv.” Pò ngam Tēv nö ötkô nö kalaha tö nup tötlöök ṙô hēk ötrēhěn inrē anga-aṅ nö kalah ngòh tarik nö in nup tötlöök ṙô. 14 Tūöki pöri ngòh tarik tö nup kuilōnre hēk halō-oikūö* lökten ò nö fukta nö in minë kinlaha. 15 Ngaich yěn kalēlöre ngam kuilōn ò ngaich timlö alaha ò angū-ö nö kēken ngam tökööl ngam kamū-ötö im kinpaha tī tö ò.

16 Yī-ö hanangenlōn chu kahōlö, uh yin höng hachīlöre. 17 Ṙòkhöre nup töng vai hēk tö teung inlōnti nö ṙamā-ang lātulöng nö aṅ in ngam Yöng ngam hanātö aṅ el halīöngö, ngam töt haṙīköre nö sā inlahen nup nyat tö kūöṅnngöre hēk kirönglöre inrē. 18 Kuilōn ò angū-ö misī tö hī öi fötnyu öi löktö im ṙô ngam kanô-en, hòṅ hī ayī-ö öi sā ṙēngen yip raneh ṙòng öi in yip vahī ò tarik_.

19 Yī-ö hanangenlōn chu kahōlö, akahalōn yin tö ngih ṙô: ta-a töi veūten im inngihtöre, ṙēmöṙô öi ṙô-òvö, ui veūtö tanāinyö, 20 pò ngam ṙòng ngam tanāinyö ngòh tarik rö-ö angū-ö nö lanöökö ngam Tēv. 21 Lökten ṙūöhöngre tö nup taṙòkhöre töchōich hēk tö nup taṙòkhöre mum ngam ötlanöökö* ngaich yěn teūichtu ngam ṙô nö ellōn yīö ngaich holtö ṙanëmenre öi hō-en e pò e min nö laklö ngam nômö yīö.

22 Kamëkö kaha ngam ṙô pöri, ui höng hamang öi mahachīlöre tö minë tö minyôiny inlēnö. 23 Pò ngòh töng hamang ngam ṙô, öt lök in u pöri ngaich sā öp tarik anga-aṅ öp töng ngamëichkö* kūöre nö ikūö öp tinmël. 24 Ngëichkökūöre anga-aṅ ngaich kiröönngöre ngaich ilööṙen anga-aṅ nö vaichngö töre nö tö sitih inlahen nö tarik. 25 Ngòh tarik pöri maharöhtöre nö tö chumkūöṙen nö chöh ngam tö teung chööngö ngam kamëtö ṙinānyö ngaich iṙūöhen nö ngatī inlahen, öthō anga-aṅ tarik nöng hang ngaich vaichngö, tūönkui u pöri ngaich teūngen anga-aṅ tö ṙanamölōnre nö löktö in u.

26 Yěn ōt tarik tö ngö lōn töre nö maha-öiny ngam Tēv,* hö-ö pöri nö lak ngam ṙōi litākre ngaich höng mahachīlngen ngam ellōnre anga-aṅ hēk höng yanëḵngen ngam inlahen ò nö ha-öiny ngam Tēv. 27 Ngih ön töhet hēk töt pitōtuvö nö nööinyö* nö imat ngam Tēv ngam Yöng hī: ngam mineukṙen yip kūönyōich hēk tafīösi hē el ṙētak kanihngen, haköpöre inrē un pitōtuvö tö nup aṅ ing panam.