Inhānga Kahūich Yôhan
12 Urēhěkūö ngam tö tafūöl sumkam ngam paratīn Pāska ang Yēsū nö teung nö i Petenī, mi-iyöng in e ang Lāsörös, ngam tö hachohlöng nö ṙā-ang in yip tökapah tö Yēsū. 2 Halēnkaṙen nyā-aṅkūö ngaich ang Yēsū nö in e tö lā harap ngaich höng tanten ang Mārta nö meukṙen cha, yik tarik amūichhak nö holkūö Yēsū nö nyā,* in cha inrē ang Lāsörös. 3 Lohten nö 327 kram* ök kahumtö Mariā tötahūsa tavī-i nö el ök töpōiṙāi pilön, ṙöstö ök tavī-i ngaich anga-aṅ nö iröön Yēsū ngaich chūtö e nö aṅhtī tö keūyöre. Keuheūtngöre ël ök patī tö tinhūsö ök tavī-i. 4 Ngaich pöri ang Yūta Iskaryôt, ngam tö hěngtak nö in yik haköptö Yēsū hēk tö hòṅ kēngen ò, nö ngö ṙô: 5 “Kūö yòh öng ngih tötahūsa tavī-i nö öt inyihiyö nö 300 tinār* ngaich kētu nup ṙāi e nö in yip yāich?” 6 Rö-ö pöri anga-aṅ nö kūö pinṙūtölōnre tö yip yāich nö ngatī ṙô, kūö ò pöri nö mu-ulāiya lökten anga-aṅ nö ngatī ṙô ngaich höng in ò ök pòks chūök nuk pësa ngaich höng ulāiyngö nuk aṅ u anga-aṅ. 7 Ngö ṙô ngaich ang Yēsū: “Hökngen ò man, hòṅ ò nö halēnkö ngam lināpngö chu nö sā ngam tö nehngenre inlahen. 8 Pò vē yāich nöng töng örheūheu nö holtöṙah yīö, hö-ö pöri chū-ö höng örheūheu min öich in yīö.”
9 Im hē e ngaich yik tömaṙôngö Yahūti nö akahalōn tö Yēsū nö umuh, rö-ö cha-a nö ngamëichhören Yēsū nö yih nö umuh, pön ngamëichhören Lāsörös inrē ngam tö hachohlöng nö ṙā-ang in yip tökapah. 10 Vë-ekūöre ngaich yik mākūö kūönṙô tö inlahen tīre nö hòṅ fëlngen Lāsörös, 11 pön angū-ö lāinyngen yik tö pōyen Yahūti nö chuh in e ngaich ṙatö-ellōnre nö in Yēsū.
12 Im tahëng sakāmö yik tömaṙôngö tarik yamih nö im paratīn nö hāngö Yēsū cha-a nö yih nö i Yērūsalem. 13 Ngaich cha-a nö kēḵ rōi kachūr nö kiröönngöre nö hòṅ meukkūö ò ngaich pōitô nö hū-a, nö ngö ṙô: “Hayāichtôre in vë-ekūö meh, laklen ò! Tökôlò ön ngòh yamih nö i minë-eny Yāvē.* Tökôlò ön ngòh Rācha yip Israel!” 14 Hē Yēsū nö teūngen tök tö hěng nòng kūön köttö, ūichngöre ngaich anga-aṅ nö i uk ò, sā kinūichngö e nö ngö: 15 “Kikānö kūön Siyôn, uh man pa-ekūö. Yěh meuk! Yih ön ngam rācha meh nö ūichhak nö i uk ngam kūön köttö.” 16 Urěh sin yik haköptö ò nö öt akaha elnang tö manah në ṙô ò, hē Yēsū pöri nö teūngen tö kanôlò re, fē-ělre ngaich cha-a nö sā inlahen minë tökūichi inlahen ò nö in cha ngaich ngatī inlahen anga-aṅ.
17 Yik tarik mameuk inlahen Yēsū nö havënyen Lāsörös nö ṙā-ang el anūlö hēk hachohlen ò nö ṙā-ang in yip tökapah ngaich höng iṙūöhen cha-a nö vë-eny inlahen e nö in yip tahëng. 18 Ṙën yik tömaṙôngö tarik nö chuh in Yēsū, kūö cha nö hang inlahen ngih pinngangkūö. 19 Vë-ekūöre ngaich yik Feresī nö ngö ṙô: “Yěh meuk! Höng öt heuveū-eu inlahen in ngaich ayī-ö, pön höng ṙòkhöre ngih panam nö tömrit ò.”
20 Rīkre inrē yik aṅ Krīk yamih nö vë-ekūötēv im hē ṙētak ngam paratīn. 21 Lökten ngaich cha-a nö chuh in Filip ök mi-iyöng i Petsĕitā i Kelelī ngaich hòṅ aṙētu ṙô, nö ngö ṙô: “Mā, hòṅ meukkūö Yēsū in.” 22 Kiröönngöre ngaich ang Filip nö vë-eny nang Antaru. Ngaich nëtre tak ngaich cha-a nö kiröönngöre nö vë-eny nang Yēsū.
23 Ngö ṙô ngaich ang Yēsū nö sapṙô cha: “Ngaich an ngam ṙētak nö yih, hē ngòh Kūön tarik min nö teūngen tö ngam kanôlò re. 24 Tökò-òṙô Chin tö yīö, hanöng sā ngam kulöl sāiny nö öl nö suktöre nö el tumlat nö kapah ngaich höng köp min ngam kulöl nöng hěng, yěn kapah pöri min angū-ö ngaich pōyen kahëti min angū-ö tö ṙòng re. 25 Ngòh tö hangenlōn tö ngam nômöre ngaich ha-etngen e min anga-aṅ, ngòh tö kunyaha elmat pöri tö ngih nômöre nö ing panam ngaich laklen e min anga-aṅ, hòṅ ò nö teūngen tö ngam nômö tö örheūheu-aṅ. 26 Ngòh tö hòṅ meukṙen chu, tömrit chu anga-aṅ ngaich öp kamngö chūök chu in e inrē min öp mameukṙen chu. Ngòh mameukṙen Chu min, milēḵṙen min ngam Yöng chu tö ò. 27 Sitih ṙô öich min hēk? Höng haṙivlōn chin. Kayööngö, laklen chu man tö ngih ṙētak. Angū-ö pöri chö-öiny Chu öich teungtökūö i ngih ṙētak. 28 Kayööngö, hakôlò ngam minë-enyre man.” Hāngö ngaich ök ṙô lamöktö el halīöngö: “Ngaich chin hakôlò e hēk min inrē öich hakôlò e.”
29 Hē yik tö röhta samökhak tömaṙôngö nö hāngö e ngaich ngö ṙô yik tarik tö ngam taṙul nö kunṙôku. Ngö ṙô pöri yik tahëng: “Ōt öp ma-ahānga vamë-ekūö ò.” 30 Ngö ṙô ngaich ang Yēsū: “Hö-ö ön ngih ṙô nö chö-öinyten chu nö hāngö, pön chö-öinyten tö yīö. 31 Ngaich ön töngamuh ngih panam nö kahòkkaṙen ngaich ha-uknyu min ngam rācha ngih panam. 32 Yēḵ chu pöri min öich kēḵlöng öich ṙā-ang ing panam öich chuh lātulöng ngaich tūökten yip töṙòkhtöre mihëṅṙö min chū-ö tarik öich in re.” 33 Ṙën anga-aṅ nö ngatī ṙô, pön hòṅ hameuktö inlahenre anga-aṅ nö sitih inlahen finëlngö nö kumpaha. 34 Ngö ṙô ngaich yik tömaṙôngö nö in ò: “Hang in īhö in ngam Chööngö tö Kristū min nöng töng örheūheu nö köp. Ngaich kūö yòh më-eṅ öm ngö ṙô tö ngòh Kūön tarik nö tö hòṅ kēḵlöng nö chuh lātulöng? Achīö ang ngòh Kūön tarik?” 35 Ngö ṙô ngaich ang Yēsū nö in cha: “Höng rahëichtöreṙen an ngam hanātö nö elhôi yīö. Hanöng sā e nö in yīö, lök el ngam hanātö yī-ö hòṅ yīö öt havīlöng tö ngam sinngūlö, ngòh lamök el sinngūlö öt akahakūö anga-aṅ töp chahūhure. 36 Hanöng sā ngam hanātö nö in yīö ngaich ṙatö-ellōnre yī-ö in ò, hòṅ yīö min öi Kūön ngam hanātö invëka.”
Unôichrit kinheūtö ṙô Yēsū, kiröönngöre ngaich anga-aṅ ngaich hayunngöre tö cha. 37 Pōyen nuk pinngangkūö hameuktö ò nö lakūö cha hē e, sön pöri cha-a nöng öt ṙatö-ellōnre nö in ò, 38 ngatī inlahen taneūngtökūö ngih ṙô ök pròfět Isayā: “Ō Yāvē,* achīö öp ṙamatö-ellōnre nö in ngih tö ahangka ṙô? In chīö tī ang Yāvē* nö hameuktö ngam kumlēḵre?”* 39 Kūö yòh cha-a nö öt ṙatö-ellōnre, vënyö ngam lāinyngen e ang Isayā nö ngö ṙô: 40 “Tilupngö mat cha anga-aṅ hēk hangëḵngen ngam ellōn cha inrē, hòṅ cha nö öt meuk hēk öt akahakūö tö ṙô ngam ellōnre ngaich ötrēhěn cha-a nö hòṅ havantöre ngaich halanken cha öre Chū-ö.” 41 Ṙën ang Isayā nö ngatī ṙô tö inlahen Kristū, pò ò nö meuk kanôlò Kristū misī. 42 Rö-ö pön pōyen yik mākūö tinlööken ṙamatö-ellōnre nö in Yēsū, kūö pihë-eṅkūöre pöri cha-a tö yik Feresī, lökten nö öt hameuktöre nö hō-en ò, hòṅ cha nö öt ha-ōnyu nö ṙā-ang el ngam chūök vinë-ekūötēv, 43 mööḵlö lōn cha-a tö ngam kanôlò lamöktö i tarik tö ngam kanôlò lamöktö in ngam Tēv.
44 Pōitô pöri ang Yēsū, nö ngö ṙô: “Ngòh ṙamatö-ellōnre nö in chu, rö-ö anga-aṅ nöng in chu nö ṙatö-ellōnre, pön in ngam tamīnten chu inrē, 45 ngaich ngòh mameūkö chu ngaich mameuk ngam tamīnten chu inrē anga-aṅ. 46 Yih chin öich ing panam öich sā hanātö, hòṅ ngòh ṙamatö-ellōnre nö in chu nö öt el sinngūlö. 47 Yěn ōt hamang ṙô chu ngaich öt kēken u pöri, öt kahòkken ò min Chū-ö, kūö Chu öt yamih öich kahòkken ngih panam, lamaklen e pöri. 48 Ngòh samô-en chu hēk töt hamô-en minë ṙô chu, tahëng öp kamhòkken ò. Ngam vahënyö Chu pöri ṙô angū-ö min kamhòkken ò ip manā-aṅ sakāmö. 49 Pò minë ṙô nö öt lamöktö in Chu, ngam Yöng pöri ngam tamīnten chu, anga-aṅ kamëtö chööngö chu tö nup tö hòṅ vahënyö chu hēk tö nup tö hòṅ ṙô chu inrē. 50 Ngaich akahakūö chū-ö tö manah ngam hināngö chööngö nö nômö tö örheūheu-aṅ. Lökten Chin öich höng vënyö minë ṙô, minë vahënyö ngam Yöng nö in Chu.”